“Trend” İnformasiya Agentliyi və Türkiyənin “Albayrak Media Group”u ilə birgə yaradılan TURKİC.World (Türk Dünyası) adlı ilk rəqəmsal layihənin təqdimatı keçirilib. “Trend”-in məlumatına görə, təqdimat mərasimində Azərbaycan və Türkiyə media qurumlarının rəhbərləri, Türkiyənin və digər türkdilli ölkələrin səfirləri, diplomatlar, millət vəkilləri və digər qonaqlar iştirak edib.
İlk dəfə həyata keçirilən lahyihənin məqsədi Türkdilli ölkələrin ortaq tarixi, dini, mədəni və ana dili dəyərlərini əsas götürərək Türk dünyasının həmrəy kommunikasiya platformasını yaratmaq və kontenti birbaşa informasiya mənbəyinə çevirilməkdir.
Bildiyiniz kimi, bu il fevralın 18-də, Prezident İlham Əliyev “Azərbaycan Respublikası ilə Türkiyə Respublikası arasında media sahəsində strateji əməkdaşlıq haqqında” Anlaşma Memorandumunu təsdiqləyib.
Memorandumun hazırlanması məqsədi ilə Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin rəhbərlik etdiyi nümayəndə heyəti Türkiyəyə səfər edib.
Səfərin əsas məqsədi Azərbaycanla Türkiyə arasında birgə media platforması yaratmaq, o cümlədən, hər iki ölkənin sosial media vasitəsilə dünyada daha yaxından tanıdılması olub.
Səfər çərçivəsində Türkiyə Prezident Administrasiyasının İctimaiyyətlə Əlaqələr İdarəsinin rəhbəri Fəxrəddin Altun, bir sıra dövlət və media qurumlarının rəhbər şəxsləri ilə görüşlər keçirilib, ortaq media platformasının qurulması yolları müzakirə olunub.
Eyni zamanda, aprelin 10-da Bakıda Türkdilli Dövlətlərin Əməkdaşlıq Şurasının (Türk Şurası) informasiya və media üzrə məsul nazirlərinin, yüksək vəzifəli rəsmilərinin üçüncü toplantısında türkdilli dövlətlər arasında əlaqələrin inkişaf etdirilməsi istiqamətində lazımi işlərin görüldüyü bildirilib.
Həmçinin, ölkəmizin türkdilli dövlətlərlə əməkdaşlığın inkişafı məqsədilə yol xəritəsi hazırladığı qeyd olunub. Bununla yanaşı, tədbir zamanı İnformasiya və kommunikasiya sahəsində əməkdaşlığın genişləndirilməsinin qarşıda duran prioritet istiqamətlərdən biri olduğu vurğulanıb.
Türkdilli ölkələr arasında əlaqələrin dərinləşməsi həm Cənab Prezident İlham Əliyevin, həm Türkiyə Prezidenti Cənab Rəcəb Tayyib Ərdoğanın, həm də digər türkdilli ölkə rəhbərlərinin diqqət mərkəzindədir. Bu qardaş ölkələr arasında həyatımızın bir çox səhələrində münasibətlərin daha da inkişaf etdirilməsində ortaq media platformasının yaradılması xüsusi əhəmiyyət daşıyır.
Qeyd olunanları nəzərə alaraq, türkdilli ölkələr arasında ortaq media platofmasının yaradılması ideyasına öz töhfəmizi vermək qərarına gəldik. Bu məqsədlə, bu gün Trend İnformasiya Agentliyi Türkiyənin “Albayrak Media Group”u ilə birgə yaradılan TURKİC.World (Türk Dünyası) adlı ilk rəqəmsal layihəyəni (https://turkic.world) təqdim edib.
Layihənin unikal proqram təminatı layihənin daha da təkmilləşməsinə və yaradılan rəqəmsal platformaya digər türkdilli ölkələrin də media qurumlarının qoşulmasına imkan verir. Rəqəmsal platformanın mobil versiyası da mövcuddur. Mobil versiya gələcəkdə bütün platformanın inkişafı və təkmilləşməsinin əsasını təşkil edəcək.
Eyni zamanda, unikal proqram təminatımız sayəsində gələcəkdə türkdilli ölkələrin media qurumları öz ölkələri ilə bağlı xəbərləri rus, ingilis və digər dillərdə sayta yerləşdirə biləcəklər.
Layihənin daha da inkişaf edərək Türkdilli ölkələr arasıda media sahəsində körpü olacağına ümid edirik.
İnanılmaz bir qardaşlıq var - Türkiyə səfiri
Haqq səsimizin dünyaya çatdırılmasında media böyük önəmə sahibdir. Türkiyənin Azərbaycandakı səfiri Cahit Bağçı təqdimat mərasimində çıxışı zamanı deyib.
Səfir bildirib ki, Qarabağda gedən mücadilə zamanı həqiqətlərin dünyaya çatdırılmasında media mühüm rol oynadı.
C.Bağçı vurğulayıb ki, Türkiyə və Azərbaycan arasında inanılmaz bir qardaşlıq var: “Qarabağ zəfərində Türkiyə ilə Azərbaycan arasında qardaşlıq, “bir millət, iki dövlət” vurğusu daha da önə çıxdı. Biz bundan sonra bu qardaşlığı, münasibətləri inkişaf etdirməliyik və media da burada ən önəmli bir vasitədir. Trend İnformasiya Agentliyi və “Albayrak Media Group”u tərəfindən yaradılan bu platforma böyük əhəmiyyətə malikdir. Siz birlikdə gözəl bir iş görürsünüz və bu, inkişafımız üçün yol xəritəsinə mühüm töhfə verəcək. Biz də bu istiqamətdə sizə dəstək göstərməyə hazırıq. Sizi bu münasibətlə təbrik edirəm”.
Bu həmrəylik bizi gaha da ruhlandırdı - Əhməd İsmayılov
Türkiyə və Azərbaycan dünya çapında bir-birinə yaxın müttəfiqlərdir. Medianın İnkişafı Agentliyinin icraçı direktoru Əhməd İsmayılov təqdimat mərasimində çıxışı zamanı belə deyib.
O bildirib ki, Azərbaycan və Türkiyə bütün məsələlərdə bir yerdədir: "Bu gün dünyada bir-birinə bizim qədər yaxın olan dövlət yoxdur. Çünki bizi birləşdirən qədim tariximiz var. Biz bir kökün, bir soyun daşıyıcılarıyıq".
İcraçı direktor vurğulayıb ki, 44 günlük Vətən müharibəsində Azərbaycana Türkiyə qədər dəstək olan ölkə olmayıb. Media nümayəndələri, qardaş ölkənin jurnalistləri dayanmadan döyüş bölgələrindən reportajlar hazırlamaqla haqq səsimizi dünyaya çatdırdılar. Bu həmrəylik bizi daha da ruhlandırdı və bizə əlavə güc verdi. Hərbi, siyasi, iqtisadi, mədəni, təhsil, ticarət sahələrində olduğu kimi, media əlaqələrimizin də daha dərindən və əhatəli inkişafı prioritet hədəfimizdir. Burada ən əsas amil birgə atacağımız addımlardır. Ölkələrimizin rəhbərlərinin verdiyi qərarlarla ötən ilin sentyabr ayında Prezidentin köməkçisi, xarici siyasət məsələləri şöbəsinin müdiri Hikmət Hacıyevin rəhbərlik etdiyi və bizim də tərkibində olduğumuz nümayəndə heyəti qardaş ölkənin mediası ilə birgə media platforması yaratmaq, hər bir ölkənin sosial mediası vasitəsilə dünyaya daha yaxından tanıdılması məqsədilə İstanbula səfər edib. Səfər çərçivəsində hər iki ölkə arasında ortaq media platforması yaradılması ilə bağlı qərar qəbul edildi. Cəmi bir neçə ay sonra isə Azərbaycanla Türkiyə arasında media səhəsində strateji əməkdaşlıq haqqında memorandumun qəbul edilməsi haqqında qanun layihəsi təsdiqləndi. Bununla da Azərbaycanla Türkiyə arasında birgə media platformasının yaradılması təsdiq edildi".
Türkiyə ilə Azərbaycan arasında medianın inkişafının yeni bir mərhələsi başlayır - Əflatun Amaşov
Bu gün Türkiyə ilə Azərbaycan arasında medianın inkişafının yeni bir mərhələsi başlayır və mən burada hər kəsə uğurlar arzulayıram. Mətbuat Şurasının sədri Əflatun Amaşov təqdimat mərasimində çıxışı zaman deyib.
Ə.Amaşov bildirib ki, Türkiyə hər zaman Azərbaycanın yanında olub: “Azərbaycan həqiqətlərinin dünyaya çatdırılmasında Türkiyə mediasının böyük rolu var. 44 günlük Vətən müharibəsində də Türkiyə mətbuatı Azərbaycan həqiqətlərinin dünya ictimaiyyətinə çatdırılmasına böyük önəm verdi. Hesab edirəm ki, bu gün təqdimatı keçirilən bu sayt türk dünyasında media əlaqələrinin genişləndirilməsinə mühüm töhfə verəcək, türk dünyasının inkişafında bu saytın önəmli rolu olacaq”.
Baki-xeber.com
