Gəncə şəhəri ərazisində yerləşən, 600 məcburi köçkün ailəsi üçün salınmış qəsəbə içməli su problemi yaşayır. Məlumat üçün bildirək ki, 2014-cü ildə ölkə başçısı İlham Əliyevin və sabiq “Qaçqınkom” rəhbəri Əli Həsənovun da iştirakıyla sakinlərin istifadəsinə verilən 2-ci məcburi köçkün qəsəbəsində bütün evlərə "Azərsu" ASC tərəfindən içməli su adı altında texniki su satılır.
Qəsəbədə yaşayan məcburi köçkünlər bildirirlər ki, onların istifadə etdikləri suyun tərkibi çox bərbaddır və hətta qəsəbəyə verilən su şirin su adlandırılsa da, insan sağlamlığı üçün zərərlidir. Sakinlər qeyd edirlər ki, su o dərəcədə keyfiyyətsizdir ki, ağacları belə qurudur.
Sakinlərin sözlərinə görə, qəsəbədə məlum problemə ilk gündən rəvac verənlər maşınlarda onlara su satmaqla həm də özlərinin nöqsanlarını ört-basdər etməyə çalışırlar.
Onu da qeyd edək ki, qəsəbənin su təminatı üçün uzunluğu 30 kilometrdən çox olan su kəmərindən, yaxınlıqda inşa edilmiş nasosxana binasından və iritutumlu su anbarından istifadə edilir. Eləcə də qəsəbəyə verilən su Goranboy rayonunun Mollaavazlı-Xoylu kəndi ərazisində quraşdırılmış bir artezianla tədarük edilir. Aidiyyəti qurumlar bu məsələdə seyrçi mövqe tuturlar. Qeyd edək ki, Gəncə şəhərində içməli, şirin su problemi uzun illərdir yaşanır. Bu məsələni həll etmək üçün bir neçə il əvvəl Gəncə şəhərində Azərbaycan Respublikası Hökumətinin Almaniyanın “KfW” bankı və İsveçrənin SECO təşkilatı ilə birgə maliyyələşdirdiyi “Açıq Kommunal İnfrastruktur Proqramı” layihəsi çərçivəsində inşa edilmiş Göygöl-Gəncə magistral su xəttinin açılışı olub.
“...məcburi köçkünlərin qəsəbəsində də içməli su probleminin yaşanması artıq vəziyyətin pik həddə çatmasından xəbər verir”
Ekoloq Elnur Əhmədov bildirdi ki, Gəncə şəhərində şirin su problemi illərdir yaşanır. Bu problemi həll etmək üçün bir sıra xarici şirkətlərlə əməkdaşlıq edilib: “Hətta bununla bağlı layihələr də həyata keçirilib. Ancaq yenə də Gəncədə şirin su problemi yaşanır. Bir neçə il öncə Gəncə şəhərində Prezidentin iştirakı ilə açılışı baş tutan məcburi köçkünlərin qəsəbəsində də içməli su probleminin yaşanması artıq vəziyyətin pik həddə çatmasından xəbər verir. Bununla bağlı aidiyyəti qurumlar bir araya gəlib, adıçəkilən ərazinin su məsələsini həll etməlidirlər. Nəzərə almaq lazımdır ki, ehtiyacı qarşılamaq üçün maşınla su almaq ailənin büdcəsinə zərərdir”.
Günel CƏLİLOVA
