Azərbaycan azsaylı ölkələrdəndir ki, COVID-19 pandemiyasının dünyada yaratdığı çətinliklərə baxmayaraq, ölkə rəhbərliyi vətəndaşların rahat yaşaması üçün vacib olan bütün sosial məsəllərin həllinə çalışır, insanların həyat səviyyəsi günbəgün yaxşılaşır. Ən çox xalqı narahat edən Qarabağ problemi idi ki, o da qələbəmizlə başa çatdı. İndi dövlətin bütün resursları insanların maddi rifah halının yüksəlməsinə yönəldib.
Lakin eyni sözləri Lerik rayonu haqqında demək olmur, çünki rayon rəhbərlərinin yarıtmaz idarəçiliyi üzündən əhalini çətin vəziyyətə salan problemlər hələ də qalır.
Uzun illərdir rayon mərkəzindən kəndlərə ictimai nəqliyyat işləmir. Marşrut avtobusların yoxluğu indi burada ən ciddi məsələdir. Bundan istifadə edən ara sürücülər camaatı olmazın əzablara düçar edir, bir manatlıq yolu on beş manata gedirlər.
Hamarat rayonun ucqar dağ kəndi olsa da, dövlət tərəfindən buraya rahat asfalt yol çəkilib. Marşrutun yoxluğu üzündən isə hamaratlılar yoldan istifadə edə bilmirər. Özbaşına yolu zəbt edən ara sürücülər elə qiymət deyirlər ki, bu da məhdud maddi imkanlı insanlara heç cür sərf etmir. Ən dözülməzi odur ki, bu vəziyyətlə rayonda maraqlanan yoxdur, nəzarətsiz taksi fəaliyyəti göstərənlər isə öz bəd əməllərdən utanıb çəkinmirlər.
Kənd sakini Bəxticamal Kərimov deyir:- Çox pis günə qalmışıq. İndi rahat yolumuz ola-ola bir yerə çıxa bilmirik. Kənddə avtobus işləmir. Daha doğrusu, sovet dağılanı rayonda bütün avtobuslar yığışdırıldı, bizim marşrutumuz da həmçinin. Bu da dünyada analoqu olmayan bir işdir. Hazırda nəqliyyat sarıdan vəziyyətimiz ağırdır. Kənddən bir yerə çıxa bilmirik. Sadəcə kəndlərə 30 ildən sonra avtobus xətlərinin bərpasını istəyirik. Bir də ki, dövlət ətək-ətək pul xərcləyib bizlərə asfalt yol çəkib. Ara sürücülər bu rahat yolu əlimizdən alıblar.
Lerikdə olan bu acınacaqlı vəziyyət respublikanın heç yerində yoxdur. Amma bu, rayon rəhbərlərin heç vecinə də deyil...
Zəfər ORUCOĞLU Azərbaycan Jurnalistlər Birliyinin üzvü
