Aydın Xan Əbilov: “Bəzən bir pavilyonda 10-a yaxın veriliş çəkilir, bu da yoluxma risqinə rəvac verir”
Koronavirus kimliyindən, vəzifəsindən, statusundan asılı olmayaraq, insanları öz cənginə alır. Bu gün virusa yoluxan çoxlu sayda tanınmış var. Bildiyimiz kimi, virusdan canını xilas edə bilməyib vəfat edən xeyli sayda məşhurun da adlarını qeyd edə bilərik.
Son günlər bir neçə şou müğənnisinin və aparıcılarının koronavirusa tutularaq ağır vəziyyətdə xəstəxanalara yerləşdirildikləri məlumdur.
Bu günlərdə Əməkdar artist, tanınmış müğənni Baloğlan Əşrəfov koronavirusdan vəfat etdi. Xalq artisti Arif Quliyev, Əməkdar artist Mətanət İsgəndərli, Xalq artisti Könül Xasıyeva, aparıcı Kamran Həsənli və başqaları bu gün koronavirusla mübarizə aparırlar.
Müğənnilərin və aparıcıların harada, hansı şəraitdə koronavirusa yoluxduqları ciddi müzakirə edilir?
Şou-biznesçilər iddia edirlər ki, müğənnilər və aparıcılar kütləvi surətdə televiziyalarda yoluxublar. Yəni onlar verilişlərə çıxarkən koronavirusa tutulublar. Telekanalları ittiham edirlər ki, burada pandemiya ilə mübarizə tədbirləri qaydasında deyil. Hətta virusa tutulduğu ilk vaxtlarda mərhum Əməkdar artist Baloğlan Əşrəfov deyirdi ki, televiziyada yoluxub.
Şou-biznesçilərin iddia etdikləri kimi, doğrudanmı TV-lər pandemiya yuvasıdır, bu təhlükə TV-lərdə nə dərəcədə var, yaxud ola bilər?
- “Şou adamlarının çoxu özünü nə qədər xoşbəxt göstərmək istəsə də, əslində, onların bəziləri yanaşı xəstəlikləri...”
Vətəndaş Cəmiyyəti Alyansının rəhbəri, Yeni Yazarlar və Sənətçilər İctimai Birliyinin sədri, analitik-ekspert, yazıçı-kulturoloq Aydın Xan Əbilov “Bakı-Xəbər”ə bildirdi ki, qapalı mühitdə COVID-19-un tez yayılması, hətta onun müxtəlif ştammlarının orada formalaşması məsələsi artıq təcrübədə özünü göstərib, alimlərin tədqiqatları zamanı da təsdiqlənib. “Azərbaycan telekanallarının iqtisadi vəziyyəti hamıya məlumdur. Onların çoxu, demək olar ki, şəraiti, havalandırma sistemi olmayan köhnə binalarda yerlər götürüb, orada pavilyonlar tikib, yaxud studiyanın eyni pavilyonunda müxtəlif verilişlər çəkilir, televiziya studiyaları, çəkiliş pavilyonları gün ərzində ən azı yüz nəfərin təmas etdiyi yerlərdir. Bu halda isə həm koronavirusun, həm də digər virus növlərinin həmin məkanda olması istisna edilmir. Bir-iki telekanalı çıxmaq şərtilə, qalanlarının geniş və çoxsaylı pavilyonu yoxdur. Bəzən bir pavilyonda 10-a yaxın veriliş çəkilir, bu da yoluxma risqinə rəvac verir. Hətta bəzi telekanallar verilişlərini zirzəmilərdə çəkirlər. Çünki pavilyonları zirzəmidə yerləşir. Çöldən gələn bu qədər insanı, əlbəttə, eyni zamanda, dezinfeksiya etmək imkanı yoxdur. Ola bilsin əllərini dezinfeksiya edirlər, amma paltarları, ayaqqabıları dezinfeksiya olunmur, virus isə qapalı mühitdə daha da aktivləşir. Bu halda yanaşı xəstəlikləri olan sənət adamları daha tez yoluxurlar”.
A.X.Əbilov hesab edir ki, yaradıcı insanlar ekranda nə qədər xoşbəxt görsənsələr də, cah-cəlallarını, maşınlarını, evlərini nə qədər reklam etsələr də, bunların çoxu kreditlə götürülüb. “Şou adamlarının çoxu özünü nə qədər xoşbəxt göstərmək istəsə də, əslində, onların bəziləri yanaşı xəstəlikləri, psixi və psixoloji problemləri, sağlamlıq sapıntıları olan insanlardır. Onlar, əlbəttə, vaxtlı-vaxtında yatmırlar, normal qidalanmırlar, dietdədirlər, səslərini qorumaq üçün hər cür vasitələrə əl atırlar, depressiyaya düşürlər, psixoloji olaraq həmişə gərginlikdədirlər. Bu kimi göstəricilərlə yanaşsaq, şou müğənnilərinin COVID-19-a yoluxması gözlənilən idi. Xüsusən də yaşlı və yanaşı xəstəlikləri olan sənətkarlarımızın özləri də bilmədən ayaq üstə bu xəstəliyi keçirən gənclərdən, yaxud texniki və yaradıcı heyətdən COVID-19-a tutulması mümkün olur” - deyə A.X.Əbilov qeyd etdi.
COVID-19-a yoluxanlar arasında məşhurların diqqəti cəlb etməsinin normal olduğunu deyən A.X.Əbilov hesab edir ki, onların yoluxmasına dair xəbərlər də daha çox İP gətirir, oxucunu cəlb edir. “COVID-19-dan sonra verilişlərə çox getmirəm və o verilişə gedirəm ki, orada məndən, aparıcıdan və operatordan başqa heç kəs yoxdur, kütləvi iştirakçı verilişlərdən yan qaçıram.
Bir çox kanal rəhbəri çalışır ki, studiyaları dezinfeksiyaedici aparatlarla təmin etsin, amma daxildə olan xəstəliyə dezinfeksiyaedici aparatlar nə qədər təsirli ola bilər? Ona görə də insanlarımız, yaradıcı adamlar ehtiyatlı olmalıdırlar” - deyə A.X.Əbilov vurğuladı.
İradə SARIYEVA
