Koronavirusun ilk dalğasının ötən il Azərbaycanda peyda olması ilə son illərin ən gəlirli biznes sahəsi – toyların keçirilməsi dayandı. Daha toy keçirmək olmaz. Uzaqbaşı 5-6 nəfər yaxın ailə üzvü ilə kiçik bir toplantı təşkil edə bilərsən. Artıq bir ildən çoxdur ki, ölkədə toyların keçirilməsinə icazə verilmir.
Şadlıq evləri toyların keçiriləcəyi günə icazə verilməsini səbrsizliklə gözləyirlər. Koronavirus infeksiyasına yoluxma sayının azalması şadlıq ev sahiblərini sevindirir. Onlar hesab edirlər ki, virusa yoluxma sayı azalırsa, deməli, toylar keçirilə bilər. Hətta əksər şadlıq evi toyların keçiriləcəyi ilə bağlı hazırlıqlara da başlayıb. Ancaq restoran sahibləri düşünmürlər ki, virus tam şəkildə yox olmayana qədər ölkədə toy, yas və digər insanların kütləvi toplaşdığı mərasimlər keçirilməməlidir.
Adil Qeybulla: “Şadlıq evləri, yəni qapalı yerlərdə xəstə insanın infeksiyanı başqalarına yaymaq təhlükəsi artmış olur”
Həkim, professor Adil Qeybullanın sözlərinə görə, bütün hallarda, məhdudiyyətlər lazımdır: “Karantin dövründə belə məhdudiyyətlər daha yaxşı olar. Xüsusən restoranlar, şadlıq evləri, yəni qapalı yerlərdə xəstə insanın infeksiyanı başqalarına yaymaq təhlükəsi artmış olur. O baxımdan, müvəqqəti olaraq toyların, ad günlərinin və başqa məclislərin ertələnməsi yaxşı olardı”.
Həmsöhbətimiz onu da əlavə etdi ki, karantin zamanı bəzi addımların məcburi, bəzilərinin tövsiyə xarakteri daşıması normaldır: Ancaq restoran, şadlıq evi kimi yerlərdə tədbirlər təxirə salınmalıdır. Müvəqqəti olaraq 5-10 və daha artıq insanın bir yerdə toplanıb tədbir keçirməsi yasaqlanmalıdır. Bu, ekstremal vəziyyətdir. İnfeksiya aradan qalxanadək etmək olar”.
Aytəkin Kamranqızı: “Təmtəraqlı toy modellərinin üstündən xətt çəkə bilməyənlər...”
Sosioloq Aytəkin Kamranqızı qeyd etdi ki, indiki dövrdə kütləvi toy şənliklərinə başlamaq qeyri-mümkündür: “Önümüzdəki aylarda yüzlərlə insanın iştirak edəcəyi toy tədbirlərinə qayıtmaq mümkün deyil. Məlumdur ki, artıq dünyada və ölkəmizdə peyvəndləmə aktiv şəkildə aparılsa da, virusun yeni növlərinin yayılmasının qarşısını almaq üçün müəyyən qaydalara riayət etməyin vacibliyi vurğulanır”.
Həmsöhbətimiz onu da əlavə etdi ki, karantin bitəndən sonra bir müddət şadlıq saraylarında toy məclislərinin keçirilməsi dayandırılmalıdır: “Yaxşı olar ki, gələcəkdə şadlıq saraylarında, eləcə də rayonlarda təşkil olunan “palatka” toylarında dezinfeksiya tədbirləri gücləndirilsin. Toylar keçirilərkən müəyyən məhdudiyyətlər tətbiq etmək olar. Məsləhətdir ki, qonaq sayı azaldılsın. Bununla yanaşı, insanların özündə də daxili mədəniyyət olmalıdır. Qızdırması, soyuqdəyməsi olan, hətta adi qripə yoluxmuş xəstə insanlar məclislərə qatılmamalıdırlar”.
Həmsöhbətimiz onu da əlavə etdi ki, insanlar başa düşməlidirlər ki, yer üzündə yeni era başlayıb: “Biz iki ilə qədərki toy modelinə qayıda bilmərik. Virusun biri bitib, digəri gələcək və infeksiyalı illərimiz ömrümüzün sonuna qədər davam edəcək. Ona görə də təhlükəsizliyimizi qorumalıyıq. Təmtəraqlı toy modellərinin üstündən xətt çəkə bilməyənlər gerizəkalılıq edirlər. O toy bitdi. Toy süfrəsinə, sadəcə olaraq, müxtəlif növ şirniyyat və şirələr qoyula bilər. Pandemiya dövründə tibbi nöqteyi-nəzərdən toylarda xüsusi nəzarətçi və ya polis əməkdaşı da cəlb edilə bilər. Onlar toy zamanı karantin qaydalarını pozan şəxsləri elə oradaca cərimələyə bilərlər və biz bunu qəbul edərik. Bununla davranış nümunələrimizi öyrənmiş olarıq və toyda təhlükəsizliyimiz qorunar. Biz buna məcburuq, başqa yolumuz yoxdur”.
Günel CƏLİLOVA
