Mayın 16-da Birləşmiş Ərəb Əmirliklərin Dubay şəhərində keçirilən “ATM 2021” (Arabian Travel Market 2021) beynəlxalq turizm sərgisində pandemiya dövründə ilk dəfə olaraq real iştirakla Azərbaycanın işğaldan azad edilmiş Qarabağ bölgəsinin, xüsusilə Şuşa şəhərinin turizm potensialı təbliğ olunub.
Bu barədə Dövlət Turizm Agentliyi məlumat yayıb.
Azərbaycan Turizm Bürosunun baş icraçı direktorunun müavini Bəhruz Əsgərov sərginin Qarabağın yeni bir turizm destinasiyası kimi tanıdılması və iştirakçıları bu haqda ətraflı məlumatlandırmaq üçün yaxşı platforma rolu oynadığını qeyd edib. O, sərgi iştirakçıları tərəfindən Qarabağ bölgəsinə böyük maraq göstərildiyini bildirib.
Pandemiya şəraitində sosial izolyasiya qaydaları nəzərə alınaraq təşkil olunan beynəlxalq sərgidə Azərbaycan 100 kvadratmetrlik sahəni əhatə edən milli stendlə təmsil olunur.
Burada işğaldan azad edilmiş ərazilərin turizm potensialı, Azərbaycanda pandemiya dövründə görülən işlər, mövcud olan və inkişaf etdirilən turizm məhsulları və yeni turizm təklifləri barədə məlumatlar təqdim olunur.
Qeyd edək ki, sərgi 19 mayadək davam edəcək.
Şuşanın turizm potensialı ilk dəfə beynəlxalq turizm sərgisində təbliğ olunub, Birləşmiş Ərəb Əmirliklərində sərgilənib.
İndiyə qədər ermənilər saysız turizm sərgisində Şuşanin turizm potensialı ilə bağlı təbliğat qurublar, bukletlər, kitablar çap ediblər, filmlər çəkiblər və sərgilərdə təqdim ediblər.
Azərbaycan tərəfindən Şuşanın turizm potensialının təbliğinə başlanması 30 illik qondarma erməni təbliğatının kökünü kəsə biləcəkmi?
“Ermənistanın saxta təbliğatını dağıtmağa...”
Turizm üzrə tanınmış ekspert Elçin Rüstəmov “Bakı-Xəbər” bildirdi ki, azad Şuşanın, bütövlükdə, azad Qarabağın turizm potensialının təbliği istiqamətində başlanan proses əhəmiyyətlidir və bu, davamlı xarakter daşımalıdır. E.Rüstəmovun sözlərinə görə, Ermənistan Qarabağı işğalda saxladığı dövrlərdə ərazilərimizi öz ərazisi kimi qələmə verərək böyük saxtakarlıqlara əl atıb. Bu gün isə Ermənistanın, ermənilərin 30 ilə yaxın bir dövr ərzində yaratdıqları mifik, saxtakar təbliğatın məhv edilməsi üçün Qarabağın turizm potensialını daha çox təbliğ etməli, Azərbaycanın öz ərazilərini işğaldan azad etdiyini əks etdirən nümunələr təqdim etməliyik: “Qeyd etdiyiniz kimi, ermənilər bu istiqamətdə də saxta təbliğatlar aparıblar. Biz özümüz də müxtəlif beynəlxalq turizm sərgilərində olarkən görürdük ki, Ermənistan işğal etdiyi ərazilərimizi öz “ərazisi”, “dədə-baba torpaqları” kimi qələmə verirdi. Hətta bir dəfə Gürcüstanda keçirilən sərgidə iştirak edərkən mən özüm Ermənistanın bu saxtakarlığına qarşı çıxmışdım. Londonda keçirilən sərgidə onların sərgilədikləri saxtakarlığa isə bizim Turizm Bürosu səviyyəsində etiraz edilmişdi. Yəni rəsmi olaraq bu barədə sərgi rəhbərliyinə müraciət edildi və ermənilərin sərgiyə təqdim etdikləri yığışdırıldı. Yəqin ki, bu barədə məlumatınız var. Biz həmişə beynəlxalq turizm sərgilərində Ermənistanın saxtalaşdırma kampaniyasına, təqdimatlarına qarşı mübarizə aparmışıq, təbii, bu gün də mübarizə aparmaqdayıq. Artıq torpaqlarımız işğaldan azad edilib və biz azad edilmiş ərazilərimizin turizm potensialını daha yüksək səviyyədə təqdim etmək imkanı qazanmışıq. Azərbaycanın azad Qarabağın turizm potensialının beynəlxalq səviyyədə təbliğinə başlaması çox müsbətdir və bu sahədə təbliğatımızı bir neçə istiqamətdə qurmalıyıq, davam etdirməliyik. Biz bunu həm sərgilərdə təqdim etməliyik, həm də diplomatik səviyyələrdə. Videoçarxlar çəkilməli, turizm potensialımız müxtəlif formalarda təqdim edilməlidir və təqdimatda bu ərazilər Azərbaycanın balansında göstərilməlidir.
Bir məsələni də qeyd edim ki, Ermənistanın saxta təbliğatını dağıtmağa bir-iki sərgi kifayət etməyəcək, ən azından, gərək bir ildən artıq bu istiqamətdə çalışaq. Çünki Ermənistan bu saxta təbliğatı 30 ilə yaxındır aparıb, hər yerdə ərazilərimizi öz adlarına qələmə veriblər. Bu təqdirdə Azərbaycanın təqdim etdiyi həqiqəti, bu ərazilərin həqiqi sahibi olduğunu insanların şüuruna yeritmək bir qədər vaxt aparacaq, amma buna mütləq şəkildə nail olacağıq. Biz bir il ardıcıl olaraq bu istiqamətdə təbliğat apara bilsək, ermənilərin saxta təbliğatını tam olaraq sıradan çıxara bilərik”.
Buna nail olmaq üçün isə sistemli təbliğat aparmalı olduğumuzu deyən E.Rüstəmovun sözlərinə görə, bu təbliğat müxtəlif dövlət qurumları, Xarici İşlər Nazirliyi, səfirliklər, diplomatik korpus səviyyəsində aparılmalıdır. O qeyd etdi ki, xarici ölkələrdə fəaliyyət göstərən səfirliklərimiz həmin ölkələrin turizm bürolarına, turizm nazirliklərinə məlumatlar göndərməli, torpaqlarımızın hazırda işğaldan azad edildiyini bildirməli, azad Qarabağın turizm potensialı haqqında məlumat verməlidirlər.
İradə SARIYEVA
