Dünyanın əksər ölkələrində olduğu kimi, 1 iyun Uşaqların Beynəlxalq Müdafiəsi Günü hər il Azərbaycanda da dövlət səviyyəsində təntənəli şəkildə qeyd olunur.
Bildiyiniz kimi, 1950-ci il iyunun 1-də BMT Baş Assambleyasının təşkilatçılığı ilə keçirilən qadınların beynəlxalq konfransında iyunun 1-ni uşaqların müdafiəsinə həsr etmək qərara alınıb. Bundan sonra həmin gün uşaqların beynəlxalq müdafiəsi günü kimi tarixə düşüb. Bütün demokratik dövlətlərdə olduğu kimi, Azərbaycanda da uşaq hüquqlarının qorunmasına xüsusi önəm verilir, uşaqların sağlam, hərtərəfli, Vətənə layiqli övladlar kimi böyümələri üçün hər cür şərait yaradılıb. Azərbaycanda uşaq problemləri hər zaman diqqət mərkəzindədir. Uşaq problemlərinin ardıcıl həlli dövlət siyasətinin prioritet istiqamətlərindən biridir. Bu gün Azərbaycan uşaqlarının sağlam mühitdə böyüməsi və tərbiyə olunması, müvafiq standartlara cavab verən təhsil müəssisələrində oxuması üçün dövlətimizdə hər cür şərait yaradılmışdır. Ölkəmizdə uşaqların müdafiə olunması və onlara qayğı göstərilməsi istiqamətində çoxsaylı işlər görülüb. Ölkəmizdə uşaqların sosial və hüquqi müdafiəsi ilə bağlı məsələlər Konstitusiya, qanunverici və normativ-hüquqi aktlarla tənzimlənir. Bu sahədə əsas normativ sənəd 1998-ci il mayın 19-da qəbul edilmiş “Uşaq Hüquqları haqqında” Azərbaycan Respublikasının Qanunudur. Ümummilli liderimiz Heydər Əliyev uşaqlara dövlət səviyyəsində qayğını həmişə diqqətdə saxlayırdı. Ölkəmizdə indi də uşaqlara qayğı ildən-ilə artır, uşaq problemlərinin həlli istiqamətində müxtəlif layihələr həyata keçirilir. Bu, Heydər Əliyev Fondunun da əsas prioritetlərindən biridir. Azərbaycanın I vitse-prezidenti Mehriban xanım Əliyeva xüsusi qayğıya ehtiyacı olan, valideyn himayəsindən məhrum olan uşaqlara daim diqqət və qayğı ilə yanaşır, bu nəcib missiyası ilə bütün Azərbaycan uşaqlarının ən böyük dostu və ən böyük himayədarıdır. 1 iyun Uşaqların Beynəlxalq Müdafiəsi Günündə “Kimsəsiz Uşaqların Sosial Müdafiəsi” İctimai Birliyinin sədri Lamiyə İsazadə və Gəncə Gənclər Evinin rəhbəri Amil Qurbanov və digər xeyriyyəçi şəxslər Gəncə Körpələr Evindəki valideyn himayəsindən məhrum olan körpələri ziyarət etdilər. 1 iyunla bağlı həmin körpələr üçün əvvəlcədən aksiya təşkil edən təşkilat sədri Lamiyə İsazadə aksiyaya dəstək verən millət vəkilləri Ülvi Quliyev və Sahib Alıyevə, Mətbuat Şurasının sədri Əflatun Amaşova, Gəncə Dövlət Universitetinin Pedaqoji fakultəsinin dekanı Bayram Apoyevə, Gəncə Gənclər Evinin rəhbəri Amil Qurbanova və digər xeyriyyəçi şəxslərə öz minnətdarlığını bildirdi və bu cür aksiyaların davamlı təşkil olunacağını diqqətə çatdırdı.
