Evinə erməni raketləri dəymiş tərtərlilərdən İcra Hakimiyyətinin qanunsuz pul tələbi barədə söhbətlərin əslisi...

Tərtər Rayon İcra Hakimiyyəti: “Hazırda 1483 vətəndaşa kompensasiya ödənilib”

img

44 günlük müharibə zamanı işğalçı ölkə Ermənistan mülki əhalini də hədəfə aldı. Ötən ilin sentyabr ayında Ermənistan ordusu Tərtər rayonunun bir sıra kəndlərini atəşə tutdu. Rayonun müxtəlif əraziləri düşmən ölkə tərəfindən atəşə məruz qaldı. Nəticədə mülki əhaliyə çoxlu sayda ziyan dəydi. Ümumiyyətlə, 44 günlük müharibə zamanı mülki əhaliyə dəymiş ziyanın qarşılanması ilə bağlı ölkə başçısı İlham Əliyev tərəfindən sərəncam imzalanıb.

Prezident İlham Əliyevin ötən ilin 14 dekabrında imzaladığı “2020-ci il sentyabrın 27-dən başlayaraq Ermənistan silahlı qüvvələrinin Azərbaycan ərazisinə təcavüzü nəticəsində mülki əhaliyə, dövlət əmlakına, o cümlədən, infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsi və aradan qaldırılması ilə bağlı tədbirlər haqqında” sərəncama əsasən yaradılmış Dövlət Komissiyası tərəfindən mülki əhaliyə, dövlət əmlakına, o cümlədən, infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın dövlət vəsaiti hesabına aradan qaldırılmasına dair müvafiq işlər aparılır. Ziyan dəymiş yaşayış evləri üzrə hər bir ailəyə 1000 manat, dağıdılmış və ya qəzalı vəziyyətə düşmüş yaşayış evləri üzrə məişət əşyalarına dəymiş ziyanla bağlı hər bir ailəyə 6000 manat, şəxsi əşyalara dəymiş ziyanla bağlı hər bir ailə üzvünə 1500 manat məbləğində kompensasiyalar ödənilir.

Ancaq son günlər sosial şəbəkələrdə Tərtər Rayon İcra Hakimiyyəti başçısının müharibə zamanı rayonda evləri dağılmış sakinlərə dövlət tərəfindən ödənilən kompensasiya məbləğinin bir hissəsini tələb etməsilə bağlı məlumat yayılıb. Qeyd edilir ki, evlərin bərpası məqsədilə dövlətin müəyyən etdiyi ödənişi almaq üçün vətəndaş qarşısında məbləğin 25 faizinin icra başçısına çatacağı barədə şərt qoyulub.

  • “Evləri dağılan sakinlərə kompensasiya məbləği İcra Hakimiyyəti yox, Nazirlər Kabineti tərəfindən verilir”

Məsələ ilə bağlı Tərtər Rayon İcra Hakimiyyəti ilə əlaqə saxladıq. İcra Hakimiyyətindən bildirildi ki, evləri dağılan sakinlərə kompensasiya məbləği İcra Hakimiyyəti yox, Nazirlər Kabineti tərəfindən verilir: “Nazirlər Kabineti tərəfindən ödəniş kartı "Kapital Bank"a göndərilir. Bank tərəfindən bu barədə vətəndaşa məlumat verilir və həmin şəxs də bankdan kartını əldə edir. Ümumiyyətlə, bu prosesdə İcra Hakimiyyətinin heç bir rolu yoxdur. Bu mövzu ilə bağlı kimin hansısa şikayəti varsa, prokurorluğa müraciət edə bilər. Məlumat üçün bildirək ki, hazırda 1483 vətəndaşa kompensasiya ödənilib. Məlumdur ki, Tərtərə müharibə zamanı çoxsaylı mərmi düşüb. Bu səbəbdən də rayonda dağıntının həcmi böyükdür. Fövqələdə Hallar Nazirliyi, Dövlət Arxitektura və Şəhərsalma Komitəsi bu məsələ üzərində işləyirlər. Komissiya öz işini bitirdikdən sonra sənədləri Nazirlər Kabinetinin aidiyyəti qurumlarına təqdim edir. Proses tamamlandıqca vətəndaşlara kompensasiya ödənilir”.

Günel CƏLİLOVA

Son xəbərlər