Məlum olduğu kimi, mayın 18-dən yeni növ koronavirus infeksiyasına qarşı peyvəndlənmə məqsədilə vətəndaşlar Rusiya istehsalı olan "Sputnik V” vaksinindən də istifadə edirlər. Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyindən verilən birgə məlumata görə, həmin vaksinin istifadəsinə Azadlıq prospekti 112 ünvanında yerləşən Bakı Sağlamlıq Mərkəzində başlanıb.
18 yaşından yuxarı olan və əks göstərişləri olmayan hər bir vətəndaş peyvənd oluna bilər.
Qeyd edək ki, "Sputnik V” vaksini artıq dünyanın 65 ölkəsi tərəfindən tanınıb.
Maraqlıdır, "Sputnik V” vaksininin nə kimi özəllikləri var?
Aydın Mirzəzadə: “Rus elminə və tibbinə inanıram, eyni zamanda, rus peyvəndinin təsirinin yalnız müsbət olacağına da əminəm"
Milli Məclisin deputatı, Yeni Azərbaycan Partiyasının üzvü Aydın Mirzəzadə bildirdi ki, koronavirusla bağlı məlumatları mütəmadi izləyir. Onun sözlərinə görə, Azərbaycanın dünyada vaksin istehsal edən şirkətlərlə sıx əməkdaşlıq etdiyi dəfələrlə qeyd olunub. Dövlət həmin vaksinlərdən ən yaxşısının alınıb ölkəyə gətirilməsində maraqlıdır: "Hesab edirəm ki, peyvəndlərin hər biri istifadəyə yararlıdır. Rusiyanın ilk vaksin hazırlayan ölkələrin sırasında olması təqdirəlayiq haldır. Məlumdur ki, Rusiyanın böyük elmi potensialı var və bu səbəbdən də Rusiya Federasiyasında peyvənd istehsalı gözlənilən idi. "Sputnik V" peyvəndinə dünyada böyük maraq göstəriləcəyinə şübhə etmirəm. Rus elminə və tibbinə inanıram, eyni zamanda, rus peyvəndinin təsirinin yalnız müsbət olacağına da əminəm".
Rasif Bağırov: “...effektivliyi 95 faizdir”
Həkim-ekspert Rasif Bağırov bildirdi ki, Rusiyanın “Sputnik V” vaksini 20 dərəcədə saxlanır. Bu vaksinin effektivliyi 95 faizdir: “Adıçəkilən vaksin artıq ölkəmizə gətirilib. Bu vaksinlə vaksinləşmə uğurla həyata keçiriləcək. Ümumiyyətlə, hazırda istifadə etdiyimiz vaksinlərlə bağlı yan təsirlər müşahidə olunmayıb”.
Günel CƏLİLOVA
