Ucqar kəndlərimizdə nəzarətsiz mollalar - QMİ-dən xəbərsiz molla təyinatlarını kim aparır...

Hacı Təyyar Hüseynli: “Etiraf etmək lazımdır ki, hələ də QMİ-nin təşkil etdiyi test imtahanından keçməyən din xadimlərinə rast gəlinir”

img

Məlum olduğu kimi, aprelin 28-də, axşam saatlarında Lerik rayonunun Barzavu kəndində yaşayan 1981-ci il təvəllüdlü Zəkifə Feyruz qızı Fərziyevanın yaşadığı evində üzərində xəsarət izləri olan meyiti tapılıb. Təsdiqlənən məlumata görə, dəhşətli cinayəti həmin kənddə yaşayan və mərhum Z.Fərziyevanın qonşusu, Lerikin tanınmış din xadimlərindən biri Murad Əsgərov adlı şəxs törədib.

Mətbuatın yaydığı məlumata görə, molla Murad Əsgərov qonşuluqda yaşayan Z.Fərziyevanın evdə tək olduğunu bilərək gizli şəkildə mənzilə girib və qadına qarşı əxlaqsız hərəkətlər etməyə başlayıb. 3 uşaq anası olan Z.Fərziyeva qışqırmağa başlayıb və “evə oğru girib” deyərək qonşularını köməyə çağırıb. Qadının qışqırdığını görən M.Əsgərov cibində gəzdirdiyi bıçaqla Z.Fərziyevanın boğazını kəsərək, onu amansızlıqla qətlə yetirib. Cinayəti törədən şəxs saxlanıb və faktla bağlı Lerik Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Qeyd edək ki, qətlə yetirilən Z.Fərziyevanın həyat yoldaşı Rusiyaya işləməyə gedib, bir oğlu isə Vətən müharibəsinin iştirakçısıdır və hazırda Şuşada hərbi xidmətdədir.

Olayla bağlı Qafqaz Müsəlmanları İdarəsi (QMİ) münasibət bildirib və qeyd edilib ki, Lerikdə qətl törədən şəxs Qafqaz Müsəlmanları İdarəsinin təyin etdiyi din xadimi deyil.

Rayonlarda, kəndlərdə din xadimləri QMİ tərəfindən təyin edilmirlərsə, bəs hansı qurumlar tərəfindən təyin edilirlər? Bildiyimiz qədər, QMİ özü təyin etməlidir, bu qurum etmirsə, belə çıxır ki, kim istəsə yoxlanılmadan kəndlərdə, rayonlarda mollalıq edə bilər. Kənd mollalarının fəaliyyətinə nəzarət necə edilməlidir?

  • “Çox təəssüf ki, cəmiyyətimizdə “ara mollaları” da az deyil, belələri də fəaliyyət göstərirlər”

İlahiyyatçı Hacı Təyyar Hüseynli hesab edir ki, QMİ yerlərdə mollaların fəaliyyətinin rəsmiləşdirilməsi istiqamətində işlər görür. “QMİ bu sahədə iş aparır. Yerlərdə molla fəaliyyətinin rəsmiləşməsi din xadimləri idarənin xüsusi təşkil etdiyi test imtahanlarından keçdikdən sonra baş verir. Test imtahanlarından keçən və fəaliyyətinə xüsusi icazə və səlahiyyət verilən orta-ali dini təhsilli din xadimləri təyin olunur, onlara vəsiqə verilir. Amma etiraf etmək lazımdır ki, hələ də QMİ-nin təşkil etdiyi test imtahanından keçməyən din xadimlərinə rast gəlinir. Hələ də dini tələblərə, təhsil və davranış parametrlərinə cavab verməyən, natamam molla fəaliyyətilə məşğul olanlar var. Belələrinə el arasında “ara mollaları” deyirlər, “ara mollaları” özbaşına mollalıq edirlər. Çox təəssüf ki, cəmiyyətimizdə “ara mollaları” da az deyil, belələri də fəaliyyət göstərirlər. Fikrimcə, bu istiqamətə nəzarət daha da gücləndirilməlidir ki, bəziləri tərəfindən din xadimi adından sui-istifadə hallarına yol verilməsin. Bilirsiniz ki, QMİ daim qanunsuzluqlara qarşı mübarizə aparır. Hesab edirəm ki, qanunsuz fəaliyyətlə məşğul olan mollaların fəaliyyətinin tənzimlənməsi vacibdir və bunun qarşısı alınmalıdır. Məncə, bu halın qarşısının alınması çox sadədir. Respublika üzrə bölgə qaziləri yerlərdə monitorinqlər keçirməlidirlər. Qeyd edim ki, böyük şəhərlər, rayonlar və hətta qəsəbə və kəndlər qazilərin  idarəçiliyində və səlahiyyətindədir. Bölgə qaziləri monitorinqlər keçirməlidirlər. Yerli əhali öz kəndlərində, qəsəbələrində, ətraflarında, sadə dillə desək, kimin “mollalıq” iddiasında olduğunu və qanunsuz fəaliyyət göstərdiyini yaxşı bilir. Lazımi hüquqi səlahiyyətli dövlət orqanı olan Dini Qurumlarla İş üzrə Dövlət Komitəsini də bu işə ciddi şəkildə cəlb etmək lazımdı. Bir sözlə, bu nəzarət o şəkildə qurulmalıdır ki, layiq olmayan şəxs bura yaxın düşə bilməsin və layiq olan bu müqəddəs mənəvi sahədə xalqımıza xidmət etsin. Əslində, mənəvi sahədə xalqımıza, dövlətimizə vətənpərvər, yüksək mənəvi keyfiyyətlərə malik olan, etik-estetik cəhətdən mükəmməl olan din xadimləri hər zaman lazım olub və olacaq da”.

H.T.Hüseynli hesab edir ki, bu kimi neqativliyə bəzən “ara mollalar” yol verə bilir, çünki yüksək təhsilli, mənəvi cəhətdən müsbət keyfiyyətlərə malik olan, savadlı, cəmiyyət üçün yararlı din adamları heç zaman bu cür yolu tuta bilməz, əsl din xadimi öz vəzifəsini layiqincə yerinə yetirir.

İradə SARIYEVA

Son xəbərlər