Sahibkar Anar Hüseynov Dövlət Şəhərsalma və Arxitektura Komitəsinin qərarından narazıdır.
Vətəndaş bildirir ki, Bakı şəhəri, Nərimanov rayonu, Ələsgər Qayıbov küçəsi, 10 L ünvanında səkkiz sot torpaq sahəsi var, amma orada tikinti işi apara bilmir: “Mənə məxsus ərazidə anbar tikmək istəyirəm. Bunun üçün Dövlət Şəhərsalma və Arxitektura Komitəsinin nəzdində olan Bakı Dövlət Layihə İnstitutunda layihə çəkdirdim və onu komitənin tabeliyində olan Ərazi Tikinti-Planlaşdırma Mərkəzinə göndərdim. Orada layihəmə baxılıb və bildirilib ki, düz çəkilməyib. Guya istinad planı topoqrafik əsas üzərində işlənməyib, mövcud kommunikasiyalar və mühafizə zonalarında xətlər göstərilməyib. Mən layihəni yenidən hazırladım və yenidən komitəyə göndərdim”.
Sahibkar iddia edir ki, birinci layihə çəkilən zaman nümayəndəsi Kənan Fərəcov Ərazi Tikinti-Planlaşdırma Mərkəzinin İdarə Heyətinin sədri vəzifəsini isra edən Ramin Abdullayevlə görüşüb: “Həmin vaxt nümayəndədən 20 min pul istənilib. Bildirilib ki, 20 min verək və layihəyə uyğun anbar tikək, amma biz də razılaşmadıq”.
Dövlət Şəhərsalma və Arxitektura Komitəsi: “Sifarişçinin ondan hər hansı ödənişin istənilməsi ilə bağlı iddiası əsassız və qanunaziddir”
Məsələ ilə bağlı Dövlət Şəhərsalma və Arxitektura Komitəsindən bildirildi ki, Bakı şəhəri, Nərimanov rayonu, Ələsgər Qayıbov küçəsi, 10 L ünvanında anbar binasının tikintisi ilə bağlı vətəndaş Anar Hüseynovun müraciətlərinə bir neçə dəfə cavab verilib: “Bildirilib ki, qeyd edilən ərazidə anbar binasının inşası ərazi-planlaşdırma sənədlərinə, habelə Bakı şəhərinin hazırda işlənilməkdə olan yeni Baş Planına əsasən məqsədəuyğun hesab edilmir. Yaxın gələcəkdə həmin ünvanda yol-nəqliyyat infrastrukturunun mərhələli şəkildə yenidən qurulması və memarlıq baxımından irimiqyaslı layihələrin həyata keçirilməsi nəzərdə tutulur.
Sifarişçinin ondan hər hansı ödənişin istənilməsi ilə bağlı iddiası əsassız və qanunaziddir. Belə ki, Komitənin tabeliyində olan Ərazi Tikinti-Planlaşdırma Mərkəzi tərəfindən göstərilən xidmətlərə görə ödənilən xidmət haqqı məbləğləri Nazirlər Kabinetinin 10.01.2020-ci il tarixli, 3 nömrəli Qərarına əsasən müəyyən olunur və yalnız bu sənəd əsasında sifarişçilər tərəfindən müvafiq ödənişlər edilir”.
Günel CƏLİLOVA
