Şəmkirin Ələsgərli kəndi rayonun ucqar kəndlərindən biridir. Bu kəndə gedən yolda nadir halda avtomobilə rast gəlmək olar. Problem ondadır ki, kəndin yolları olduqca bərbad olduğuna görə ora təcili yardım və yanğınsöndürən avtomobillərin gedə bilməsi çətinləşir.
Ələsgərli sakinləri deyirlər ki, kəndin yolları bərbad olduğuna görə rayon mərkəzindən ora təcili yardım maşını 50 manata, taksi isə 30-40 manata gəlir. Yol pis gündə olduğuna görə hətta yanğınsöndürən maşınların sürücüləri gəlməkdən imtina edirlər. Bununla yanaşı, kənd sakinləri yola görə baha başa gəldiyindən, əkdikləri məhsulu bazara da çıxara bilmirlər.
Kənd sakini Şahin Quliyevin sözlərinə görə, onun və qardaşının pay torpağı var: “Torpağı əkmişik, amma nə olsun? Taxılı kənddən rayon mərkəzinə aparmaq üçün 300-400 manat pul lazımdır. Bu da əkdiyim taxılın heç pulunu eləmir. Taxıldan əldə edilən pulu yolhaqqı verəcəyəmsə, onda bəs mənim gəlirim haradan olacaq?”.
Sakinlər onu da deyirlər ki, kəndə şəxsi maşınla getmək sərf etmir. Yollar pis gündə olduğuna görə tez sıradan çıxır. Kənddə əsasən 1988-ci ildə Ermənistandan qaçqın düşən şəxslər məskunlaşıblar. Sakinlər deyirlər ki, yol problemi ilə yanaşı, kəndin qaz və su problemi də var. Çünki kəndə qaz çəkilməyib. Odun əldə etmək də baha başa gəlir. Ən dəhşətlisi isə odur ki, kənddə 1883-cü ildə, yəni Nikolay dövründə tikilən məktəbin divarları uçub-dağılır. Hansı ki, bu məktəbin 100-dən artıq şagirdi var.
Məlumat üçün qeyd edək ki, Şəmkir rayonuna 2014-cü ildən 2021-ci ilin aprelinə qədər Alimpaşa Məmmədov rəhbərlik edib. O, yol verdiyi ciddi pozuntulara görə həbs olunub. Şəmkir iqtisadi imkanlarına və əhalinin zəhmətkeşliyinə görə bölgədəki digər rayonlardan seçilsə də, buna baxmayaraq, rayonda çoxsaylı sosial problem mövcuddur. Bu isə rayona rəhbərlik edənlərin nə qədər səriştəsiz olduqlarını bir daha ortaya qoyur.
“Ələsgərli kimi çoxsaylı ucqar kənd var ki, bir sıra sosial-iqtisadi problemlər məngənəsindədir”
Məsələyə münasibət bildirən ekspert Rəsul Cahangirli hesab edir ki, rayonları icra başçılarının ümidinə buraxmaq olmaz: “Şəmkir ölkənin qərbində yerləşməklə yanaşı, Ermənistanla sərhədə yaxın rayondur. Ona görə də bu rayonun kəndlərinin sosial problemlərinin həllinə xüsusi diqqət göstərilməlidir. Çünki bununla bağlı diqqət və qayğı olmadıqda kəndlərin boşalması sürətlənir. Bu da çox zərərli tendensiyadır. Ümumiyyətlə, Ələsgərli kimi çoxsaylı ucqar kənd var ki, bir sıra sosial-iqtisadi problemlər məngənəsindədir. Ona görə də problemdən çıxış yolu ucqar kəndlərlə bağlı xüsusi proqramın hazırlanmasından keçir. Məxsusən ucqar kəndlərin sosial-iqtisadi məzmunlu problemləri ilə bağlı ayrıca proqram hazırlanmalıdır. Onun həyata keçirilməsi mərkəzdən idarə olunmalıdır. Yalnız o halda Ələsgərli kimi kəndlərdə mövcud olan problemləri həll etmək olar. Elə ucqar kənd var ki, orada daşdan məktəb tikmək sərfəli deyil. Çünki əhalisi azdır. Həmin kəndlərdə modul tipli məktəblər inşa edilməlidir”.
Ekspert hesab edir ki, sistemli proqram olmadan bu cür problemlər azalmayacaq.
Vidadi ORDAHALLI
