Müasir yaşam tərzi ömrümüzü qısaldır desək, yanılmarıq. Son dövrlərin xəstəliklərinin statistikasına nəzər yetirsək, görərik ki, əksəriyyətinin yaranma səbəbi oturaq həyat tərzidir.
Dövrün tələbinə uyğun olaraq, insanların çoxu gününün əsas hissəsini kompyuter qarşısında oturmaqla keçirir. Bu isə, öz növbəsində, sağlamlığa mənfi təsir edir. Belə ki, insanlar çoxmərtəbəli binalarda liftdən, evdən işə, işdən evə gedəndə isə ya şəxsi avtomobillərindən, ya da ictimai nəqliyyatdan istifadə edirlər. Hətta ən qısa məsafəni belə yeriməyə ərinirlər. Piyada gəzmək istəmirlər. Bunlar da, təbii ki, nəticə etibarilə müəyyən problemlər yaradır.
Mütəxəssislər bu kimi halların qarşısını almaq üçün bəzi məsləhətlər verirlər. Bu məsləhətlər içərisində velosiped sürmək də var.
Qeyd edək ki, Azərbaycanda velosiped yolunun hazırlanması, bu istiqamətdə müəyən işlərin görülməsi üçün ölkə başçısı İlham Əliyevin xüsusi tapşırığı var. Belə ki, Prezident İlham Əliyevin 27 dekabr 2018-ci il tarixli Sərəncamı ilə təsdiq edilmiş "Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı" var. Həmin proqramda qeyd olunur ki, 2019-2023-cü illərdə avtomobil yollarında və küçə-yol şəbəkəsində velosiped zolaqlarının və duracaqlarının yaradıla biləcəyi ərazilər müəyyən edilməlidir.
Eyni zamanda, “Əhalinin sağlamlığının qorunması haqqında” Azərbaycan Respublikasının Qanununun 3-cü maddəsinə əsasən, əhalinin sağlamlığının qorunması sahəsində dövlətin vəzifələrindən biri ətraf mühitin qorunmasının, ekoloji təhlükəsizliyin təmin edilməsidir.
Onu da qeyd edək ki, bu günlərdə ölkəmizdə keçirilən VI “Qlobal Yol Təhlükəsizliyi Həftəsi”nə dair tədbirdə Bakı Nəqliyyat Agentliyinin (BNA) İdarə Heyətinin sədri Vüsal Kərimli bildirib ki, Bakı şəhərində velosiped zolaqlarının inkişafı konsepsiyası həm Bakının Baş Planında, eyni zamanda da BNA-nın strateji inkişaf planında öz əksini tapıb.
BNA sədri qeyd edib ki, Bakı şəhərində də velosiped nəqliyyatının inkişaf etdirilməsi, insanların bu nəqliyyat növündən istifadəsinin təşviq edilməsi məqsəd qoyulub. Ümumi strateji plana görə, velosiped yollarının uzunluğu şəhərin bulvar ərazisində 7,5 km, 2027-ci ilə qədər 63,5 km, 2040-cı ilə qədər isə 251 km-ə qədər təşkil edəcək.
Maraqlıdır, Azərbaycanda velosiped sürülməsi üçün yolun 20 ilə hazır olması gec deyilmi?
“2040-cı ilə velosiped yolunun hazır olması gecdir, həmin ilə qədər elə uçan nəqliyyat vasitələri ortaya çıxar ki…”
Nəqliyyat məsələləri üzrə ekspert Ərşad Hüseynov bildirdi ki, 2040-cı ilə velosiped yolunun hazır olması gecdir: “2040-cı ilədək elə uçan nəqliyyat vasitələri ortaya çıxar ki, heç velosipedə ehtiyac qalmaz. Azərbaycanda velosipedi real nəqliyyata çevirmək lazımdır. Ölkədə velosiped sürmək üçün yerlər var. Əksər xarici ölkədə səhər evdən çıxırsan və işə velosipedlə gedirsən, axşam da velosipedlə qayıdırsan evə. Məhz söhbət bundan getməlidir”.
Həmsöhbətimiz hesab edir ki, velosiped sürənlərin təhlükəsizliyi təmin olunmalıdır: “Velosiped zolaqları, velosiped dayanacaqları və onların saxlanma yerləri ilə bağlı xüsusi işlər görülməlidir. Ona görə də yol üçün 240 km zolağımız olacaq”.
Günel CƏLİLOVA
