Məlumatlara görə, Xaçmaz Rayon Mərkəzi Xəstəxanasında AQTA-nın apardığı yoxlamalar nəticəsində xəstəxanada xəstələrə keyfiyyətsiz qida məhsullarının verilməsi, həmin qida məhsullarının çəkisinin şişirdilmiş şəkildə göstərilərək mənimsənilməsi və digər qanun pozuntuları aşkar edilib. Baş Prokurorluq tərəfindən toplanmış materialların öyrənilməsi nəticəsində fakta görə cinayət işi başlanıb
Baş Prokurorluğun Mətbuat xidmətindən verilən məlumata görə, Xaçmaz RMX-da AQTA tərəfindən aparılmış yoxlamalar nəticəsində həmin xəstəxanada xəstələrə keyfiyyətsiz qida məhsullarının verilməsi, həmin qida məhsullarının çəkisinin şişirdilmiş şəkildə göstərilərək mənimsənilməsi və digər qanun pozuntuları aşkar edilib.
Baş Prokurorluq tərəfindən toplanmış materialların öyrənilməsi nəticəsində fakta görə Cinayət Məcəlləsinin 179.2.3 (şəxs tərəfindən öz qulluq mövqeyindən istifadə etməklə mənimsəmə və ya israf etmə) və 308.1-ci (vəzifə səlahiyyətlərindən sui-istifadə) maddələri ilə cinayət işi başlanaraq istintaqın aparılması üçün Xaçmaz Rayon Prokurorluğuna göndərilib.
Dövlət tibb müəssisələrində, xüsusən də regionlarda faəliyyət göstərən xəstəxanalarda bu cür qanun pozuntularına necə yol verilir və bunlar niyə indi üzə çıxarılır? Xəstəxanalara verilən məhsulların keyfiyyəti nə üçün əvvəlcədən yoxlanılmır?
“Altay” Sosial-İqtisadi Araşdırmalar Mərkəzinin rəbhəri, sosioloq Elçin Bayramlı “Bakı-Xəbər”ə bildirdi ki, səhiyyə sahəsində olan problemlərin kökü dərindir: “Səhiyyə sistemində bu problem daha geniş, daha kəskindir və həm də çoxdan var. AQTA çox gec ayılıb. Demək olar ki bütün xəstəxanalarda belədir. Bu məqsədlə çox ucuz və keyfiyyətsiz məhsullar alınır, amma baha alındığı rəsmiləşdirilir. Üstəlik, əksər xəstə xəstəxana yeməyini yemir, amma sənəddə bu, istifadə olunmuş kimi göstərilir və külli miqdarda pul mənimsənilir. Bu yoxlamalar bütün tibb müəssisələrində aparılmalıdır, həm də köklü şəkildə. Dövlət büdcəsindən hər il bu məqsədlə külli miqdarda vəsait ayrılır, lakin həmin vəsait təyinatı üzrə istifadə olunmur. Dövlət pulu yerdən yığmır ki, hansısa dələduz məmurlar basıb yesinlər. Ona görə də əminəm ki, Baş Prokurorluq bu faktlar üzrə daha geniş istintaq hərəkətləri aparacaq və xeyli belə fakt ortaya çıxacaq. Həmin vəsaitləri mənimsəmiş vəzifəli şəxslər ciddi cəzalandırılmalı və mənimsənilmiş pulların dövlətə qaytarılması təmin edilməlidir. Xüsusən də icbari tibbi sığortanın tətbiqindən sonra vətəndaşlar bu xidmətlərə öz maaşlarından aylıq pul ödəyirlər. Bu halda həm vətəndaşların pulu mənimsənilir, həm də dövlət büdcəsindən ayrılan pullar. Özü də problem təkcə qida ilə bağlı deyil, dərmanlar və müalicə ləvazimatları ilə də eyni vəziyyətdir. Xəstəxanalarda pulsuz verilməli dərmanların siyahısı asıldığı halda, xəstələrə verilmir, lakin sənədlərdə verilmiş kimi qeyd edilir və külli miqdarda vəsait mənimsənilir.
Məsələnin digər tərəfinə - mənəvi aspektinə, bunun haram qazanc, vicdansızlıq və insafsızlıq olduğuna heç toxunmuram, çünki bunlar üçün həmin anlayışlar heç bir məna kəsb etmir. Üstəlik, bizdə ictimai qınaq da yoxdur, əksinə, insanlarımız tərəfindən xalq və dövlət malını mənimsəyib talayan şəxslərə böyük hörmət göstərilir. Onlar da bundan, necə deyərlər, həvəslənirlər. Yalnız ağır cəzalar belələrini bu cinayətlərdən çəkindirə bilər. Buna görə də müvafiq dövlət orqanları belə müəssisələrə ciddi nəzarət etməli və belə hallara görə cəzaları ağırlaşdırmalıdırlar. Həmin şəxslər həbs olunmalı və əmlakı tam müsadirə edilməlidir. Hər hansı bu tip problemin yeganə həlli yolu budur. Başqa yolu yoxdur, ola da bilməz” - deyə ekspert qeyd etdi.
İradə SARIYEVA
