“Yeni klinika”da çalışan tibb işçiləri iki aydır maaş ala bilmirlər. Bu barədə adıçəkilən klinikada çalışan işçilər müraciət ediblər. İşçilər qeyd edirlər ki, onların əməkhaqlarının nə səbəbdən verilməməsi məlum deyil: “İki aydır maaş ala bilmirik.
Hansı səbəbdən verilmədiyi, nə vaxt olacağı isə məlum deyil. Həmçinin, maaşlarımızdan 500 manat pul da kəsilib. Bayram günlərində də işə çıxdıq. Ancaq o günlərdə işə çıxmağımıza baxmayaraq, pulumuz hesablanmayıb. 10 günlük pulumuzun nə səbəbdən hesablanmaması haqqında bizə heç bir məlumat verilmir. Rəhbərliyə etiraz etdikdə “kimə istəyirsiniz şikayət edin, xoşunuza gəlmir, işdən çıxın” deyilir”.
“...fevral və mart aylarının ödənişləri həyata keçiriləcək”
Məsələ ilə bağlı İcbari Tibbi Sığorta üzrə Dövlət Agentliyindən bildirildi ki, agentliyə vəsait ayrılmadığı üçün tibb işçilərinin əməkhaqları verilməyib: “Nazirlər Kabinetinin müvafiq qərarına uyğun olaraq, yeni növ koronavirus infeksiyası ilə mübarizə tədbirlərində iştirak edən tibb və qeyri-tibb işçilərinə iş vaxtına mütənasib olaraq aylıq vəzifə (tarif) maaşının 3-5 misli məbləğində müddətli əlavələr ödənilir. Yeni növ koronavirus infeksiyası ilə mübarizə və profilaktik tədbirlərin maliyyələşdirilməsi üçün tələb olunan vəsait agentliyə ayrıldıqdan sonra fevral və mart aylarının ödənişləri həyata keçiriləcək”.
Agentlik bayram günlərində işləyən tibb işçilərinin əməkhaqlarının düzgün hesablanmaması barədə bildirdi ki, hər hansı şəxsin işə cəlb olunması və bunun müqabilində müddətli əlavənin verilməməsi ilə bağlı məlumat varsa, məsələnin araşdırılması üçün müvafiq tibb müəssisəsinin maliyyə və ya mühasibatlıq şöbələrinə müraciət edilsin. Verilən cavab şəxsi qane etməzsə, agentliyə də müraciət edə bilər.
Son olaraq qeyd edək ki, ötən ay "Yeni klinika” tibb müəssisəsinin direktoru Pərviz Abbasov Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən saxlanıb. O, koronaviruslu xəstələrin tibb müəssisəsinə yerləşdirilməsi müqabilində yaxınlarından rüşvət almaqda ittiham olunur.
Günel CƏLİLOVA
