Prezidentin Şuşadan TƏBİB-ə örtülü mesajları... İdman zalları və açıq havada maskalar...

İlqar Hüseynli: “Niyə xalqın xeyrinə olan jestləri dəyərləndirib dərhal qərar vermirlər?”

img

Məlum olduğu kimi, Şuşada keçirilən "Xarıbülbül Mahnı Festivalı”nda Prezident İlham Əliyev və Birinci Vitse-prezident Mehriban Əliyeva iştirak edib. Həmin tədbirdə Prezidentin maraqlı bir jesti diqqəti cəlb edib.

Tədbir sahəsinə daxil olan Prezident İlham Əliyev insanları salamlayıb və hər kəsdən xahiş edib ki, maskalarını çıxarsınlar. Əslində, bununla Prezident neçənci dəfədir ki, pandemiya ilə bağlı müəyyən qadağaları tətbiq edən TƏBİB rəhbərliyinə və Operativ Qərargaha üstüörtülü mesaj vermiş olur. Bu o anlama gəlir ki, insanlar yayın istisində, açıq havada maskadan istifadə etməyə də bilər. Qeyd edək ki, bundan bir neçə gün əvvəl Prezident hərbi hissələrdən birində publika önündə idman alətlərilə məşq etdi. Həmin vaxt bəzi ekspertlər bunun da idman zallarının açılışına üstüörtülü bir çağrışın olduğu qənaətinə gəldilər. Çox təəssüflər olsun ki, TƏBİB bu jestlərdən hələ də heç bir nəticə çıxarmır. Nə idman zallarının fəaliyyətinə, nə də açıq havada maskasız gəzməyə icazə verdi.

İxtisasca həkim olan sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, həmin kadrları izləyən andaca ağlına bu fikir gəlib: “Bəli, ölkə başçısı bununla mühüm mesaj verdi. Əlaqədar qurumların nəzərinə çatdırdı ki, açıq havada maskasız da ötüşmək olar. Hələ nəzərə alsaq ki, həmin  hadisə kütləvi tədbirin keçirilməsi zamanı baş verib. Deməli, açıq havada kütləvi tədbirlərin maskadan istifadə etmədən keçirilməsi də mümkündür. Ancaq təəssüflər olsun ki, əlaqədar qurumlar bunu anlamaq istəmir. Hətta bu istidə açıq havada tək gəzən insan belə, cərimədən çəkindiyi üçün, maskanı ağzına taxmağa məhkumdur. Çünki bilir ki, bunu etmədiyi təqdirdə 200 manat cərimələnə bilər. Əhali arasında belə fikirlər dolaşır ki, bununla əlaqədar qurumlar dövlət büdcəsinə daha çox pul keçirdiklərini də nümayiş etdirmək istəyir. Niyə xalqın xeyrinə olan jestləri dəyərləndirib dərhal qərar vermirlər? Bunu edən Prezidentdirsə, onun addımlarından doğru nəticə çıxarmaq lazımdır. Görünür, bu qurumlardakıların müstəqil qərar verməyə qabiliyyətləri çatmır. Əks təqdirdə biz Prezidentin iki jestinə bir cavab addımı görərdik. Əvvəl idman zalları açılardı, sonra da açıq havada maska ilə gəzmək tələbi ləğv edilərdi. Bu həm də insanlarda bir psixoloji gərginlik yaradır. Dünyanın əksər ölkələrində açıq havada maska ilə gəzmək tələbi ləğv edilib”.

Ekspertin sözlərinə görə, tibbi nöqteyi-nəzərdən də bunun faydası yoxdur: “Mən ixtisasca həkiməm. Bilirəm ki, xüsusilə də isti havada insanın ağ ciyəri yaxşı nəfəs almalıdır ki, onun saturasiyası normal olsun. Bizdən isə bu istidə maska taxmaq tələb edilir. Belə həssas dönəmlərdə maskanın açıq havada istifadəsi qanın okisgenlə təminatını da aşağı salmış olur”.

Məhəmmədəli QƏRİBLİ

Son xəbərlər