İlham Əliyevin Zəngəzur dəhlizi üzərində iş getdiyi və Qarabağa heç bir statusun verilməyəcəyi haqda son çıxışında dediyi fikirlərdən sonra Xankəndidəki separatçıların bədbinliyi bir az da artıb. Artıq bir sıra separatçılar anlamağa başlayıblar ki, bundan sonra əvvəlki status-kvonu geri qaytarmaq mümkün olmayacaq.
Bu baxımdan separatçı “parlamentin” “deputatı” Arzik Mkitaryan erməni mediasına açıqlamasında mövcud vəziyyəti belə təsvir edir: “Ermənistan-Azərbaycan sərhədinin gündəmdə olduğu vaxt Qarabağ məsələsindən söhbət gedə bilməz. Bakı bu ərazilərin Azərbaycana məxsus olduğunu davamlı olaraq söyləyir, Ermənistandan isə heç bir reaksiya görmürük. Bu gün “Artsax”ın sərhədləri yoxdur, Azərbaycanın hərbi karvanı “Artsax”dan keçib Kəlbəcərə gəlir, erməni əhalinin gözləri önündən keçib Şuşaya yük daşıyırlar. Bu onu təsdiqləyir ki, artıq Qarabağda bizim sərhədimiz yoxdur. Ermənistanda da artıq bizim gələcəyimiz gündəmdə deyil. Əhali problemlər içindədir və heç kim kömək etmir”.
Erməni mənbələrin Xankəndidə baş verənlərlə bağlı daha bir informasiyası diqqət çəkir. Məlumatlara görə, baş separatçı Araik Arutyunyan “hərbçilərlə” görüşərək, “ordu”nun ixtisara salınması məsələsini müzakirə edib.
Bir sözlə, görünən odur ki, Qarabağdakı separatçı tör-töküntülər arasında hər keçən gün məyusluq və inamsızlıq daha da artır.
“...separatçıların gözləntilərini heçə endirir”
Məsələyə münasibət bildirən Yeni Yol Partiyasının sədri Ramil Hüseynovun sözlərinə görə, bəzi separatçı ünsürlər proseslərin onların xeyrinə cərəyan etmədiyinin fərqindədirlər: “Ancaq bunu bütün separatçılara şamil etmək olmaz. Çünki onların bir qismi Rusiya sülhməramlılarının Qarabağda mövcudluğuna bir ümid yeri kimi baxır. Lakin o da məlumdur ki, əvvəlki imkanlar əhəmiyyətli şəkildə əldən çıxıb və bir də geri qayıtmayacaq. Söhbət ondan gedir ki, Dağlıq Qarabağın ətrafında yerləşən rayonlar işğaldan azad edilib. Dağlıq Qarabağın 30 faizi Azərbaycanın nəzarətindədir. Keçmiş Hadrut rayonu tamamilə, Xocavənd rayonunun isə 50 faizi ordumuzun nəzarətindədir. Şuşanın strateji əhəmiyyətini də geniş izah etməyə ehtiyac yoxdur. Üstəlik, Dağlıq Qarabağla Ermənistan arasında heç bir hava əlaqəsi yoxdur. Əvvəllər Laçın və Kəlbəcər işğal altında olduğu üçün ermənilər rahat şəkildə helikopterlərdən istifadə edirdilər. Artıq dekabrdan üzü bəri bu imkan da əldən çıxıb. Necə deyərlər, Xocalı hava limanı “başına döyə-döyə” qalıb.
Digər tərəfdən, Rusiya tərəfi bəyan edirdi ki, 10 noyabr razılaşmasından sonra 50 mindən çox erməni Qarabağa qayıdıb. Ancaq çox keçmədi ki, sözügedən rəqəmlərin şişirdildiyi ortaya çıxdı. Bu günlərdə Prezident İlham Əliyev bəyan etdi ki, Qarabağda yaşayan ermənilərin real sayı 30 min nəfərdir. Erməniləri Qarabağda saxlamaq üçün böyük maliyyə resurslarına ehtiyac var. Belə bir imkan da Ermənistanda yoxdur. Çünki bu ölkə uzun illərdir dilənir. Xarici yardımlar da əvvəlki kimi deyil. Məsələn, ermənilər ABŞ-dan 100 milyon umurdular, əvəzində 5 milyon dollar tulapayı aldılar. Təbii ki, bu və digər məsələlər separatçıların gözləntilərini heçə endirir. Bu da onlar arasında ciddi ruh düşkünlüyünə səbəb olur”.
Partiya sədri hesab edir ki, Azərbaycan bütün vasitələrlə separatçıların təcrid edilməsinə çalışmalıdır.
Vidadi ORDAHALLI
