Son vaxtlar İrandan Azərbaycana narkotik vasitələr keçirmək cəhdləri artır. Mayın 15-də Dövlət Sərhəd Xidmətinin Sərhəd Qoşunlarının “Göytəpə’” sərhəd dəstəsinin xidməti ərazisində, Yardımlı rayonunun Gendərə kəndi yaxınlığındakı sərhəd zastavasının xidməti sahəsində 3 nəfər naməlum şəxsin dövlət sərhədini pozması aşkarlanıb.
Sərhəd pozucularının açdıqları atəş nəticəsində iki sərhədçi həlak olub. Hadisə yerində təxminən 10 kq narkotik vasitəyə bənzər maddələr aşkarlanıb. Sərhəd pozucularından biri yaxalanıb.
Dövlət sərhədinin mühafizəsinin təmin edilməsi, narkotik vasitələrin və psixotrop maddələrin qanunsuz dövriyyəsinə qarşı mübarizə sahəsində sərhəd mühafizə və əməliyyat-axtarış tədbirləri davam etdirilir. Son günlərdə Sərhəd Qoşunlarının “Horadiz” və “Göytəpə” sərhəd dəstələrinin əməkdaşlarının sayıqlığı nəticəsində təxmini çəkisi 18 kiloqram 353 qram narkotik vasitənin və 19 754 ədəd güclü təsirli maddənin qaçaqmalçılıq yolu ilə İrandan Azərbaycana keçirilməsinin qarşısı alınıb. Keçirilmiş tədbirlər nəticəsində mayın 17-də 5 nəfər saxlanıb. Onların cinayət məsuliyyətinə cəlb olunması istiqamətində əməliyyat-istintaq hərəkəti davam etdirilir. Həmçinin, cinayət halları üzrə digər əlaqədar şəxslərin axtarışı və müəyyənləşdirilməsi ilə bağlı tədbirlər həyata keçirilir.
Maraqlıdır, son günlər İrandan Azərbaycana qanunsuz narkotik keçirmək cəhdləri niyə artır? Ard-arda belə hadisələrin baş verməsinin səbəbi nədir? Bir sözlə, nə baş verir?
“...qanunsuz olaraq sərhədi keçməyə cəhd edirlər və nəticədə belə insidentlər artır”
Sözügedən məsələyə aydınlıq gətirən hüquqşünas Şəmsəddin Əliyev belə halların artmasını bir sıra amillərlə əlaqələndirdi: “Narkotik maddələrin qanunsuz dövriyyəsi mütəşəkkil cinayətkarlığın bir qoludur. Daha dəqiq desək, bu, transmilli cinayətkarlığın ən təhlükəli növlərindən biridir. Bunun qanunsuz ticarətini mütəşəkkil şəbəkələr həyata keçirirlər. Bunların ölkələrdə şəbəkələri, bank hesabları və digər arsenalları var. İrandan ona görə Azərbaycana qanunsuz narkotik keçirmək cəhdləri artır ki, həmin ölkədə qanunsuz narkoticarət artıb. Onlar Azərbaycan vasitəsilə bunu Avropaya çıxarmaq istəyirlər. Nəzərə almaq lazımdır ki, 30 ilə yaxın ərazilərimiz işğal altında olub. İranla sərhədimizin 132 kilometri ermənilərin nəzarətində idi. Uzun illər işğal olunmuş ərazilərdən tranzit məqsədilə istifadə edilib. Ərazilər azad ediləndən sonra İrandan narkotik vasitələrin keçirilməsinin qarşısı alınıb. Bu səbəbdən belə insidentlər artır. Qanunsuz olaraq sərhədi keçməyə cəhd edirlər. Nəzərə almaq lazımdır ki, İran Əfqanıstanla həmsərhəddir. Əfqanıstanda becərilən narkotik vasitələr İrana keçirilir. Narkobaronlar beynəlxalq müstəvidə bu prosesi idarə edirlər. Ona görə də qanunsuz narkoticarət bazarı bağlanmalıdır. Narkotik ticarəti gəlirliyinə görə silah və insan alverindən sonra üçüncüdür. Azərbaycan narkotik vasitələrin qanunsuz ticarətinə qarşı nə mümkündürsə onu edir. Ancaq gərək digər ölkələr də fəal olsunlar”.
Bununla belə, hüquqşünas hesab edir ki, cəzalar daha da sərtləşdirilməlidir.
Vidadi ORDAHALLI
