“Araz supermarket" Məhdud Məsuliyyətli Cəmiyyəti cərimələnib. Protokol Bakı Şəhəri Binəqədi Rayon Məhkəməsinə baxılması üçün göndərilib. İş hakim Vüqar Məmmədovun icraatındadır.
MMC-yə protokol İnzibati Xətalar Məcəlləsinin 447.0.2-ci (saxlama müddəti ötmüş məhsulların satılmasına görə) maddəsi ilə tərtib olunub. Görürük ki, “Araz”ın vaxtı keçmiş malı satması ilə bağlı məlumat konkret fakta söykənir. Maraqlıdır ki, köhnəlmiş məhsulların satışı ilə hansısa kiçik bir dükan yox, hər yerdə filialları olan böyük marketlər şəbəkəsi məşğul olur. Burdan hansı nəticəni çıxara bilərik?
Məsələ ilə bağlı “Araz supermarket" Məhdud Məsuliyyətli Cəmiyyətinin ictimiayyətlə əlaqələr departamentindən hər hansı bir məlumat almaq cəhdlərimiz alınmadı.
Azad İstehlakçılar Birliyinin sədri Eyyub Hüseynov “Bakı-Xəbər”ə açaıqlamasında bildirdi ki, bu məsələ ilə bağlı həyəcan təbilini o dəfələrlə çalıb: “Bu faktı yalnız bir marketlər şəbəkəsinə aid edə bilmərik. Fakt budur ki, hər gün 10 tonlarla ərzaqın yararlılıq müddəti keçir, lakin onların sonrakı taleyi məlum olmur. Burada Lomonosovun maddənin itirilməsi qanunu yada düşür: “Heç nə itirilmir, heç nə yox olmur, yalnız bir haldan başqasına keçir”. Əslində, həmin mallar satışdan dərhal çıxarılmalı, ictimai nəzarətin iştirakı ilə məhv edilməlidir. Təəssüf ki, vaxtı keçən bir çox malın sonrakı taleyi məlum olmur. Bir çox hallarda marketlər həmin malı istehsalçıya və ya distribüterə qaytarır. Onlar da bir çox hallarda malların yararlılıq tarixini dəyişir və yenidən satışa qaytarır. Buna görə də Azərbaycan Birləşmiş Millətlər Təşkilatının (BMT) ərzaq hesabatında çox tullantı atan ölkə hesab olunur. Təbiidir ki, istelakçının istəyinə uyğun olmayan mal tullantıya çevrilmiş olur. Qida Təhlükəsizliyi Agentliyi bu işi elə qurmalıdır ki, hər gün vaxtı keçmiş məhsullar məhv etməyə və ya başqa sahəyə yönəldilsin. Bunun üçün mexanizm də təklif edirəm. Xüsusi proqram var. Həmin proqramın köməyilə malların kodları yerləşdirilir bazaya. Həmin proqram eyni zamanda inteqrasiya edilir QTA-nın serverinə. Qurum öz ofisində oturub görür ki, hansı məhsulun vaxtı nə vaxt keçəcək. Buyursunlar, market sahibləri istehlakçılara olan səmimiyyətlərini ortaya qoysunlar. Həmin proqramı yükləsinlər öz satış şəbəkələrinə. Bu olsa, heç bir market əhaliyə vaxtı keçmiş malı sata bilməyəcək. Bunu etmək o qədər də çətin deyil. Marketlər könüllü keçmirlərsə, qoy əlaqədar qurumlar bu işlə məşğul olsunlar”.
Məhəmmədəli QƏRİBLİ
