Sosial şəbəkədə istifadə etdiyimiz ətə qırmızı rəng qatılması barədə görüntü paylaşılıb. Görüntüdə göstərilir ki, marketdən alınan ətin bir hissəsi qaba qoyulur. Müəyyən müddət keçəndən sonra həmin qabda ətdən çıxan suyun rəngi marağa səbəb olub. Belə ki, qabda suyun rənginin qan rəngində deyil, bənövşə rəngində olduğu görünür. Bu isə o deməkdir ki, ətə rəng qatılıb.
Qeyd edək ki, dəfələrlə sosial şəbəkədə xarici mütəxəssislərin süni ət hazırlaması haqqında müxtəlif formada videolar yayılıb. Bir neçə gün öncə ölkəmizdə yayılan video əhali arasında narahatlığa səbəb olub.
Mütəxəssislər qeyd edirlər ki, əksər ölkədə ətin təbii görünməsi üçün süni prosedurlardan istifadə edilir.
Sevinc Hüseynova: “Əti bişirərkən tavada da bənövşəyi rəngin qaldığını gördüm”
Həkim Sevinc Hüseynova bildirdi ki, o bu günlərdə marketdən aldığı ətə rəng qatılması ilə bağlı təcrübə aparıb. Nəticə isə həkimi çaşdırıb.
S.Hüseynova qeyd edir ki, marketdən ət alıb, əti kənarda gözlədəndə çıxan suyun qan olmadığını görüb: “Özüm həkiməm və hansı rəngin, maddənin qan olub-olmadığını çox aydın başa düşə bilirəm. Əti bişirərkən tavada da bənövşəyi rəngin qaldığını gördüm. Məlumdur ki, ət bişərkən tavada bənövşəyi rəng qalmamalıdır”.
Həmsöhbətimiz onu da əlavə etdi ki, bir çox ölkədə ətin təbii görünməsi üçün süni texnologiyalardan istifadə edilir: “Lakin bunun ölkəmizdə tətbiq olunması adət-ənənələrə ziddir.
İstehlakçıların məhsulların sənədlərini tələb etmək hüququ vətəndaşları arxayınlaşdırmamalıdır. Qidaları orqanizmə göstərəcəyi təsir və nəticələri də nəzərə alınmaqla daha diqqətli seçməliyik. Çünki alternativlər çoxaldıqca, daha sağlam qidanı seçmək ehtimalımız azalır”.
Ağa Salamov: “Hətta bəzi hallarda işbazlar ətin öz rəngindən də istifadə edirlər”
Qida texnoloqu Ağa Salamov bildirdi ki, bir çox xarici ölkədə ətin xarici görkəmini dəyişdirərək onu təzə ət kimi göstərirlər: “Ətə antioksidantlar vurulur. Oksidləşməyə qarşı rənglər vurulur ki, ətin rəngi canlı kimi görünsün. Hətta bəzi hallarda işbazlar ətin öz rəngindən də istifadə edirlər”.
Eyyub Hüseynov: “İnsanlar ət alarkən daha diqqətli olmalıdırlar”
Azad İstehlakçılar Birliyinin sədri Eyyub Hüseynov qeyd etdi ki, ətə rəng vurulması artıq adi hala çevrilib: “İstehlakçılar ət alan zaman onun lazımi sənədlərini tələb etməlidirlər. Danılmaz faktdır ki, qeydiyyat sənədi olmayan malların satışı qadağandır. Həmçinin, onu da deyim ki, istehlakçıların məhsul haqqında sənəd tələb etməsi vətəndaşları arxayın salmamalıdır. İnsanlar ət alarkən daha diqqətli olmalıdırlar”.
Günel CƏLİLOVA
