Avropa Birliyinə üzv olan bəzi dövlətlər vaksinlərə qarşı ayrıseçkilik sərgiləməkdədirlər. İngiltərə, Fransa başda olmaqla bir sıra ölkələr ölkəyə daxil olan şəxslər qarşısında tələblər qoyurlar. Bir sıra Avropa ölkələri başqa ölkələrin istehsal etdikləri vaksinləri qəbul etmirlər.
Məsələn, İngiltərə, İtaliya və başqa ölkələr “Sinovac”, “Sputnik V” kimi vaksinlərlə vaksinasiya edilənləri öz sərhədlərindən içəri buraxmırlar. Bu gün bizim bəzi vətəndaşlar Avropa ölkələrinə getmək istəyirlər, lakin onlara bildirilib ki, “Sinovac”, “Sputnik V” və başqa vaksinlər vurdursalar, onlar bu ölkələrə buraxılmayacaqlar. İnsanlardan ancaq “Pfizer-BioNTech”, “Astra zenika” kimi peyvəndləri vurdurmaları tələb olunur, onlar bu peyvəndləri vurdurduqdan sonra Avropa ölkələrinə buraxıla bilərlər.
Bəzi Avropa ölkələrinin vaksinlərə qarşı ayrıseçkilik göstərmələri, insanlardan ancaq “Pfizer-BioNTech”, “Astra zenika” peyvəndlərini tələb etmələri insan haqlarının pozulması demək deyilmi? Niyə məhz “Pfizer-BioNTech”, “Astra zenika” vurduranlar bu ölkələrdə qəbul edilirlər?
“Avropa ölkələrində başqa ölkələrin istehsalı olan vaksinlərə qarşı bu cür münasibət göstərilməsi heç düzgün deyil, bu ədalətsizlikdir”
“Sağlamlığa Xidmət” İctimai Birliyinin icraçı direktoru Pərvanə Vəliyeva baki-xeber.com-a bildirdi ki, problem xeyli vaxtdır var: “Bu vəziyyət çoxdandır var. İngiltərəyə getmək istəyənlərə “Astra zenika”, yaxud “Pfizer” tələb olunur. Çünki hazırda Avropada ən çox bu peyvəndlər istifadə olunur. Onlar Çinin “Sinovac” peyvəndini sifariş verməyiblər. “Sinovac” da, “Sputnik V” də Avropada istifadə olunmur. Bizim peyvəndini istifadə etdiyimiz “Sinovac” Avropa Dərman Agentliyindən təsdiqini almayıb. Ona görə bu belədir. Əlbəttə, bu ölkələrin sərgilədikləri davranış vaksin ayrıseçkiliyidir. Fərqi yoxdur, hər ikisi vaksindir, hansısa təşkilatdan təsdiq almasalar da, belə qoruyuculuğu təsdiq olunmuş vaksinlərdir. “Sinovac” bizim ölkədə 80 faiz müsbət nəticə göstərdi. Yəni bu da öz əhalisini qorumaq üçün onların seçdiyi yoldur və “Pfizer”ə, “Astra zenika”ya üstünlük verirlər. Yaxud da öz dərman bazarlarına xeyir vermək istəyirlər. Çünki “Pfizer-BioNTech” Almaniya-Amerika istehsalıdır, “Astra zenika” da İngiltərə-İsveç istehsalıdır. Yəni bunlar Avropada istehsal olunan peyvəndlərdir. Heç onlar Rusiyanın peyvəndini yaxına qoymurlar, adını çəkmirlər. Ancaq Cənub-Şərqi Asiya ölkələri isə Çindən vaksin alıblar”.
Ekspertin sözlərinə görə, elə ölkələr var ki, orada 5 peyvəndin 5-i də var, məsələn, Sinqapurda. Onların peyvəndlərin çoxşaxəli portfelini yaratdıqlarını deyən P.Vəliyevanın sözlərinə görə, məqsəd odur ki, kim hansını istəyir, ondan istifadə etsin. “Yəni vaksinlər arasında məhdudiyyət yoxdur. Amma Avropada bu məhdudiyyət qoyulur. Avropa ölkələrində başqa ölkələrin istehsalı olan vaksinlərə qarşı bu cür münasibət göstərilməsi heç düzgün deyil, bu ədalətsizlikdir”
P.Vəliyeva təəssüflə qeyd etdi ki, vaksinləri istehsal edən ölkələrə, markalara görə bəzi ölkələr tərəfindən ayrıseçkilik qoyulur, bu isə doğru deyil.
İradə SARIYEVA
