Cəlil Ağaddin oğlu Cavadov da bu işıqlı dünyaya min-min diləklə, istəklə gəlmişdi. Beşiyinin başında yuva salmış bəxtəvərlik, qayğısızlıq13 yaşında onu həyatda ən ağır sınaq qarşısında qoyur. Hər iki valideynini itirir Cəlil.
İnamlı sabahlara boylanan ümidi yaxınları, bir də anadan olduğu Lerik rayonunun Xəlifəküçə kəndinin xeyirxah insanları olurlar. Saf, gözəl əməllərdən götürə-götürə özünü dərk edən Cəlil Vətəninə, xalqına daha da ürəkdən bağlanır. O, 2003-cü ildə kənd məktəbində səkkizinci sinfi bitirib C.Naxçıvanski adına hərbi liseyə gedir. Elə Vətən sevgisi burda da Cəlili dərindən öyrənməyə sövq edir. Nizam-intizamı da hamıya nümunə göstərilir.
Liseyi müvəffəqiyyətlə başa vurub doğma Azərbaycanın daha da sadiq, etibarlı keşikçisi olmaq eşqi Cəlil Cavadovu Heydər Əliyev adına Ali Hərbi Məktəbə aparır. O, dərslərini həvəslə oxuyur, komandirlərin tapşırıqlarını sözsüz yerinə yetirir, yüksək döyüş və siyası hazırlığa malik bir kursant kimi tanınır. Seçdiyi motoatıcı ixtisasına mükəmməl yiyələnir. Ali hərbi məktəbi bitirib 2010-2011-ci illərdə Azərbaycan Silahlı Qüvvələrin Təlim-Tədris Mərkəzində İxtisasartırma kursunu da uğurla keçir. Və ən əsası, Cəlilin Vətən məhəbbəti, düşmənə amansız nifrəti onu cəbhə xəttində xidmətə səsləyir. Baş leytenant rütbəsində canından əziz tutduğu Vətənin xidmətində durur. Dəfələrə polad sinəsini irəli verib düşmən üstünə şığımağı da olur. Daim öyrənmək, əsgərlərinə qayğı göstərmək isə əsas iş prinsipinə dönür.
C.Cavadovun bacarığını, vətənpərvərliyini, qabiliyyətini görüb ona həmişə məsuliyyətli işlər tapşırırlar. Bu qəhrəman üçün Vətən, torpaq naminə özünü oda-alova vurmaq sanki xoşbəxtliyin özü olur. Vaxtından əvvəl layiq olduğu kapitan rütbəsini qazananda ürəkdən sevinir. Aldığı İkinci və Üçüncü dərəcəli “Qüsursuz xidmətə görə”, “Azərbaycan Silahlı Qüvvələrinin 95 illiyi”, eləcə də “Azərbaycan Ordusunun 100 illiyi” yubiley medalları onu daha nümunəvi xidmətə çağırır.
Bəli, hər an Vətən, millət yolunda canından keçməyə hazır olan Cəlil Cavadov İkinci Qarabağ müharibəsinə tabor komandirin müavini vəzifəsində Füzuli, Qubadlı, Cəbrayıl və Hadrut istiqamətindən başlayır. Özü də əsl qəhrəman kimi döyüşür. Cəsur komandir öndə olmaqla düşmənə amansız sarsıdıcı zərbələr endirir. Az itki ilə yağını Füzulidə darmadağın etməklə şanlı zəfərimizə yol açır. O, daha sonra Qubadlının, Cəbrayılın bir çox yaşayış məntəqələrində ölüm-dirim müharibəsindən qalib çıxır. İgid kapitan erməniləri döyüş mövqelərindən pərən-pərən salmaqla bərabər, dəfələrlə təhlükəli vəziyyətə düşən yaralı hərbiçiləri müharibə meydanından çıxarır.
Bir aylıq şanlı döyüşdən sonra, yəni oktyabrın 27-də kapitan Cavadov 14 nəfərlik qrupla Xocavənd rayonu, Cütçü kənd ərazisindəki strateji yüksəkliyi işğaldan azad etmək uğrunda hücuma keçir. Savaşın ən qızğın vaxtı qrupun hərbçisi ağır yaralanır. Cəlil döyüşə-döyüşə ona ilk tibbi yardım göstərir, yaralını müharibə meydanından çıxarır. Yenidən döyüşə başlayanda isə mühasirəyə düşür. Onun Vətən sevgisi, cəsurluğu, çevikliyi son nəfəsdə də özünü göstərir. Əlindəki silah-sursatla xeyli erməni faşistini gəbərdir. Ürəyinə dəyən güllə igid kapitanı susdursa da, Vətən torpağı azad olunur və yazdığı tarixlə o, xalqının qəlbində əbədi parlaq günəşə dönür. Dövlət isə öz qəhrəman oğlunun sədaqətini “İgidliyə görə”, “Vətən uğrunda”, “Füzulinin azad olunmasına görə” medalları ilə uca tutur.
Zəfər ORUCOĞLU Azərbaycan Jurnalistlər Birliyinin üzvü
