“Azad edilmiş torpaqlarda ixtisaslar üzrə, o bölgələrin potensialına uyğun olaraq peşə məktəbləri yaradılmalıdır”. Bunu Prezident İlham Əliyev mayın 27-də Türkiyə Respublikasının milli təhsil naziri Ziya Selçuku qəbul edərkən deyib.
Dövlət başçısı bildirib: “Azərbaycan, dediyim kimi, bu gün böyük quruculuq işlərinin astanasındadır və həm azad edilmiş torpaqlarda, həm də bütün ölkə üzrə yeni təhsilli kadrların hazırlanması çox böyük önəm daşıyır. Ona görə azad edilmiş torpaqlarda ixtisaslar üzrə, o bölgələrin potensialına uyğun olaraq peşə məktəbləri yaradılmalıdır. Əlbəttə ki, biz Türkiyə tərəfinin dəstəyinə ümid edirik”
Prezident peşə təhsili ilə bağlı yeni ideya verdi. Ekspertlər hesab edirlər ki, ölkə başçısının yeni ideyası tamamilə reallığa söykənir və bu istiqamətdə görülməli olan işlərin yol xəritəsini verir.
“Cənab Prezident bu ideyanı, tezisi irəli sürməklə həm də təhsil ictimaiyyəti qarşısında yeni bir vəzifə qoyur”
Gənc Alim, Aspirant və Magistrlər Cəmiyyətinin rəhbəri, fizika-riyaziyyat üzrə fəlsəfə doktoru İlqar Orucov baki-xeber.com-a şərhində bildirdi ki, Prezident İlham Əliyevin azad edilmiş ərazilərdə peşə məktəblərinin yaradılması ilə bağlı verdiyi bu ideya, tezis çox vacibdir: “Prezidentin irəli sürdüyü bu tezis olduqca əhəmiyyətlidir, ölkə başçısının çıxışında yer alan bu tezislərdə azad edilmiş ərazilərimizdə təhsil infrastrukturunun yaradılması, eyni zamanda, “ağıllı kənd”, “ağıllı şəhər”, “ağıllı qəsəbə” konsepsiyasının əsasında “ağıllı məktəb” qurmaq ideyası ehtiva edilir. Hesab edirəm ki, azad edilmiş ərazilərimizdə peşə məktəblərinin yaradılması çox vacibdir. Biz işğaldan azad edilmiş rayonların təhsil şöbələrinin müdirlərinin iştirakı ilə bir müşavirə keçirdik və həmin ərazilərdə yaradılacaq bütün məktəblərin qurulması, eyni zamanda, Şuşada Qarabağ Universitetinin yaradılması məsələsini müzakirə etdik. Həmçinin də işğaldan azad edilmiş ərazilərdə peşə məktəblərinin yaradılması çox böyük fayda verəcək. Bu peşə məktəbləri həmin bölgələrin iqtisadiyyatının tələblərinə cavab verə biləcək ixtisaslar üzrə yaradılmalıdır. Bütün bunların olduqca faydalı olduğu qənaətindəyəm. Sözügedən bölgələr, əlbəttə, yenidən qurulacaq, abadlaşacaq və bizim üçün çox önəmlidir ki, azad edilmiş bölgələrdə təhsil infrastrukturunu da yenidən quraq və Azərbaycanda yeni nümunələr yaradaq, inkişaf etdirək. Bu gün azad edilmiş ərazilərdə xüsusən də peşə məktəblərinin yaradılması məsələsində imkanlar daha genişdir”.
İ.Orucov hesab edir ki, azad edilmiş ərazilərimizdə yaradılacaq peşə məktəblərində Azərbaycanın iqtisadiyyatına uyğun kadrlar hazırlanacaq. “Prezidentin bu ideyası bizə imkan verir ki, həmin yerlərdə bu tip məktəbləri yaradaq, inkişaf etdirək. Xüsusən də elə məktəblər qurmalıyıq ki, müasir tələblərə cavab versin, Azərbaycan iqtisadiyyatının, əmək bazarının çağırışlarına uyğun kadrlar hazırlaya bilsin. Nəzərə alsaq ki, bu peşə məktəblərində formalaşan kadrlara ciddi ehtiyac var, bu baxımdan məhz cənab Prezidentin bu istiqamətdə ortaya qoyduğu iradə olduqca doğrudur. Cənab Prezident bu ideyanı, tezisi irəli sürməklə həm də təhsil ictimaiyyəti qarşısında yeni bir vəzifə qoyur ki, həmin bölgələrdə yaradılacaq peşə məktəblərini necə qurmaq olar, hansı istiqamətlər üzrə kadrlara ehtiyac var. Bunu analiz etmək, müəyyənləşdirmək lazımdır. Peşə təhsili sahəsində dünyada olan qabaqcıl təcrübəni tətbiq etməklə bu sahəni inkişaf etdirməliyik. Əlbəttə, bu peşə məktəblərinin yaradılması baş tutacaq. Azərbaycan özünün yeni bir inkişaf mərhələsinə qədəm qoyur və o inkişafda təhsilin yeri, rolu, mövqeyi çox doğru olaraq müəyyənləşdirilir. İşğaldan azad olunmuş rayonlarda da xüsusilə təhsillə bağlı ölkənin birinci şəxsinin, ali siyasi rəhbərinin ortaya qoyduğu bu mövqe qısa müddətdə reallaşacaq və biz bölgələrimizi təhsilli bölgələrə çevirəcəyik. Fikrimcə, işğaldan azad edilmiş ərazilərimiz qabaqcıl təhsil ənənəsinə malik olan bölgəyə çevriləcək” - deyə İ.Orucov qeyd etdi.
İradə SARIYEVA
