Vətən sevdalı oğullar vətən ömürlü olurlar. Vətən yaşadığı müddətcə onların adları da yaşayır. Vətənin hər künc-bucağında bir şəhidin izi olur. Vətənin köksündə uyuyan oğulların son sözləri də "Vətən" olur. Ona görə də şəhidlərə vətən ömürlülər deyirəm. Həmin vətən ömürlü oğullardan biridir Həmidağa. Özünü dərk etdiyi zamandan "Vətən" deyişi ilə ürəkləri riqqətə gətirirdi. Hələ uşaq yaşlarından hər kəs onun böyüyüb bir hərbçi olacağını deyirdi. Kapitan rütbəsinə qədər yüksələn şəhid Hüseynzadə Həmidağanı daha yaxından tanıyaq.
Hüseynzadə Həmidağa Bağı oğlu 13 avqust 1990-cı ildə Bakı şəhərində anadan olmuşdu. İlk təhsilini Nəsimi rayonu 54 N-li tam orta məktəbdə almışdı. Orta məktəbi bitirdikdən sonra hər zaman marağında olduğu hərbçi peşəsinə yiyələnmək üçün müvafiq addımlar atır. 2008-ci ildə Həmidağa Azərbaycan Ali Hərbi Məktəbinə (AAHM) daxil olur. 2008-2012-ci illərdə hərbi təhsilini xüsusi fərqlənmələr ilə bitirir. Daha sonra Təlim Tədris Mərkəzində (TTM) hərbi bacarıqlarını dərinləşdirir. İlk olaraq təyinatla Ağcəbədi rayonunda yerləşən N saylı hərbi hissədə xidmətə başlayır. Könüllü olaraq Xüsusi Təyinatlı Qüvvələrin seçimlərinə qatılır. Həmidağa XTQ kurslarını da uğurla keçmişdi. Hər zaman atdığı addımlarla öndə olmağı və işindəki məsuliyyəti nəzərə alınaraq təcrübəsini daha da artırmaq üçün Türkiyə və Gürcüstana kurslara göndərilmişdi. Həmin kursları da fərqlənmə ilə bitirən Həmidağa leytenant hərbi rütbəsi ilə XTQ-nin tərkibində ordu sıralarında xidmətini davam etdirmişdi.
Nəinki Həmidağanın, ümumilikdə Azərbaycan Ordusunun ilk qalibiyyəti kimi tarixə düşən Aprel döyüşlərinin qəhrəmanlarından biri kimi adını 2016-cı ildə tarixə yazmışdı. Həmin döyüşlərdə Lələtəpə yüksəkliyinin düşmən tapdağından azad olunmasında mübarizə aparmış, böyük şücaət göstərmişdi. Nümunəvi xidmətinə görə Azərbaycan Respublikasının Prezident İlham Əliyevin sərəncamı ilə medala layiq görülmüşdü. Xidməti dövründə "Hərbi xidmətdə fərqlənməyə görə" 3-cü dərəcəli medalı, "Qüsursuz xidmətə görə" 3-cü dərəcəli medalı , "Azərbaycan Ordusunun 95 illiyi" yubiley medalı və "Azərbaycan Ordusunun 100 illiyi" yubiley medalı ilə təltif olunmuşdu.
Həmidağa həyat dolu, mehriban, şən bir insan idi. Sevinci ətrafını isidirdi. Hər kəsə qarşı xoşrəftar davranması onu daha çox sevdirirdi. O da sevirdi. Ailəsini, vətənini sevən Həmidağa yarını da hədsiz sevirdi. Bir də körpə Həmidəsini sevirdi. Sevmək nə ki? Həmidəyə düşkün idi. Cəmi üç ay atalıq sevincini yaşaya bildi Həmidağa. Həmidəsi doğulan gün neçə-neçə arzuları qəlbində yer etmişdi gənc atanın. Həmidəsinin ilk gülüşünü, ilk addımını, ilk "ata" deməyini xəyal etmişdi. Ancaq o bu arzuların heç birinə çata bilmədi. Həmidəsinin əllərini 3 ayında buraxıb getdi. Həmidəyə isə atasından şəkillər, bir məzar və azad vətən əmanət qaldı.
Həmidağa nümunəvi bir zabit idi. Hər bir atdığı addımı onun nə qədər vətənsevər və cəfakeş bir oğul olduğundan xəbər verirdi. Elə həmin addımların sayəsində Həmidağa 2015-ci ildə baş leytenant hərbi rütbəsinə, 2019-ci ildə isə kapitan hərbi rütbəsinə yüksəlmişdi. Şəhidlik məqamına isə 2020-ci ildə yüksəlmişdi. Aprel döyüşlərində təməli qoyulan Zəfər 2020-ci ildə Vətən müharibəsi zamanı bütün Azərbaycanı ağuşuna aldı. Həmin o zəfərin müjdəçilərindən biri də Həmidağa oldu. II Qarabağ müharibəsi zamanı çətin relyefə malik olan Murovdağ uğrunda xüsusi rəşadət göstərdi. Həmin ərazidə düşmənin bir neçə postunu aldıqdan sonra 28 sentyabrda yaralı dostunu xilas etmək istəyərkən düşmənin snayperdən açdığı atəşə tuş gəlir. Vətən sevdalı qəhrəman vətən uğrunda canını qurban verir…
Qəhrəman şəhidimiz oktyabrın 2-də Vətən uğrunda can verən şəhidlərin uyuduğu ll Fəxri xiyabanda torpağa tapşırılıb. Vətənimin qürur məqbərəsi olan xiyaban Vətənimin dəyərinin bariz nümunəsidir.
Kapitan Hüseynzadə Həmidağa Bağı oğlu şəhadətindən sonra Azərbaycan Respublikasının Prezidenti İlham Əliyev tərəfindən "Qarabağ" ordeni, "Vətən uğrunda" medalı və "Kəlbəcərin azad olunmasına görə" medalı ilə təltif edilib.
ŞƏHİD HƏMİDAĞA
Səninlə doğulan vətən sevgisi,
Səninlə böyüdü mərd Həmidağa.
Ən böyük arzundu qədəm qoyasan,
Vətəndən gen düşən o Qarabağa.
Hələ arzulara ümid işığı,
Aprel döyüşündə düşdü qəhrəman.
Sənin tək mərdlərin şücaətiylə,
Yaşadı zəfəri vətənim o an.
Azad olmasa da onda Qarabağ,
Azadlıq toxumu düşdü torpağa.
Daha qəhrəmanlar dözə bilməzdi,
Vətən sinəsini sızladan dağa.
İntiqam zamanı çatdığı zaman,
Oğullar qorxmadan məğrur dayandı.
Murovun bəmbəyaz qarlı zirvəsi,
Şəhid qanlarıyla al rəng boyandı.
Manya SƏXAVƏTQIZI
