“Mən artıq göstəriş vermişəm ki, bizim təhsil proqramlarımızda, məktəblərdə və ali məktəblərdə, universitetlərdə tarix dərsliklərinə İkinci Qarabağ müharibəsi mövzusu mütləq salınsın”. Bunu Prezident İlham Əliyev mayın 27-də Türkiyə Respublikasının milli təhsil naziri Ziya Selçuku qəbul edərkən deyib.
Dövlət başçısı bildirib: “İndi bizim müvafiq qurumlar, o cümlədən, Təhsil Nazirliyi bu məsələ üzərində çalışır ki, bizim bu şanlı tariximiz dəqiqliklə öyrənilsin. Çünki beynəlxalq mətbuatda bu günə qədər İkinci Qarabağ müharibəsi ilə bağlı yanlış və təhrif edilmiş məlumat dərc edilir. Ona görə real həqiqətləri, həqiqətə əsaslanmış bu tarixi biz həm öz vətəndaşlarımıza, həm də dünyaya çatdırmalıyıq. Ümid edirəm ki, Türkiyənin tarix dərsliklərində də bu məsələ öz əksini tapacaq. Xüsusilə, nəzərə alsaq ki, Türkiyə müharibənin ilk saatlarından Azərbaycana çox böyük siyasi və mənəvi dəstək göstərmişdir. Əziz qardaşım, Cümhurbaşqanı Rəcəb Tayyib Ərdoğan ilk dəqiqələrdən, ilk saatlardan bəyanatlarla çıxış etmiş və demişdir ki, Türkiyə Azərbaycanın yanındadır. Bunun çox böyük mənəvi və siyasi əhəmiyyəti olmuşdur. Azərbaycan 44 gün ərzində ədaləti, öz ərazi bütövlüyünü bərpa etdi və 30 illik işğala son qoyuldu”.
Ali və orta məktəblər üçün tarix dərsliklərində Vətən müharibəsi mövzusu barədə Prezidentin tapşırığı necə icra ediləcək?
“Bu vəsaitlərdə bizim zəfər tariximiz şagirdlərin yaş xüsusiyyətlərinə uyğun olaraq əks olunub”
Dərslik müəllifi, tarixçi-tədqiqatçı Hafiz Cabbarov baki-xeber.com-a bildirdi ki, ölkə başçısı Azərbaycan tarixçilərinin, dərslik mütəxəssislərinin, eyni zamanda da əlaqədar elm və təhsil qurumlarının qarşısına çox mühüm və şərəfli bir vəzifə qoyub. Prezidentin göstərişi qüsursuz olaraq icra edilir, proses artıq başlayıb. “Tarix dərsliklərində tariximizin istər qədim, istər orta əsrlər, istərsə də müasir dövrləri, eləcə də tariximizin ən şanlı səhifələrindən biri olan Cümhuriyyət dönəmi, bu dövrdə qazandığımız uğur və nailiyyətlər hər zaman əks etdirilməyə çalışılıb. Gənc nəslə tariximizlə iftixar, qürur duymaq və Vətəni sevmək xüsusiyyətləri aşılanıb. Cənab Prezidentin 44 günlük Vətən müharibəsinin, şanlı qələbəmizin ali və orta məktəb proqramlarında, tarix dərsliklərində əks etdirilməsi ilə bağlı göstərişlərinin icrası istiqamətində artıq addımlar atılır. Bilirsiniz ki, əvvəllər VII və VIII siniflərdə Qarabağ tarixi adlı fakültativ dərslər keçirilirdi. İndi artıq gələn tədris ilindən IX siniflər üçün Qarabağın zəfər tarixi adlı fənn keçiləcək. “Qarabağ tarixi” fənni artıq Qarabağın zəfər tarixi fənni ilə əvəzlənəcək. Biz Qarabağ müharibəsində şanlı zəfər qazanmışıq, torpaqlarımızı azad etmişik. Təhsil Nazirliyi tərəfindən Qarabağın zəfər tarixi ilə bağlı işlər görülür, o cümlədən, Dövlət İmtahan Mərkəzi də bu il qəbul imtahanına düşən mövzular sırasına Vətən müharibəsində qazndığımız qələbə ilə bağlı suallar daxil edib. Yəni proqramda da xüsusi dəyişikliklər edərək məhz Vətən müharibəsində qazandığımız böyük zəfərin qəbul proqramlarında və suallarda əks olunması haqqında müvafiq addmlar atıb. Hətta DİM rəhbəri də bu istiqamətdə ictimaiyyətə məlumat verib. Biz müəllimlər də dərslərimizdə xüsusi olaraq bu qələbəni şagirdlərə bütün ölkə üzrə tədris edirik. Bütün tarix müəllimləri bu istiqamətdə addımlar atır”.
H.Cabbarovun sözlərinə görə, V, VIII, IX, XI siniflər üzrə xüsusi vəsait hazırlanıb və həmkarı Pərviz Ağalarovla birgə o özü də bu vəsaitin hazırlanmasında yaxından iştirak edib. “Bu vəsait elektron variantda Təhsil Nazirliyi tərəfindən ölkə üzrə bütün təhsil şöbələrinə və məktəblərə təqdim edilib. Bu vəsaitlərdə bizim zəfər tariximiz şagirdlərin yaş xüsusiyyətlərinə uyğun olaraq əks olunub” - deyə H.Cabbarov vurğuladı.
İradə SARIYEVA
