Vətəninin hər qarış torpağını öz canından əziz bilən, İkinci Qarabağ müharibəsində haqq savaşımızda şəhidlik zirvəsinə ucalan Elvin Əfrail oğlu Əzizovdan danışmaq istəyirəm. Masallı rayonunun Qarğalıq kəndində dünyaya göz açmış bu Vətən sevdalısı ömrünün 34 ilində yazdığı tarixlə böyük bir xalqın qürur, iftixar yerinə çevrildi. İndi cismən aramızda olmasa da, adı yolunda can qoyduğu Vətənlə birgə çəkilir. Masallıda böyük də, kiçik də Elvini doğma yurda sədaqət mücəssəməsi kimi qəlbində əzizləyir.
Elvin qəlbində Vətən məhəbbəti, xalq sevgisi orta məktəbi başa vurur. Yaxşı əməlləri hesabına artıq cəmiyyətdə hörməti olan bu yeniyetmə 2004-cü ildə ordu sıralarına gedir. Ön cəbhədə xidmət edir, dəfələrlə yağı düşmənlə qarşı-qarşıya gəlir, onun layiqli cavabını verir. Vətənini göz bəbəyi kimi qorumaqla müqəddəs əsgəri borcunu şərəflə yerinə yetirir. Ədalətsiz Azərbaycan torpaqlarına təcavüz etmiş erməni dığalardan qisasını almaq məqsədilə həyatını hərbiyə bağlayır. Gizir kursunu keçib MAXE rütbəsində Vətənə xidmətinə davam edir. Və zamanı gələndə məkrli düşməndən sona qədər döyüşərək işğal edilən hər qarış torpağın, öldürülən hər bir azərbaycanlının qisasını alacağına and içir.
Bəli, xidmət vaxtı fəallığına, nümunəvi davranışına, təlim-tərbiyəsinə, vətənpərvər olduğuna görə daima adı öndə çəkilir. Bütün təlimlərə ürəklə qatılır, daha çox öyrənir. Elvinə etimad göstərib tank komandiri seçirlər. Bunlarla bərabər, içində qarşısıalınmaz bir hiss Vətən sevdalısını həmişə düşməndən qisas almağa çağırır.
İkinci Qarabağ müharibəsi başlanan andan Elvin Vətənin harayına birinci yetişir. Füzuli uğrunda gedən döyüşlərdə sinəsini yanar od edib düşmənin bağrını çatladır. İdarə etdiyi tankla dığalara sarsıdıcı zərbələr vurmaqla şanlı zəfərimizin başlanğıcını qoyur. Özü qəhrəmancasına şəhid olsa da, mərdliyi, igidliyi qələbə naminə əsgərlərə böyük stimul verir. ..
Elvinin qəlbi Vətənlə döyünürdü. Elə Vətən torpaqların azadlığı naminə də qəlbini Vətənə verdi... Dövlət də ölümündən sonra gizir Elvin Abbasovun müharibə meydanında göstərdiyi şücaəti “Vətən naminə” medali ilə uca tutdu. İndi igid Vətən oğlunun halal ocağında iki qız, bir oğlan uşağı böyüyür. Sözsüz ki, onlar da ataları kimi Vətənə bağlı olacaqlar.
Zəfər ORUCOĞLU Azərbaycan Jurnalistlər Birliyinin üzvü
