Astara rayon Heydər Əliyev Mərkəzinin və N.Kərimov adına Astara rayon Ərçivan qəsəbə 3 saylı tam orta məktəbinin birgə təşkilatçılığı ilə ümummilli lider Heydər Əliyevin anadan olmasının 98 illiyi münasibətilə ZOOM proqramı əsasında onlayn tarix dərsi keçirildi.
Heydər Əliyev Mərkəzinin direktoru Kübra Səmədovanın, fondun baş mühafizi Elza Kazımovanın, əməkdaşı Aygün Rufullayevanın, N.Kərimov adına Astara rayon Ərçivan qəsəbə 3 saylı tam orta məktəbinin direktoru Aygün Həmidovanın, tarix müəllimi Əli Əliyevin və IX a sinif şagirdlərin qatıldığı dərs “Müstəqil Azərbaycan yaşadıqca Ulu Öndər Heydər Əliyev ürəklərdə yaşayacaqdır” adlanırdı.
Ulu öndər Heydər Əliyevin əziz xatirəsi bir dəqiqəlik sükutla yad ediləndən sonra Azərbaycan Respublikasının Dövlət Himni səsləndi.
Mərkəzin direktoru Kübra Səmədova çıxışında bildirdi ki, Azərbaycanın ən yeni tarixinin bütöv bir dövrü Heydər Əliyevin şərəfli adı və möhtəşəm fəaliyyəti ilə bağlıdır. Onun Azərbaycana rəhbərlik etdiyi 35 illik dövründə respublikamız əsrlərə bərabər inkişaf yolu keçib. Ölkədə nəhəng quruculuq işlərinin təşəbbüskarı məhz ulu öndər olub.
Onlayn tarix dərsində Heydər Əliyev Mərkəzinin fondunun baş mühafizi Elza Kazımova mövzu ətrafında geniş məruzə etdi. Məruzədə deyilirdi: “Ümummilli liderimiz Heydər Əliyevin zəngin dövlətçilik təcrübəsi, möhkəm iradəsi və uzaqgörənliyi sayəsində vətəndaş müharibəsi dayandırıldı, Milli Ordumuzun döyüş qüdrətinin artırılması nəticəsində Qarabağın işğalına son qoyuldu və atəşkəs əldə olundu. Qısa bir zamanda Ulu Öndərin rəhbərliyi altında respublikamızda ictimai-siyasi sabitlik və iqtisadi dirçəliş təmin edildi. Siyasi aləmdə dövlətimizin beynəlxalq nüfuzu möhkəmləndi və müstəqilliyimiz dönməz xarakter aldı. Müstəqil respublikamızın ilk Konstitusiyası qəbul olundu, parlamentə seçkilər keçirildi. Şərqdə ilk dəfə olaraq Azərbaycanda ölüm hökmü ləğv edildi, hüquqi və sivil dövlət quruculuğu prosesi başlandı. İqtisadi islahatların həyata keçirilməsi geniş vüsət aldı və “Əsrin müqaviləsi” adını almış Neft müqaviləsi imzalandı, dünya dövlətləri arasında iqtisadi və siyasi əlaqələrimiz genişləndi. Bütün bu sadalananlar məhz ulu öndərimiz Heydər Əliyevin uzaqgörən siyasəti və gərgin əməyi nəticəsində mümkün olub.
Bu gün ulu öndər Heydər Əliyevin siyasəti Azərbaycan Respublikasının Prezidenti cənab İlham Əliyev tərəfindən uğurla aparılır. Respublikamızda son dövrlərdə gedən proseslər, daxili və xarici siyasətdə qazanılan uğurlar, ölkəmizin dünyada tolerant dəyərlərə sahib olması bunun canlı şahididir. İllər öncə ulu öndərin dediyi: “İlham Əliyev yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə cənab İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm” fikri bu gün tam öz təsdiqini tapır”.
Natiq onu da vurğuladı ki, Azərbaycan iqtisadi qüdrətə malik olmaqla, həm də güclü ordu sahibidir. Ordu ölkənin ərazi bütövlüyünü qoruyan hərbi qüvvədirsə, onu yenilməz edən əsgər və zabitlərin gücü, iradə möhkəmliyi, qorxmazlığı, döyüş bacarığı, düşmənə qarşı eyni əqidə ilə yumruq kimi birləşərək mübarizə aparmasıdır. Bu birlik sayəsində rəşadətli Azərbaycan Ordusu hədəfinə çatmağı bacardı, böyük Qələbəyə imza atdı.
N.Kərimov adına Ərçivan qəsəbə 3 saylı məktəbinin direktoru Aygün Həmidovanın, tarix müəllimi Əli Əliyevin dərin faktlar əsasında qurulmuş çıxışları da yaddaqalan oldu. Tarix dərsini Əli Əliyev diskussiya formasında davam etdirdi.
Zəfər ORUCOĞLU Azərbaycan Jurnalistlər Birliyinin üzvü
