TƏBİB Perinatal Mərkəzdə baş həkimi əvəz edən şəxs barəsində ittihamlara cavab verdi...

Şikayətçi həkimlər: “Respublika Perinatal Mərkəzinə müraciət edən xəstələr baş həkim əvəzi tərəfindən müəyyən pul qarşılığında əlbir olan həkimlərə...”

img

Respublika Perinatal Mərkəzində (RPM) çalışan həkimlər baş həkim vəzifələrini icra edən Məryəm Rzayevadan şikayətçidirlər. Həkimlər iddia edirlər ki, baş həkim vəzifəsini əvəz edən şəxs səlahiyyətlərindən sui-istifadə edərək, qanunsuz işlər görür.

Həkimlər qeyd edirlər ki, M.Rzayeva RPM-də monopoliya yaradaraq, mərkəzə müraciət edən xəstələri özü ilə əlbir olan həkimlərə müəyyən faiz qarşılığında yönəldir: “Respublika Perinatal Mərkəzində qəbul şöbəsi yoxdur. Qanunla bu olmamalıdır. Bizim mərkəzə müraciət edən xəstələr qeydiyyat şöbəsi tərəfindən aidiyyəti üzrə növbədə olan həkimlərə yönləndirilməlidirlər. Ancaq M.Rzayeva RPM-in sabiq baş həkimi Sevinc Məmmədovanın dönəmindən qalan qanunsuzluğu davam etdirir. Məsələ burasındadır ki, RPM-də qanunsuz olaraq qəbul şöbəsi yaradılıb. Qanunsuz olaraq yaradılan qəbul şöbəsinə isə nəzarəti Yamən Sultanova edir. Sağlıq ocağına gələn xəstələr Y.Sultanovanın əlilə monopoliyada yer alan həkimlərə ötürülür. Xəstələrdən alınan ödənişlərdən də monopoliyanı quran, baş həkim vəzifələrini müvəqqəti icra edən M.Rzayevaya haqq verilir”.

Həkimlərin sözlərinə görə, problemlə bağlı narazılıqlarını bildirsələr də, onlara müsbət cavab verilməyib.

Respublika Perinatal Mərkəzi ilə əlaqə saxlamağa çalışdıq. Lakin iş günü olmadığı üçün mərkəzdə zəngimizə cavab verən olmadı. Mövzunu diqqətdə saxlayacağıq.

Onu da qeyd edək ki, mərkəz bu ilin aprelindən TƏBİB-in tabeliyinə keçib.

  • TƏBİB: “Sözügedən tibb müəssisəsi ilə bağlı araşdırma aparılacaq”

Məsələ ilə bağlı TƏBİB-dən bildirdilər ki, sözügedən tibb müəssisəsində araşdırma aparılacaq: “Eyni zamanda, vətəndaşlardan xahiş edirik ki, neqativ hallarla bağlı sübutlar olduğu təqdirdə hüquq-mühafizə orqanlarına müraciət etsinlər”.

Günel CƏLİLOVA

Son xəbərlər