Xırdalan şəhərinin Şıxəli Qurbanov küçəsində qanunsuz olaraq çoxmənzilli bina tikintisinin aparılması ciddi narazılığa səbəb olub. 30-dan çox sakin bildirir ki, onlar məsələ ilə bağlı Abşeron Rayon İcra Hakimiyyətinə müraciət etsələr də, heç bir nəticə verməyib. Belə ki, Ş.Qurbanov küçəsi 38 ünvanındakı sözügedən özbaşnalığa göz yumulmasının səbəbi bu tikintini həyata keçirən şəxsin vəzifəsindən sui-istifadə etməsidir. Qanunsuz tikintini həyata keçirən şəxs Cəlilova Gülzar Hüseyn qızıdır.
Həmin ərazidə eni və uzunluğu 10 x12, hündürlüyü də 12 metri keçməmək şərtilə yaşayış evi üçün icazə verilib. Qeyd edək ki, bununla bağlı icra başçısı İradə Gülməmmədovanın imzaladığı sərəncam da var.
Artıq binanın bünövrəsi də qazılıb. Bu da həmin ərazidə yaşayan sakinlərin narazılığına səbəb olub. Sakinlər bildirirlər ki, qanunsuz tikintinin dayandırılmayacağı təqdirdə Bakı-Sumqayıt magistral yolunu bağlayacaqlar, daha sonra Prezident Administrasiyası qarşısında etiraz aksiyası keçirmək istəyirlər.
“...tikinti əmsallarını pozaraq özülün qazıldığı...”
Azərbaycan Respublikasının Dövlət Şəhərsalma və Arxitektura Komitəsində bildirildi ki, komitəyə 18.05.2021 və 27.05.2021-ci il tarixlərində daxil olmuş vətəndaş şikayətlərinə əsasən, Abşeron rayonu, Xırdalan şəhəri, Ş.Qurbanov küçəsində gedən inşaat işləri ilə bağlı dərhal araşdırmaya başlanıb: “İlkin baxış müddətində vətəndaş tərəfindən fərdi yaşayış evinin tikintisi üçün aparılan söküntü işlərində qanun pozuntusu qeydə alınmayıb. Lakin əraziyə növbəti monitorinq zamanı vətəndaşın mülkiyyətində olan torpaq sahəsində qanunla yol verilən tikinti əmsallarını pozaraq özülün qazıldığı aşkarlanıb, müvafiq inşaat işlərinin Dövlət Şəhərsalma və Arxitektura Komitəsi ilə razılaşdırılmadan qanunsuz şəkildə həyata keçirildiyi müəyyən edilib. Bununla bağlı həmin torpaq sahəsində tikinti işlərinin dayandırılması və müvafiq tədbirlərin görülməsi üçün Abşeron Rayon İcra Hakimiyyətinə və FHN-in Tikintidə Təhlükəsizliyə Nəzarət Dövlət Agentliyinə müraciət ünvanlanıb”.
Günel CƏLİLOVA
