Məlum olduğu kimi, Azərbaycanda "Tütün məmulatlarının istifadəsinin məhdudlaşdırılması haqqında" Qanunla qapalı məkanlarda siqaret çəkmək qadağan edilib.
Qanuna əsasən, qapalı yerdə tütün çəkilməsinə görə həm ondan istifadə edən, həm də bu hadisəyə icazə verən məkan sahibini böyük məbləğdə cərimə gözləyir. Xatırladaq ki, qanun qüvvəyə minən ərəfədə obyekt sahiblərinə xəbərdarlıq edildi. Onlara bildirildi ki, qapalı məkanda siqaret çəkmək qadağandır. Bu qadağaya əməl edilməzsə, obyekt sahibi qanunvericiliyin tələbinə uyğun olaraq cəzalanacaq. Ancaq buna baxmayaraq, hələ də əksər obyekt sahibi qanunun tələbinə əmək etmir, yenə də qapalı məkanda siqaret çəkilməsinə icazə verirlər.
Qeyd edək ki, İnzibati Xətalar Məcəlləsinin 212-ci (Tütün məmulatının istehlakına dair məhdudiyyətlərə riayət edilməməsi) maddəsinə əlavə edilən 5-ci bəndə əsasən, qanunla qadağan edilən yerlərdə (tütün çəkmək üçün təşkil edilmiş xüsusi yer istisna olmaqla) tütün çəkilməsinə şərait yaradılmasına, yaxud tütün çəkilməsinin təklif edilməsinə görə vəzifəli şəxslərə 500 manat, hüquqi şəxslərə isə 1200 manat məbləğində cərimə tətbiq edilir.
Maraqlıdır, qadağaya əməl edilməsi üçün nə kimi tədbirlər görülməlidir? Cərimənin məbləği artırılmalı və ya daha sərt cəzalar tətbiq edilməlidir?
“Qapalı məkanlarda siqaret qadağasına əməl edilməməsi ilə bağlı həmin məkan sahibləri yüksək məbləğdə cərimə edilməlidirlər”
Sosioloq Aytəkin Kamranqızı bildirdi ki, qapalı yerlərdə siqaretin çəkilməsinə olan qadağaya ictimai nəzarət olmalıdır: "Bu elə məsələdir ki, təkcə qanunla iş bitmir. Hər bir şəxsin özünün məsuliyyəti olmalıdır. Çox təəssüf ki, bizim heç də hamımız siqaret çəkən şəxsə reaksiya vermirik. Xarici ölkələrdə isə bu məsələyə münasibət fərqlidir. Hər bir şəxs digərinə nəzarət edir. Yəni bu cür məsələlərdə ictimai nəzarət funksiyası var. Mənim fikrimcə, bizdə də heç bir şəxs özünü bu məsələdən kənara çəkməməlidir. Qapalı yerdə siqaret çəkən gördükdə dərhal iradını, etirazını bildirməlidir. Bu ən gözəl nəzarət mexanizmi olar".
Həmsöhbətimiz hesab edir ki,qapalı məkanlarda siqaret qadağasına əməl edilməməsi ilə bağlı həmin məkan sahibləri yüksək məbləğdə cərimə edilməlidirlər: “Nəzərə almaq lazımdır ki, qapalı yerlərdə siqaret çəkəndə siqaret onu çəkəndən çox ətrafda onun tüstüsünü qəbul edənlərə ziyandır. Ümumiyyətlə, siqareti çəkənlər deyil, ətrafdakılar onun ikincili təsirinə daha çox məruz qalırlar. Belə halda, biz passiv siqaret çəkmiş oluruq. Halbuki, hər kəsin sağlam ətraf mühitdə yaşamaq hüququ var. Qapalı yerlərdə, ictimai yerlərdə siqaret çəkənlər nəzərə almalıdırlar ki, onlar bizim bu hüququmuzu pozurlar".
Günel CƏLİLOVA
