Şəkərli diabet endokrin sistemin xəstəliyi olub, tam və ya nisbi insulin çatışmazlığı nəticəsində qanda qlükozanın xroniki artımı ilə müşahidə olunur. Diabetdə karbohidratların, zülalların və yağların mübadiləsi pozulur. Diabetli xəstələrin sayı xüsusilə də inkişaf etmiş ölkələrdə durmadan artır. Ölkəmizdə də bu xəstəlikdən əziyyət çəkənlərin sayı artır.
Adıçəkilən xəstəlikdən əziyyət çəkənlərə insulin verilir.
Ancaq son günlər insulinin verilməsi azalıb. Belə ki, poliklinikalarda insulin xəstələrə limitlə verilir.
Şikayətçi Ella Qəhrəmanova: “İnsulin xəstəyə limitlə verilir”
Ağstafadan olan şikayətçi Ella Qəhrəmanova bildirdi ki, o, insulin əldə etməkdə çətinlik çəkir: “Azərbaycanda şəkərli diabet xəstələrinin insulin limitinin azaldılması hökumətin qərarı ilə olub, yoxsa hansısa korrupsioner məmurun istəyidir? Hər ay poliklinika həkimindən 2 flakon “İnsularatd”, “Actrapid” insulinlərini almışam. Bir neçə gün əvvəl həkimə gedəndə, sadəcə, 1 flakon verib deyiblər ki, bizlik deyil, Bakıdan belə tapşırıblar. Poliklinika həkiminin sözlərinə inanmayıb, baş həkim İlham Sofiyevin qəbuluna getdim. O da hansısa kağızı əlində yelləyərək imkanın olmadığını və Bakıdan gələn göstərişlə dərmanların azaldığını dedi.
Bəllidir ki, insulin aptekdə satılmır. Xəstə necə müalicə olunsun? Aptekdə satılmır, poliklinika da limitlə verir. Biz nə edək?”.
Adil Qeybulla: “İnsulinin xəstələrə verilməsi limitsiz olmalıdır”
Məsələ ilə bağlı fikir bildirən professor, tibbi ekspert Adil Qeybulla qeyd etdi ki, insulinin xəstələrə verilməsi limitsiz olmalıdır: “Şəkərli xəstələrlə bağlı Dövlət Proqramı icbari sığortanın paketinə daxil olub. Hesab edirəm ki, şəkərli diabet xəstələrinə insulinin limitlə verilməsi düzgün qərar deyil. Xəstə növbəti insulini necə əldə etməlidir? İcbari sığorta paketində qeyd olunmalı idi ki, şəkər xəstələri üçün insulinin verilməsi bura daxil deyil. O zaman aidiyyəti qurumlar və xəstələr nə edəcəklərini bilməli idilər. O da məlumdur ki, insulin aptekdə satılmır. Xəstəyə dəstək olmaq əvəzinə, ona veriləcək dərmanı kəsmək düzgün deyil”.
Günel CƏLİLOVA
