Gəncə İstintaq Təcridxanasından yenicə çıxmış jurnalist Zaur Qənbərov Ağstafanın həbsdə olan sabiq icra başçısı və müavininin həbsxanadakı imtiyazlı şəraiti ilə bağlı maraqlı məlumat paylaşıb. Jurnalistin təcridxana qeydlərini təqdim edirik:
"Alimpaşa Məmmədovun həbsindən sonra icra strukturu əməkdaşlarının həbsi yenə də davam edir. Ağstafa rayon Həsənsu kənd icra nümayəndəsi Vəliyev Vəkil həbs edilib. Ümumiyyətlə, vəzifəli şəxlərin həbsi onlarda heç nəyi dəyişmir. Necə azadlıqda, vəzifədə olarkən rüşvət, yeyinti hesabına eyş-işrətlərindən qalmırdılarsa, eynisi həbsdə də davam edir. Bunu şahidi olduğum fakta əsaslanıb deyirəm. Ağstafanın həbs olunan icra başçısı Nizaməddin Quliyev və onun müavini Ramiz Tatarov Gəncə şəhəri 2 saylı İstintaq Təcridxanasında (Gəncə türməsində) mənimlə birlikdə həbsdə idilər.
Öncəliklə Gəncə türməsində olan müəyyən məsələləri qeyd edim (orda verilən işgəncələrdən və yığılan rüşvətin hara getdiyini ayrıca yazacam).
Həbs olunan icra başçıları və digər vəzifəli şəxslər çöldə yığdıqları milyonlarla içəridə də kef edirlər. Gələk Nizaməddin Quliyev ilə Ramiz Tatarova. 61 nömrəli otaqda idim. Qapıdan bir nəfər girdi. Həmin adam Gəncənin keçmiş icra baçısı Eyvaz Babayevin bacısı oğlu idi. Bildirdi ki, 24 nömrəli otağı dağıtdılar ki, bəs telefon işlədirsiniz. Amma telefon yox imiş. Həmin 24 nömrəli otaq supertəmirli otaqdır. 4 çarpayı var. Hər çarpayının qiyməti 500 manatdır. Məsələ başqa imiş. N.Quliyevi və R.Tatarovu Bakıdan Gəncə Ağır Cinayətlər Məhkəməsinə hökm oxunmaq üçün etap gətiriblərmiş, otaq da onlara hazırlanırmış. Elə də oldu. Həmin şəxslər 24 nömrəli otağa yerləşdirildi. Təbii ki, pulsuz yox. Hər ay sözügedən məbləği ödəmək şərtilə.
N.Quliyev və R.Tatarov otaqdakı supertəmiri belə bəyənməyərək öz hesablarına otağı yenidən təmir etdirdilər. İkimərtəbəli çarpayıları çıxartdıraraq əvəzində divan, kreslo, yataq dəsti, böyük diaqonallı televizor, playstation, döşəməyə xalça və s. təşkil etdirdilər. Hətta kasıb məhbuslardan birini də (məhbusun öz istəyilə) özlərinə qulluqçu götürdülər. Yəni həbs etsələr də, adamlar keflərindən qalmırlar. Bunlar üçün başqa cəza növü düşünülməlidir. Yaxud digər məhbuslar kimi cəza çəkməyə məcbur edilməlidirlər".
Mehman Sadıxov: “Məlumatın yanlış olmaqla həqiqəti əks etdirmədiyi və ictimaiyyətdə yalnız çaşqınlıq yaratmaq məqsədi daşıdığı müəyyən edilib"
Jurnalistin bu ittihamlarına Penitensiar Xidmətdən münasibət öyrəndik. Qurumun mətbuat xidmətinin rəhbəri Mehman Sadıxov “Bakı-Xəbər”ə açıqlamasında bildirdi ki, bəzi informasiya saytlarında Ədliyyə Nazirliyi Penitensiar Xidmətinin Gəncə şəhərində yerləşən 2 saylı İstintaq Təcridxanasında guya həbs edilən ayrı-ayrı şəxslərin imtiyazlı şəraitdə saxlanılmasına dair məlumat dərc olunub: “Həmin məlumatın yoxlanılması üçün dərhal təcridxanaya baş çəkilib, həbsdə olan şəxslərin saxlanma şəraiti ilə tanış olunub və yerində araşdırma aparılıb. Nəticədə məlumatın yanlış olmaqla həqiqəti əks etdirmədiyi və ictimaiyyətdə yalnız çaşqınlıq yaratmaq məqsədi daşıdığı müəyyən edilib".
Həbsdə olan korrupsioner məmurların həbsxanadakı imtiyazlı şəraiti ilə bağlı hansı formada ictimai nəzarət həyata keçirilə bilər?
Rauf Zeyni: “Araşdırmalarımız göstərdi ki, kamerada divan-kreslonun qoyulması ilə bağlı fakt öz təsdiqini tapmır”
Ədliyyə naziri yanında İctimai Komitənin üzvü, Milli QHT Forumunun prezidenti Rauf Zeyni “Bakı-Xəbər”ə açıqlamasında bildirdi ki, Komitənin üzvü kimi müxtəlif cəzaçəkmə müəsissələrində başçəkmələrdə, monitorinqlərdə olub: “Biz belə hallarla rastlaşmamışıq. Həbsdən çıxan jurnalistin dediyi faktlarla bağlı bizə hər hansı müraciət daxil olmayıb. İstənilən şikayətlə bağlı biz dərhal rəhbərliklə əlaqə saxlayırıq, ehtiyac olanda başçəkmə də həyata keçiririk. Sizin sualınızla bağlı Penitensiar Xidmətlə əlaqə saxladım. Mənə bildirdilər ki, belə hal mövcud deyil. Biz istənilən cəzaçəkmə müəsissəsinə başçəkmə həyata keçirə bilərik. Araşdırmalarımız göstərdi ki, kamerada divan-kreslonun qoyulması ilə bağlı fakt öz təsdiqini tapmır”.
Məhəmmədəli QƏRİBLİ
