Azərbaycan Qızıl Aypara Cəmiyyətinin regional bölməsinin vəzifəli şəxslərinin qanunsuz hərəkətləri ilə bağlı cinayət işi başlanıb. Bu barədə Baş Prokurorluğun Mətbuat xidmətindən məlumat verilib.
Bildirilib ki, Azərbaycan Qızıl Aypara Cəmiyyətinin Bərdə rayon bölməsinin vəzifəli şəxsləri tərəfindən qanunsuz hərəkətlərə yol verilməsi barədə daxil olmuş məlumat əsasında Baş prokuror yanında Korrupsiyaya qarşı Mübarizə Baş İdarəsində ilkin araşdırma aparılmaqla 25.05.2021-ci il tarixdə Cinayət Məcəlləsinin 311.3.2-ci maddəsi ilə (rüşvət alma külli miqdarda törədildikdə) cinayət işi açılıb. Aparılan ilkin istintaqla Azərbaycan Qızıl Aypara Cəmiyyətinin Bərdə rayon bölməsinin sədri İsmayılov Xanlar Xeyrulla oğlunun 2012-ci ildən işlədiyi müddət ərzində ünvanlı sosial yardım almaları üçün qanunvericiliklə müəyyən edilən tələbin - rəsmi iş yerinin olmasının təmin edilməsi ilə əlaqədar ona müraciət edən müxtəlif şəxslərin adlarını işçi kimi rəsmiləşdirmək qarşılığında sonuncuların əmək haqqı kartlarını özündə saxlamaqla, həmin əmək haqqı kartlarına daxil olan vəsaiti hər ay nağdlaşdıraraq külli miqdarda pul vəsaitini rüşvət qismində təkrarən almasına əsaslı şübhələr müəyyən edilib. Hazırda cinayət törədən şəxslərin dairəsinin müəyyən edilməsi və məsuliyyətə cəlb olunması istiqamətində əməliyyat-istintaq tədbirləri davam etdirilir.
Çox maraqlıdır, ola bilərmi ki, hansısa qurumun yerli bölməsində korrupsiya olsun, ancaq baş idarə buna bulaşmasın?
Hüquqşunas Mehman Muradlı “Bakı-Xəbər”ə açıqlamasında bildirdi ki, bu faktda daha çox rüşvətdən söhbət gedir: “Korrupsiya ilə rüşvətə yanaşma bir qədər fərqlidir. Rüşvət regional idarələrdə rəhbərliyin xəbəri olmadan da baş verə bilər. Korrupsiya isə strukturlar arasında olur. Yəni bunu hansısa fərdin ucqar bir nöqtədə edə bilməsi mümkün deyil. Prokurorluğun yaydığı rəsmi bəyanatdan məlum olur ki, bu proses 2012-ci ildən vüsət alıb. Yəni bir regional bölmədə 10 ilə yaxın müddətdə belə vəziyyət hakimdirsə, deməli, burada baş idarənin də təqsiri var. Desələr ki, xəbərimiz yoxdur, onda sual olunur: hara baxırdılar? Yox, xəbərləri olubsa, deməli, korrupsiyanın bir vinti sayılırlar. Bu cür məsələyə biz sırf hüquqi aspektdən yanaşmalıyıq. Çünki rəsmi məlumatda bildirilir ki, həmin istiqamətdə əməliyyat istintaq tədbirləri davam edir. Buna görə də, biz istinaqın gedişini qabaqlamayaq. Baş prokuror yanında Korrupsiyaya qarşı Mübarizə Baş İdarəsində çox təcrübəli müstəntiqlər var. Əminəm ki, bu işdə təqsiri olanların hər biri məsuliyyətə cəlb ediləcək. İstənilən halda, əsasən yardım paylamaqla məşğul olan bir qurumda bu cür halların yaşanması biabırçılqdır. Buna görə Qızıl Ayparanın baş idarəsi, hüquqi ilə yanaşı, həm də mənəvi məsuliyyət daşıyır. Burada diqqət çəkən məqam odur ki, faktiki olaraq adamların adlarını formal olaraq yazıb, onların pullarını kart vasitəsilə mənimsəyirmişlər. Bu məsələ artıq mərkəzləşmiş bir korrupsiya piramidasının olmasından xəbər verir”.
Məhəmmədəli QƏRİBLİ
