Azərbaycanda 3 ayda 3 mindən çox ailə dağılıb. Bildirilənə görə, bu ilin ilk üç ayında Ədliyyə Nazirliyinin rayon (şəhər) qeydiyyat şöbələrində 10 334 nikah və 3 704 boşanma halı qeydə alınıb.
Dövlət Statistika Komitəsindən mətbuata verilən məlumata görə, əhalinin hər 1000 nəfərinə düşən nikahların sayı 4,2, boşanmaların sayı isə 1,5 olub.
Azərbaycanda 3 ay ərzində 3 mindən artıq ailənin dağılmasına səbəb nə ola bilər?
Bir çox mütəxəssisin yanaşmasına görə, ailələrin dağılmasında əsas səbəb pandemiya və onun doğurduğu problemlərdir. Mütəxəssislərin bir qismi hesab edir ki, pandemiya üzündən insanların bir hissəsinin işini itirməsi, nəticədə də evdə daha çox vaxt keçirməsi bu kimi neqativ halın artmasına gətirib çıxarır. Pandemiya dövründə boşanma hallarının əksər ölkədə yüksələn templə getdiyini deyən ekspertlərin fikrincə, insanlarda yaranan psixoloji böhran da bu kimi hallara yol açır.
“Cəmiyyətin həm sosial, həm də psixoloji vəziyyəti gərginliyin pik həddindədir”
Sağlam Toplum Hərəkatının sədri Lalə Mehralı “Bakı-Xəbər”ə bildirdi ki, tək bizim ölkədə deyil, dünya təcrübəsinə əsasən də hazırkı pandemiya vəziyyəti ailədaxili təzyiqlərin və boşanmaların artmasına təkan verib. “Yəni karantin rejimi ailədəki problemləri daha da qabardıb. Tərəflərin bir evin içində daha çox vaxt keçirməsi xarakterlərin bir-birinə uyğun gəlib-gəlmədiyini üzə çıxarır. Cəmiyyətin həm sosial, həm də psixoloji vəziyyəti gərginliyin pik həddindədir. Beyni məişət qayğıları ilə yüklənmiş insan xoşbəxt ola bilmir. İndi 20-30 il əvvəlki kimi, uşaqların xətrinə ailəni dağıtmamaq məsələsi əhəmiyyətli deyil, tərəflər anlaşmırlarsa, yola getmirlərsə, problemi məhkəmədə həll edirlər.
Təbii ki, işsiz qalan pandemiya qurbanlarının maddi gəlirinin azalması da əlavə problemlərin yaranmasına səbəb olur, ailə maddi çətinlik yaşayanda tərəflər dözümlülük göstərmirlər.
Təəssüflə demək məcburiyyətindəyəm ki, evliliklərin böyük nisbətinin maddi çıxarlar üzərində baş tutduğunu nəzərə alsaq, karantin rejimində həmin cütlüklərin bir çox uyğunsuzluqları meydana çıxır. Yəni daha samanlıq seyranlıq olmur. “Pulun gözü kordur” misalı boşuna deyilməyib yəni”.
L.Mehralı hesab edir ki, karantin rejimi bitdikdən sonra da kütləvi boşanmaların baş verməsi gözləniləndir. “Lakin yaxşı olardı ki, bu çətin günlərdə tərəflər bir-birinə güzəştlər etsinlər, ilk mübahisədə, ilk çətinlikdə boşanmaq asandır, amma ailə qurmaq çətindir” - deyə ekspert qeyd etdi.
İradə SARIYEVA
