Sosial şəbəkələrdə Sabirabad rayonunda yerləşən şəhid Əhmədağa Səmədov adına Narlıq kənd tam orta məktəbinin görüntüləri yayılıb. Görüntülərdən aydın olur ki, bərbad vəziyyətdə olan məktəbin əsaslı təmirə ehtiyacı var.
Narlıq kənd tam orta məktəbi ilə bağlı Təhsil Nazirliyindən bildirildi ki, məktəbin tikintisi məsələsinə növbəti ilin dövlət investisiya proqramında baxılacaq.
Sabirabad Rayon Təhsil Şöbəsi - Pəhlivan Qarayev: “Məktəbin tam şəkildə təmir olunması nəzərdə tutulub”
Sabirabad Rayon Təhsil Şöbəsinin müdiri Pəhlivan Qarayev “Bakı-Xəbər”ə açıqlamasında qeyd etdi ki, məktəbin əsaslı təmirə ehtiyac var: “Məktəbin tam şəkildə təmir olunması nəzərdə tutulub. Bu haqda Təhsil Nazirliyinin də məlumatı var. Hətta Rayon İcra Hakimiyyəti də bu haqda məlumatlıdır. Məktəbin əsaslı şəkildə təmir olunması plandadır”.
Kamran Əsədov: “Hazırda bölgələrdə qəzalı vəziyyətdə olan və hər an uçma təhlükəsi altında olan məktəblər var”
Təhsil eksperti Kamran Əsədov bildirdi ki, hazırda ölkədə 4447 ümumtəhsil məktəbi var. Bu isə o deməkdir ki, 900-a yaxın məktəbin yenidən tikilməsinə və ya bərpasına ehtiyac var: “Təəssüflər olsun ki, bu sahədə iş müəyyən qədər zəif aparılır. Hazırda bölgələrdə qəzalı vəziyyətdə olan və hər an uçma təhlükəsi ilə üzləşən məktəblər var. Bu isə insanların həyatı üçün olduqca təhlükəlidir. Danılmaz faktdır ki, ölkə rəhbərliyi təhsilə çox ciddi qayğı və diqqət göstərsə də, müəyyən qədər aidiyyəti dövlət qurumları bu sahəyə səhlənkar yanaşırlar. Mətbuatda hər hansı bir məsələ işıqlandırıldıqdan sonra həmin problemin həlli istiqamətində iş görülməsi təmin edilir. Tək Sabirabad rayonunda yerləşən şəhid Əhmədağa Səmədov adına Narlıq kənd tam orta məktəbi deyil, eynu zamanda, Neftçalada 6, Xaçmaz, Quba, Qusar ərazisində qəzalı vəziyyətdə olan məktəblər var. Bu məktəblərin problemlərinin az maliyyə ilə həll olunması üçün modul tipli məktəb layihələrindən istifadə edilməlidir. Hesab edirəm ki, ölkəmizdə modul tipli məktəblərin sürətlə inşası həyata keçirilərsə, uşaqlar yaxşı şəraiti olan təhsil müəssisələrində təhsilini davam etdirərlər”.
Həmsöhbətimiz onu da əlavə etdi ki, tədrisin keyfiyyətinə birbaşa məktəbin infrastrukturu təsir göstərir. Bugün qəzalı vəziyyətdə olan məktəblərin yetirmələrinin nəticəsi elə də yüksək deyil. Bu istiqamətdə dövlət proqramını daha da genişləndirmək lazımdır.
Günel CƏLİLOVA
