Bu günlərdə güclü külək nəticəsində avtomobillərə ciddi ziyan dəydi. Belə ki, yıxılan ağaclar avtomobillərə zərər vurdu. Qanunvericiliyə görə, təbiət hadisəsi zamanı avtomobilə ziyan dəyirsə, bunu kasko sığorta ödəməlidir. Çünki təbiət hadisəsinə görə dəyən ziyanı avtomobillərin icbari sığortası ödəmək məcburiyyətində deyil. Bu növ sığortanın funksiyası başqasına vurduğu zərəri qarşılamaq üçündür. Nəqliyyat vasitələri təbiətin vurduğu ziyandan yalnız kasko sığorta vasitəsilə sığortalanır.
Ancaq külək nəticəsində bir neçə maşının üzərinə ağac aşsa da, Azərbaycanda kasko sığorta dəymiş ziyanı ödəməkdən müxtəlif yollarla yayınır. Bununla bağlı ciddi narazılıq var. Sürücülərin sözlərinə görə, kasko sığorta pul ödənişi ilə bağlı o qədər sənəd tələb edir ki, nəticədə onlar bundan bezirlər.
Bakıda əsən güclü küləkdə avtomobillərin zərər görməsi kasko sığorta ilə bağlı yaşanan problemləri yenidən gündəmə gətirib. Bununla yanaşı, avtomobil icarəyə verən şirkətlər və sürücülər kasko sığortanın şərtlərinin ağır olmasından narazıdırlar. Həmçinin, qəzalarda sürücünün maşını hadisə yerindən kənarlaşdırması və s. bu kimi kiçik məsələlərə görə sığorta şirkətləri ödəniş etməkdən imtina edirlər. Bu da, öz növbəsində, vətəndaşlarda bu şirkətlərə qarşı inamsızlıq yaradır. Məlumata görə, kasko sığorta ilə məşğul olan bütün şirkətlər təbiət hadisələri zamanı avtomobillərə dəyən ziyanı ödəməkdən yayınırlar.
“...bu gün sığorta haqları yüksək olduğundan, hamı kaskodan yararlana bilmir”
Nəqliyyat eksperti Eldəniz Cəfər bildirdi ki, küləkli havalarda sürücülər xüsusilə diqqəti olmalıdırlar: "Magistral yol ilə hərəkət edənlər sürəti azaltmalı, yollarda daha diqqətli olmalıdırlar. Güclü külək yüksək sürətdə olan maşınlara daha çox təsir edə bilir. Bununla yanaşı, külək yol kənarındakı nişan və konstruksiyaları yola ata bilər. Sürət az olduqda belə təhlükədən sovuşmaq daha asandır.
Şəhər mərkəzində də eyni qaydalara riayət etmək lazımdır. Yaşlı ağacların, təmir-tikinti olan binaların qarşısında maşın saxlamaq məsləhət deyil. Yaxşı olardı ki, vacib zərurət yoxdursa, Bakı sakinləri taksi və ictimai nəqliyyatdan istifadə etsinlər”.
Ekspertin sözlərinə görə, bu cür vəziyyətdə avtomobilə dəymiş ziyan sığorta tərəfindən ödənilir. Təəssüf ki, bu gün sığorta haqları yüksək olduğundan, hamı kaskodan yararlana bilmir. Sığortanın bu növünün qiymətinin münasib olması məqsədəuyğun olardı. Kasko sığortası olmayan sürücülər ziyanı özləri ödəyirlər: “Hər hansı bir təmir olunan bina üzərindən düşən əşya maşını zədələyibsə, o zaman təmirə cavabdeh olan şirkət ziyanı ödəməlidir. Yaxud külək kiminsə eyvanından əşyanı salıb maşını zədələyibsə, mənzil sahibi ödəməlidir. Belə hallarda maşın sahibinin kaskosu varsa, sığorta ödəyəcək. Sığorta yoxdursa, zərərvuran ödəməlidir”.
Günel CƏLİLOVA
