Son zamanlar marketlərdə qarışıq tərkibli bitki yağlarının satıldığına dair məlumatlar dolaşır. İddialara görə, bizim marketlərdə pambıq yağı qarışdırılmış bitki yağları peyda olub ki, bunun da orqanizmə zərərlərinin böyük olduğu deyilir.
Mətbuatda verilən məlumata görə, Azərbaycanda yerli markaların istehsalı olan günəbaxan yağı ilə pambıq yağının qarışığı olan duru bitki yağı marketlərdə satılır.
Yazılanlara görə, bir çox istehlakçı bu yağları günəbaxan yağı bilərək alır, çoxu isə ucuz olmasına görə seçir.
Azərbaycan mətbəxində pambıq yağı heç vaxt qida yağı olmayıb. Pambıq yağını daha çox özbək, türkmənlər kimi Asiya xalqları plovlarında istifadə ediblər və onun özünəməxsus tamı var.
Nutrisoloq-həkim Amaliya Rəhimova mətbuata bildirib ki, belə yağlar bədənə faydalı yox, zərərlidir. O deyib ki, bitki yağları doymuş, monodoymamış və polidoymamış yağ turşuları baxımından fərqli tərkibə malikdir.
Azərbaycan Tibb Universitetinin dosenti Fuad İslamzadə “Bakı-Xəbər”ə bildirdi ki, əslində, təmiz pambıq yağının qidalanma məqsədilə istifadəsinin mümkünlüyünü desə də, indiki şəraitdə pambığın becərilməsində çoxlu zərərli kimyəvi maddədən istifadə edildiyini nəzərə alsaq, pambıq yağının bu maddələrdən tam təmizləndiyini və orqanizm üçün yararlı olduğunu əminliklə demək olmaz.
“...bu yağın marketlərdə peyda olması təsadüfi deyil”
Azad İstehlakçılar Birliyinin rəhbəri Eyyub Hüseynovun fikrincə, insan orqanizmi üçün zərərli olan qarışıq bitki yağının marketlərə yol açması məqsədli xarakter daşıyır: “Azərbaycanda biznes qurumları üçün çox münbit bir şərait yaradılıb, onların toxunulmazlıq hüququ təmin olunub və hökumət onlara dünyanın heç bir yerində olmayan şəraiti yaratdığı halda biznes qurumları bundan sui-istifadə edir, istehlakçıları aldadırlar. Bu kimi halların baş verməsi və istehlakçıların həyatına, sağlamlığına zərər vuran bu yağın marketlərdə peyda olması təsadüfi deyil. Fikrimcə, hökumət biznes qurumlarının toxunulmazlıq şəraitini dəyişməlidir. Bu işə nəzarət etməli olan müvafiq dövlət qurumlarının əl-qolları bağlıdır, demək olar ki, onlar heç bir iş görə bilmirlər. Əlbəttə, belə bir şəraitdə istehlakçıların aldadılması və bu cür malların satılması meydana çıxır. Düşünürəm ki, bu məhsula Qida Təhlüksizliyi Agentliyi nəzarət etməlidir. Burada artıq təhlükəsizlik yox, keyfiyyət məsələsi ortaya çıxır. Qida Təhlükəsizliyi Agentliyi bu məsələni araşdırmalıdır. Ümumiyyətlə, Qida Təhlükəsizliyi Agentliyi malların təhlükəsizliyinə təminat verir, keyfiyyətə isə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti nəzarət edir. Təəssüflər olsun ki, bu iki qurumun sıx əlaqəli işləməsini biz müşahidə edə bilmirik. Ona görə də bazarda bu cür yağlar ola bilər. Mənə konkret şikayət ünvanlansa, o yağların ekspertizasının keçirilməsi və məsələnin həlli üçün lazımi addımlar ataram” - deyə E.Hüseynov qeyd etdi.
Məsələyə Qida Təhlükəsizliyi Agentliyinin mövqeyini öyrənmək cəhdimiz alınmadı.
İradə SARIYEVA
