Məlum olduğu kimi, ötən ilin noyabr ayından etibarən “Təzə bazar” fəaliyyətini dayandırdı. Həmin bazarda çalışan sahibkarların bir qismi bəzi ticarət obyektlərinə yönləndiriliblər. Belə ki, “Təzə bazar” özəl şirkətə məxsus olduğundan, orada icarəyə yer götürərək ticarətlə məşğul olan sahibkarlar şirkət tərəfindən 3 yerə köçürülüblər.
Sahibkarların bir qismi müvəqqqəi olaraq keçmiş “Qarabağ” mehmanxanasının yerində tikilmiş “EuroHome”a, bir qismi “Təzə bazar”la üzbəüz “AF Center”ə, bir qrupu isə “AfkomPlaza” ticarət mərkəzinə köçürülüb. Bir qisim sahibkarın iki il ərzində bazarın yerində inşa ediləcək ticarət mərkəzində yeni mağazalarla təmin ediləcəyi bildirilir. Təkliflə razılaşmayan 35 mağaza sahibi isə artıq bir neçə aydır narazılıqlarını müxtəlif hökumət qurumları qarşısında qaldırır.
Vaxtilə həmin bazarda çalışanlar mayın 25-də etiraz aksiyası keçiriblər. Onlar bildirirlər ki, bir neçə ay əvvəl sökülmüş ticarət mərkəzindəki obyektləri bazar qiymətlərinə uyğun dəyərləndirilməyib. Həmçinin, sahibkarlara əlavə kompensasiya da verilməyib.
Qeyd etdiyimiz kimi, “Təzə bazar” artıq 8 aya yaxındır ki, fəaliyyət göstərmir. Səbəb isə yeni sahibkarın bazar ərazisini almasıdır. Sahibkarlar bildirirlər ki, 700-ə yaxın dükanın olduğu bazar ərazisinə 35 dükan sahibi yeni mülkiyyətçi kimi oraya buraxılmır. Özəl şirkət bazarın darvazalarını bağlayıb.
“700-ə yaxın dükanın olduğu bazar ərazisinə 35 dükan sahibi yeni mülkiyyətçi kimi oraya buraxılmır”
Sahibkar Fikrət Babayev qeyd edir ki, bazarda onların özəl mağazası qalıb: “Əlimizdə qanuni sənədlərimiz olsa da, mağazalarımızı boşaldıblar və qapısını bağlayıblar. Hamı ailə dolandırır. Bizim yeganə qazanc yerimiz idi. Bura mənim şəxsi əmlakımdır, amma heç bir xəbərdarlıq etmədən, kompensasiya vermədən bağlayıblar”.
Sahibkarlar onu da vurğulayırlar ki, hökumət qurumlarına müraciət etsələr də, xeyri olmayıb, müsbət cavab almayıblar.
Son olaraq qeyd edək ki, “Təzə bazar” Bakı şəhərinin ən qədim bazarlarından biri hesab edilir.
Günel CƏLİLOVA
