"Torpaqlarımızı alıb gəlmişik, öz torpağımı zəbt ediblər. Tanımadığım insanlar gəlib İcra Hakimiyyətindən, Xocəsən Bələdiyyəsindən icazə alaraq, orada qanunsuz tikili ucaldıblar. Halbuki, o torpaq mənimdir". Bu sözləri, Binəqədi Rayon İcra Hakimiyyətinin qarşısında özünü yandırmağa cəhd edən İkinci Qarabağ və Aprel döyüşlərinin iştirakçısı Şahid Şahlarzadə deyib.
O bildirib ki, dəfələrlə Binəqədi Rayon İcra Hakimiyyətinə də müraciət etsə də, heç bir tədbir görülməyib: "Polis orqanları, Xocəsən bələdiyyəsi, icra orqanları torpağımı zəbt edənlərin tərəfini saxlayırlar".
Şahid Şahlarzadə ona məxsus olan torpaq sahəsinin zəbt edilməsi ilə bağlı müraciətlərinin cavabsız qalmasına etiraz olaraq, yanında gətirdiyi yanıcı maddə ilə özünü yandırmağa cəhd edib.
İkinci Qarabağ müharibəsi iştirakçısı Şahid Şahlarzadənin başına gələn hadisə ilə bağlı aidiyyəti qurumlarla əlaqə saxladıq.
Binəqədi Rayon İcra Hakimiyyəti: “...İcra Hakimiyyətinin başçısı və məsul əməkdaşları tərəfindən bir neçə dəfə qəbul edilərək dinlənilib”
Binəqədi Rayon İcra Hakimiyyətindən bildirildi ki, Ağsu rayonunun Ərəbsərvan kəndində qeydiyyatda olan vətəndaş Şahlarzadə Şahid Şahzadə oğlu Binəqədi Rayon İcra Hakimiyyətinin başçısı və məsul əməkdaşları tərəfindən bir neçə dəfə qəbul edilərək dinlənilib: “Qəbul zamanı vətəndaş tərəfindən təqdim edilmiş sənədlərin araşdırılması zamanı müəyyən edilib ki, Xocəsən Bələdiyyəsinin 07/27 saylı, 11.05.2005-ci il tarixli qərarına əsasən, İsrafilov Halay Adil oğluna ayrılmış 600 kv.m. torpaq sahəsi onun adından sənədləşmə işlərinin aparılması məqsədilə Qarayeva Gülbari Mirhəsən qızına səlahiyyətlərini etibar edib. G.Qarayeva isə 12 mart 2021-ci il tarixdə Halay İsrafilovun adından torpaq sahəsinin sənədləşdirilməsi işlərinin aparılması məqsədilə səlahiyyətlərini Şahlarzadə Şahid Şahzadə oğluna etibar edib. Araşdırma nəticəsində məlum olub ki, Şahlarzadə Şahid Şahzadə oğlunun iddia etdiyi torpaq sahəsi Binəqədi rayonu, Hökməli qəsəbəsinin sakini Həsənağa adlı şəxs tərəfindən qanunsuz zəbt edilməklə tikinti işlərinin aparılmasına cəhd göstərilib və yerli səviyyədə nəzarət tədbirləri zamanı qarşısı alınıb.
Hazırda Həsənağa adlı şəxs tərəfindən torpaq sahəsinin zəbt edilməsi faktı ilə və vətəndaş Ş.Şahlarzadənin müraciəti əsasında Binəqədi Rayon Polis İdarəsinin 40-cı Polis Bölməsində ilkin araşdırma aparılır”.
Xocəsən Bələdiyyəsi - Nigar Məmmədova: “Bizlik bir məsələ yoxdur”
Xocəsən Bələdiyyəsinin sədri Nigar Məmmədova bildirdi ki, bu məsələ Binəqədi Rayon İcra Hakimiyyəti tərəfindən həll olunub: “Bizlik bir məsələ yoxdur”.
Günel CƏLİLOVA
