“2021-ci il üçün Bakı metrosunda sərnişindaşıma planı gedişhaqqı ödəyən sərnişinlər üçün 194,2 milyon nəfər həddində proqnozlaşdırılıb". Bunu mətbuata "Bakı Metropoliteni" QSC bildirib.
"Azərbaycan Respublikası Nazirlər Kabinetinin Operativ Qərargahının qərarlarına əsasən, metro nəqliyyatı ilə sərnişindaşıma fəaliyyəti 1 iyun 2021-ci il tarixinədək dayandırılıb. Qeyd edilən tarixdən sərnişindaşıma fəaliyyəti bərpa olunarsa, hesabat dövrü üçün gözlənilən 132,6 milyon nəfərlik sərnişindaşıma həcminə uyğun olaraq, bir sərnişinin daşınma xərcinin 0,97 manat təşkil etməsi gözlənir", - deyə açıqlamada qeyd edilir.
Məlumata görə, normal iş rejimində 1 gün ərzində Bakı metrosu 600 mindən çox sərnişin daşıyır. Tarif (Qiymət) Şurasının tənzimlədiyi qiymətlərə görə, bir sərnişinin daşınma haqqı 30 qəpikdir. Amma "Bakı Metropoliteni"nin açıqladığı rəsmi məlumata görə, bir sərnişinin daşınması quruma 2018-ci ildə 0,52 manata, 2019-cu ildə 0,51 manata, 2020-ci ildə isə 1,54 manata başa gəlib.
1967-ci ildə əsası qoyulan Bakı metrosunun hazırda xətlərinin sayı 3-ə (yaşıl, qırmızı və bənövşəyi), xətlərinin uzunluğu təxminən 40 km-ə, stansiyalarının sayı isə hələ istismar edilməyən "8 Noyabr" stansiyası da daxil olmaqla 26-ya çatır.
Bakı Metropoliteninin “bir sərnişinin daşınma xərcinin 0,97 manat təşkil etməsi gözlənir” açıqlaması yeni söz-söhbətə yol açıb. Artıq KİV-də, sosial şəbəkələrdə belə xəbərlər yayılıb ki, metropoliten qiymətləri qaldırır və metroda gedişhaqqı 30 qəpikdən 97 qəpiyə qalxır. Metroda gedişhaqqı qalxacaqmı?
“...Tarif Şurasına hər hansı bir müraciət ünvanlanmayıb”
KİV-də, sosial şəbəkələrdə yayılan məlumatla bağlı "Bakı Metropoliteni" QSC-nin mətbuat xidmətinin rəhbəri Bəxtiyar Məmmədovla əlaqə saxladıq. B.Məmmədov baki-xeber.com-a bildirdi ki, Bakı Metropolitenində gedişhaqqının 30 qəpikdən 97 qəpiyə qaldırılacağı ilə bağlı yayılan söz-söhbətin, məlumatın heç bir əsası yoxdur. Bunun heç hüquqi bazasının da olmadığını deyən B.Məmmədovun sözlərinə görə, burada qiymət artımından söhbət getmir: “Sosial şəbəkələrdə, mediada qiymət artımı ilə bağlı məsələlərdən çox bəhs olunur. Sosial şəbəkələrdə, KİV-də metroda qiymət artımı ilə bağlı deyilənlərin heç bir əsası, ən başlıcası, hüquqi bazası yoxdur. Metroda sərnişindaşıma bərpa olunanda qiymətlərin 97 qəpik olacağı barədə yayılan məlumatlar tamamilə yanlışdır. Hər bir sahədə olduğu kimi, metroda da proqnozlaşdırma var. Bütün ictimaiyyət bilir ki, qiymət artımı Tarif Şurasının səlahiyyətlərinə aid olan məsələdir, Tarif Şurasına müraciət daxil olur və uyğun qərarı verir. “Bakı Metropoliteni” Qapalı Səhmdar Cəmiyyəti tərəfindən gedişhaqqı qiymətlərinin yenidən tənzimlənməsi ilə bağlı Tarif Şurasına hər hansı bir müraciət ünvanlanmayıb. Bu birmənalıdır. Bu saat əsas vəzifə bütün infrastrukturu sərnişindaşımaya hazır vəziyyətdə saxlamaqdır. Yəni bir nömrəli vəzifə budur. Bilirsiniz, 2020-ci ilin 19 oktyabr tarixindən metropolitendə sərnişindaşıma fəaliyyəti dayandırılıb. Səbəb də COVID-19 virusuna qarşı profilaktik tədbirlərdir. O vaxtdan bu günə qədər metro sərnişindaşıma xidməti göstərmir. Bu halda da belə bir “ideya”nın ortaya çıxması absurd görünür. Çünki vəzifəmiz, qeyd etdiyim kimi, sərnişindaşımaya hazır olmaqdır” - deyə B.Məmmədov vurğuladı.
İradə SARIYEVA
