Yevlaxda şəhid ailələri və Qarabağ müharibəsi əlilləri üçün tikilən binada işıq, qaz və su sayğaclarının qoyulmaması sakinlərin narazılığına səbəb olub. Bu ilin yanvar ayında həmin evlər sakinlərə verilsə də, onlar sadaladığımız problemlərə görə öz evlərinə köçə bilmirlər. Mənzillərə köçənlər isə əziyyət çəkirlər.
Qeyd etdiyimiz kimi, Yevlaxda şəhid ailələri və Qarabağ müharibəsi əlillərinə təqdim edilən binada kommunal problem yaşanır.
Məlumat üçün bildirək ki, bu ilin yanvar ayında Yevlaxda Bakı prospekti 10A ünvanında 22 nəfərə çoxmənzilli binadan mənzillər verilib. Hazırda həmin mənzillərə elektrik, qaz və su boruları çəkilsə də, sayğacların quraşdırılmaması səbəbindən sahibləri ora köçə bilmirlər.
Qeyd edək ki, bu kimi problemlər bir neçə dəfə yaşanıb.
Maraqlıdır, bu tip kommunal problemlər niyə həll edilmir?
''Azəriqaz'' İstehsalat Birliyi - Ceyhun Səfərov: “Həmin binaya qaz xətti çəkilib”
''Azəriqaz'' İstehsalat Birliyinin mətbuat katibi Ceyhun Səfərov bildirdi ki, həmin binaya qaz xətti çəkilib. Qurum rəsmisi deyir ki, layihədə əvvəlcə sayğaclar smart tipli olacağı göstərilsə də, sonradan podratçı şirkət bunun mexaniki sayğacla əvəz edilməsi ilə bağlı ''Azəriqaz''a müraciət edib.
''Azərişıq'' - Vaqif Aydınoğlu: “Həmin bina ilə bağlı heç bir podratçı şirkət müraciət etməyib”
''Azərişıq''ın mətbuat katibi Vaqif Aydınoğlu bildirdi ki, ümumiyyətlə, həmin bina ilə bağlı heç bir podratçı şirkət onlara müraciət etməyib.
''Azərsu'' ASC - Anar Cəbrayıllı: “Məlum ünvanda sayğacların quraşdırılması ilə bağlı mütləq qaydada podratçı şirkət tərəfindən rəsmi müraciət olmalıdır”
''Azərsu'' ASC-nin mətbuat katibi Anar Cəbrayıllı isə qeyd etdi ki, məlum ünvanda sayğacların quraşdırılması ilə bağlı mütləq qaydada podratçı şirkət tərəfindən rəsmi müraciət olmalıdır.
Günel CƏLİLOVA
