Hamımız çalışmalıyıq ki, sentyabrın 15-dən ənənəvi tədrisi bərpa edək. Düşüncəmiz budur ki, mümkün dərəcədə əyani tədrisə qayıdaq. Bu, uşaqların sosial-psixoloji inkişafı, parta arxasında oturmaları, məktəbə getmələri baxımından vacibdir.
“Trend” xəbər verir ki, bunu təhsil naziri Emin Əmrullayev “Facebook”da canlı yayımda bildirib.
O deyib ki, mayın 17-dən 5 regionda da həftədə 3 dəfə ibtidai, 2 dəfə V-IX sinif şagirdləri üçün əyani tədrisə başlanacaq. X-XI siniflər hələ də distant formada tədrisə davam edəcək.
"Həm epidemioloji, həm vaksinasiya, həm də sinif ölçüləri imkan verəndə qaydalara əməl etməklə həftədə 5 dəfə əyani tədrisə qayıdacağıq” - deyə, nazir əlavə edib.
“Mayın 17-dən əyani tədrisin qismən bərpa olunması qərarı müzakirələr və aparılan təhlillərdən sonra verilib” – deyən nazirin sözlərinə görə, əyani tədrisə qayıtmaq vacibdir: “Uşaqların sosial-psixoloji inkişafı, parta arxasında oturması vacibdir. İnandığımız odur ki, bu anlamda valideynlər övladlarını məktəbə göndərə biləcəklər. X-XI sinif şagirdləri hələ də dərslərini distant formada davam etdirəcəklər. Şərait olan məktəblərdə tədris həftədə 5 gün olacaq. Şagirdlərin məktəbdə olması və yaşıdları ilə ünsiyyətdə olması vacibdir. Sadəcə çıxılmaz vəziyyətdə qaldıqda distant tədrisə keçid barədə düşünürük”.
Emin Əmrullayev deyib ki, növbəti illərdə şagird sayında azalmalar ola bilər.
Onun sözlərinə görə, Bakı şəhəri üzrə vakansiyalar iş yerlərinin sayı ilə bağlıdır. Müəllimlər adətən 23-25 yaşlarında işə başlayırlar. Pensiya yaşına qədər davam edirlər. Bir şəxs eyni iş yerində 30-40 il işləyir. Belə olanda vakant yer olmur:
"Bu gün Bakıda biologiya fənni üzrə 995, fizika fənni üzrə 890, coğrafiya üzrə 894, kimya üzrə 673, ibtidai təhsil səviyyəsi üzrə 5 879, Azərbaycan dili və ədəbiyyatı üzrə 2 979, riyaziyyat üzrə isə 2 521 müəllim çalışır.
Bu yerlərin 1/40-i vakansiyaya çıxa bilər. Şagirdlərin sayı da vakant yerlərə təsir edə bilər. Son illərdə şagird sayında artım müşahidə edilirdi. Amma növbəti illərdə azalma olacaq. Uşaqların sayının azalması şagird sıxlığına, yeni siniflərin açılmasına təsir edəcək. Müəllimlərin iş yerlərində saxlanılması və ixtisar edilməməsi əsas prioritetdir".
Təhsil naziri onu da bildirib ki, yaxın 3 ayda müəllimlərin sertifikasiyasının keçirilməsi nəzərdə tutulmur.
Onun sözlərinə görə, buna səbəb pandemiyaya görə qeyri-müəyyənliyin olmasıdır: "Amma bu il hansısa qrup üzrə sertifikasiyanın keçirilməsinə ümid edirik. Bunun payız aylarında olmasını nəzərdə tuturuq. Sertifikasiya qəfil ola bilməz, əvvəldən məlumat verilməlidir. Bunlar pandemiya ilə bağlıdır, pandemiya olmasaydı, bəlkə də proses artıq başlamışdı".
