Hər il olduğu kimi, bu il də bağ evlərinin kirayə qiymətində bahalaşma müşahidə olunur. Ancaq məsələ ondadır ki, Bakı və Abşeron ətrafındakı bağ evlərinin kirayə qiymətlərində kəskin artım müşahidə olunur.
Burada diqqətçəkən məqam ondan ibarətdir ki, əvvəlki illərdən fərlqi olaraq, son iki ildə bağ evlərinin qiymətlərindəki artım daha böyük rəqəmlərlə ifadə olunur. Yəni qiymətlər dəfələrlə artıb. Hansı ki, əvvəlki illərdə illik qiymət artımı 20-30 faiz arasında dəyişirdisə, indi bu, artıq dəfə ilə ölçülür. Məsələn, əvvəllər 500 manata təklif olunan kirayə bağ evlərinin qiyməti hazırda bazarda 1500-2000 arasında dəyişir. Eyni vaxtda 2-3 ailənin dincəlməsi üçün şəraiti olan fərdi yaşayış evlərinin qiymətləri daha yüksəkdir. Elə bağ evləri var ki, onların bazarda aylıq kirayə qiyməti 10-15 min arasında təklif olunur.
Nəzərə alsaq ki, pandemiya ilə əlaqədar iqtisadi fəallıq aşağı düşüb, insanların gəlirləri azalıb, o zaman bağ evlərindəki kirayə qiymətlərinin bu dərəcədə kəskin bahalaşma nə ilə əlaqədardır?
“Digər tərəfdən, əvvəlki illərdən fərqli olaraq, həyət evlərində yaşamağa maraq və münasibət də dəyişib”
Sözügedən məsələ ilə bağlı fikirlərini “Bakı-Xəbər”lə bölüşən millət vəkili Vüqar Bayramovun fikrincə, bağ evlərində kirayə qiymətlərinin bu cür bahalaşacağı gözlənilən idi: “Həm kirayə mənzillərin, həm də bağ evlərinin bu cür bahalaşacağı gözlənilən idi. Çünki problem ondadır ki, pandemiya səbəbindən xaricə gediş-gəlişin səviyyəsində azalmalar var. Adətən, insanlar xaricə səfər edib istirahət edirdilər. Məlum səbəblərdən belə bir imkan yoxdur. Bu səbəbdən ötən yaydan başlayaraq bağ evlərində qiymətlər kəskin artmağa başladı. Çünki xarici turist səfərlərinin məhdudlaşması yayda bağ evlərinə tələbin kəskin artmasına səbəb oldu. Tələbin artması avtomatik olaraq qiymətlərin kəskin artmasına səbəb oldu. Ona görə də bunun başlıca səbəbi tələbin kəskin artmasıdır. Çünki bağ evini kirayə götürmək istəyən ailələrin sayında nəzərəçarpacaq dərəcədə artım var. Bu, bir tərəfdən, pandemiyanın təsirləri ilə bağlıdırsa, digər tərəfdən, son dövrlər vətəndaşların bu evlərə olan marağının artması ilə əlaqədardır. Çünki əvvəlki illərdən fərqli olaraq, həyət evlərində yaşamağa maraq və münasibət də dəyişib. Məhz bağ evlərində yaşamağa üstünlük verənlər artıb. İnsanlar şəhərin səs-küyündən uzaq olmağa çalışırlar. Bu da, istər-istəməz, qiymətlərə öz təsirini göstərir”.
Millət vəkili hesab edir ki, bahalaşmanın bir qədər də davam edəcəyi gözlənir.
Vidadi ORDAHALLI
