Qazilərin, qazilərlə bağlı təşkilatların adlarından sui-istifadə hallarına yol verənlərin sayı çoxalmaqdadır. Çox təəssüf ki, bəziləri qazi adından yararlanaraq dava-dalaşlara gedir, dövlət qurumlarının yolunu su yoluna döndərirlər. Qazi adından istifadə ilə bağlı cəmiyyətimizdə çox ciddi narahatlıq var.
“Qarabağ qaziləri” İctimai Birliyinin adından da istifadə edənlər az deyil: “Son zamanlar tez-tez sosial şəbəkələrdə və mətbuatda Qarabağ qazilərinin dalaşması, hakimiyyət orqanları ilə gərginlik yaşanması hallarının şahidi oluruq”. Bu barədə “Qarabağ qaziləri” İctimai Birliyinin rəsmi açıqlamasında bildirilir.
“Qarabağ qaziləri” İctimai Birliyinin adından kimlər sui-istifadə edir, kimlər özünü qazi, yaxud bu təşkilatın üzvü kimi qələmə verərək neqativ hərəkətlər törədirlər?
“Bizim təşkilatın adından istifadə edirlər, müxtəlif təşkilatlara gedirlər”
“Qarabağ qaziləri” İctimai Birliyinin sədri Asəf Əliyev “Bakı-Xəbər”ə bildirdi ki, müəyyən bir qrup insanlar var və onlar öz şəxsi mənafeləri üçün “Qarabağ qaziləri” İctimai Birliyi adından istifadə edərək, qanunsuz yolla idarə və təşkilatlara təzyiqlər göstərir, xoşagəlməz hadisələr törədirlər. Bu kimi halları pislədiklərini deyən A.Əliyevin sözlərinə görə, rəhbərlik etdiyi təşkilatın heç bir üzvü bir qurumun, idarənin qapısını döymür, amma bəziləri onların adlarından sui-istifadə edirlər. “Bizim təşkilatın adından istifadə edirlər, müxtəlif təşkilatlara gedirlər. Bu adamlar başqa-başqa təşkilatların üzvləridir, gedib xoşagəlməz işlər görürlər. Onlardan kimliklərini soruşduqda isə özlərini yanlış olaraq “Qarabağ qaziləri” İctimai Birliyinin sədri və ya başqa səlahiyyətli nümayəndəsi kimi qələmə verirlər. "Qarabağ qaziləri" İctimai Birliyinin sədri olaraq rəsmən bəyan edirəm ki, bu qanunsuz hərəkətləri törədənlərin “Qarabağ qaziləri” İctimai Birliyinə heç bir aidiyyəti yoxdur. Bilmirəm bu təşkilatları kim yaradıb, onlar haradan yaranıblar? Anlamaq olmur. Yağışdan sonra çıxan göbələk kimi gündə bir təşkilat yaranır. “Müharibə əlili” adı altında yaranan təşkilatların sayı çoxdur və onlar da sanballı təşkilatların adından istifadə edirlər. Birliyimiz dövlətimizin maraqlarını, dövlətçiliyimizi yetərincə müdafiə edən bir təşkilatdır. Yarandığımız gündən əsas işimiz qazilərin hüquqlarını qorumaq və onların sosial problemlərini həll etmək olub. Bəzi təşkilatlar gedib orda-burda “moşenniklik”lə məşğuldurlar. Nə bilim torpaq zəbt edirlər, digər işlər görürlər. Saymaqla bitmir”.
A.Əliyev qeyd etdi ki, rəhbərlik etdiyi birliyin üzvlərinin, idarə heyətinin adından sui-istifadə halları yolverilməzdir. O vurğuladı ki, birliyin bütün üzvlərinin təşkilatda sənədləri var, üzvlərin hamısını tanıyır. Rəhbərlik etdiyi təşkilatın dövlət tərəfindən tanınıb qəbul edildiyini deyən A.Əliyevin sözlərinə görə, təşkilatın nüfuzu çox yüksəkdir.
A.Əliyev hesab edir ki, sui-istifadəçi təşkilatlara qarşı dövlət qurumları tədbirlər görməlidirlər. “Tədbirləri özümüz də görürük, adımızdan istifadə edən adamlar arasında tanıdığımız varsa, çağırıb söhbət edirik. Arzu edərdik ki, dövlət qurumları bir papkası, bir özü olan təşkilatların sayını azaltsınlar. Əvvəllər müharibə ilə bağlı üç təşkilat var idi. İndi isə o qədər təşkilat var ki…” - deyə A.Əliyev qeyd etdi.
İradə SARIYEVA
