Dərslərin yenidən bəpra edildiyi bir vaxtda Bakıda 13 məktəbdə tədris yenidən dayandırılıb. Buna səbəb isə həmin məktəblərdə təmir işlərinin aparılmasıdır.
Məlumat üçün bildirək ki, Bakıda yerləşən 17,71,95,106,114,126,137,146, 269, 299,307,321 və 322 saylı orta məktəblərdə təmirlə əlaqədar dərslər dayandırılıb.
Maraqlıdır, bu təhsil müəssisələrində təmir işlərinin aparılması niyə yay tətilinə saxlanılmayıb? Dərslərin yenicə başladığı vaxtda məktəbin təmirə görə bağlanması nə dərəcədə düzgündür?
269 saylı tam orta məktəb - Fəridə Nağıyeva: “Məktəb 2012-ci ildə əsaslı təmir olunmasına baxmayaraq, sonradan bu təhsil ocağının yenidən təmir olunmasına qərar verilib”
Məsələ ilə bağlı adıçəkilən orta məktəblərlə əlaqə saxladıq. 269 saylı tam orta məktəbin təsərrüfat işləri üzrə direktor müavini Fəridə Nağıyeva bildirdi ki, məktəbdə 1800-dən çox şagird təhsil alır: “Təmir işlərinə mayın 7-dən başlanıb. Məktəb 2012-ci ildə əsaslı təmir olunmasına baxmayaraq, sonradan bu təhsil ocağının yenidən təmir olunmasına qərar verilib. Məlumat üçün qeyd edim ki, məktəbdə təmir işləri 2 aya yaxın müddətdə davam edəcək”.
17 saylı orta məktəb - Nazilə Əliyeva: “Məktəbin sanitar qovşaqları yararsız vəziyyətdə olduğu üçün təhsil müəssisəsi təmirə dayandırılıb”
Əhmədli qəsəbəsində yerləşən 17 saylı orta məktəbin direktoru Nazilə Əliyeva bildirdi ki, məktəbin sanitar qovşaqları yararsız vəziyyətdə olduğu üçün təhsil müəssisəsi təmirə dayandırılıb: “Turbalar partladığı üçün sanitar qovşaqlar bağlanmalı idi. Şagirdlər əllərini yumaq üçün çölə çıxmalı deyil ki? Bu səbəbdən də məcbur olduq ki, məktəb təmirə dayansın. Biz bu barədə valideynlərə məlumat vermişik”.
Təhsil Nazirliyi: “Təmir işləri yekunlaşana kimi həmin məktəblərin şagirdləri distant təhsilə davam edəcəklər”
Məsələ ilə bağlı Təhsil Nazirliyindən bildirdilər ki, sözügedən məktəblərdə təmir işlərinə aprel ayında məktəblər bağlandıqdan sonra start verilib və hələ də davam edir. Təmir işləri yekunlaşana kimi həmin məktəblərin şagirdləri distant təhsilə davam edəcəklər.
Günel CƏLİLOVA
