Bakının Buzovna qəsəbəsində yerləşən “Sanator-Kurort Reabilitasiya Mərkəzi” publik hüquqi şəxsi tərəfindən keçirilən tender müsabiqəsinin qalibi məlum olub.
Tender müsabiqəsinin qalibi “Treniks Grup” MMC olub. Müsabiqənin şərtlərinə əsasən, “Treniks Grup” MMC “Sanator-Kurort Reabilitasiya Mərkəzi”nə 113 min 800 manat 50 qəpik dəyərində 23 min 958 ton su satacaq. Rəqəmlərdən də göründüyü kimi, 1 kubmetr içməli su üçün 4 manat 56 qəpik (1 ton su = 1,0416 kubmetr) ödəniləcək. Bu qiymətlər isə “Azərsu” ASC-nin əhaliyə satdığı içməli suyun qiymətilə (1 kubmetr/0,70 manat) müqayisədə 6,5 dəfə çoxdur.
Digər diqqətçəkən məqam odur ki, tenderin qalibi olan “Treniks Grup” MMC-nin adına açıq internet resurslarda rast gəlmək mümkün deyil. Şirkətin daha əvvəl hansı işlərlə məşğul olduğu barədə heç bir yerdə məlumat yoxdur. Rəsmi məlumatlarda “Treniks Grup” MMC-nin cəmi 4 ay əvvəl - 07.01.2021-cı ildə dövlət qeydiyyatına alındığı qeyd olunub. Hüquqi ünvanı Yasamal rayonu, Şərifzadə küçəsi, ev 154, mənzil 25-də yerləşən şirkətin qanuni təmsilçisi Rəhimov Yaqub Firudin oğludur.
Artıq neçənci dəfədir ki, bu cür şəffaf olmayan tenderlərin keçirilməsi baş verir.
“Dövlətin balansında olan qurumlarla bağlı tenderlər maksimum açıq və şəffaf keçirilməlidir”
Sözügedən məsələ ilə əlaqədar fikirlərini “Bakı-Xəbər”lə bölüşən iqtisad üzrə fəlsəfə doktoru Firdovsi Şahbazovun fikrincə, aydın görünür ki, ortada şəffaf tender yoxdur: “Belə olmasaydı, 4 ay əvvəl qeydiyyatdan keçən və təcrübəsi olmayan MMC qalib olmazdı. Deməli, sözügedən tenderlə bağlı hansısa qeyri-rəsmi sövdələşmə var. Ötən müddət ərzində bir sıra icra başçıları vəzifə səlahiyyətlərindən sui-istifadə etdiklərinə görə həbs edildilər. Məlum oldu ki, onların rəhbərliyi dönəmlərində formal xarakterli tenderlər keçirilərək dövlət vəsaitləri mənimsənilib. Ümumilikdə, dövlət hesabına sanatoriyaların saxlanmasında bir sıra problemlər var. Problem ondadır ki, həmin xidmət sahələrinin saxlanması ilə bağlı hər il dövlət büdcəsindən milyonlarla vəsait ayrılır. Ancaq bütün bunlara baxmayaraq, həmin müəssisələrin səmərəlilik əmsalı çox aşağıdır. Bu isə o qənaətə gəlməyə əsas verir ki, büdcədən ayrılan vəsait təyinatı üzrə xərclənmir. Formal və şübhəli xarakterli tenderlərlə vəsaitlər mənimsənilir. Buzovna qəsəbəsində yerləşən “Sanator-Kurort Reabilitasiya Mərkəzi” ilə bağlı keçirilən tender də bu qəbildəndir. Ona görə də “Tender haqqında” Qanun əsaslı şəkildə yenilənməlidir. Dövlətin balansında olan qurumlarla bağlı tenderlər maksimum açıq və şəffaf keçirilməlidir”.
Ekspert hesab edir ki, bütün bunlar təmin edilmədən tenderlərdə yaşanan bu kimi neqativ hallar azalmayacaq.
Vidadi ORDAHALLI
