44 günlük Vətən müharibəsində haqq savaşımızda Qarabağın azadlığı uğrunda Astara rayonu 41 şəhid verib. Rayon sakinləri öz qəhrəman oğullarını ürəklərində yaşatmaqla tez-tez onların adlarına layiq tədbirlər keçirirlər.
Astara Rayon Heydər Əliyev Mərkəzinin, Rayon Gənclər və İdman İdarəsinin birgə təşkilatçılığı ilə baş tutan “Şəhidlər ölməz, Vətən bölünməz” adlı videokonfrans məhz Qarabağda döyüşlər zamanı canından keçən oğulların xatirəsinə həsr olunmuşdu. Şəhid ailələrinin, qazilərin, müharibə veteranlarının, eləcə də əlaqədar təşkilatların nümayəndələrinin iştirak etdiyi tədbir şəhidlərin xatirəsini bir dəqiqəlik sükutla yad etməklə başladı.
Çıxışlarda Mərkəzin direktoru Kübra Səmədova bildirdi ki, 44 günlük Vətən müharibəsi tariximizin şanlı səhifəsidir. Azərbaycan Respublikasının Prezidenti, müzəffər Ali Baş Komandan İlham Əliyevin rəhbərliyi altında şanlı Ordumuzun qazandığı qələbə bizim Vətənə, torpağa bağlı xalq olmağını bütün dünyaya göstərdi. Qarabağın yağı düşməndən azad edilməsi, ölkəmizin ərazi bütövlüyünün bərpa olunması uğrunda şəhid olmuş Vətən övladları bu müqəddəs savaşın əsl qəhrəmanlarıdır.
Astara rayonunun Alaşa kənd sakini, şəhid Telman Nəhmətovun atası Təyyar Nəhmətov, onun həyat yoldaşı Şəfa Nəhmətova, astaralı şəhid hərbi həkim Nurlan Fərəməzovun atası Əhliman Fərəməzov, Ərçivan qəsəbəsindən şəhid Əli Feyziyevin həyat yoldaşı Afaq Feyziyeva, Kijabə qəsəbə xəstəxanasının həkimi, Qarabağ qazisi Vüqar Ağayev, Yardımlı rayonu Bilnə kəndindən olan şəhid Əli Rzalının atası Nuru Rzalı vurğulayıb ki, Azərbaycan Ordusunun qələbəsi ilə başa çatan Vətən müharibəsi xalqımızın igidliyini, əyilməz ruhunu nümayiş etdirdi. Minlərlə Vətən övladı doğma torpaqların hər qarışı uğrunda son damla qanına qədər döyüşdü, əsl qəhrəmanlıq nümunələri göstərərək canından keçdi. Şanlı ordumuz yağı düşməni məhv etməklə bütün şəhidlərin, o cümlədən Xocalı soyqırımı qurbanlarının qisasını aldı.
Axırda tədbir iştirakçıları şanlı Azərbaycan Ordusu ilə qürur duyduqlarını söyləməklə şəhid ailələrinə səbir diləyib və yaralıların tezliklə sağalmasını arzulayıblar.
Zəfər ORUCOĞLU Azərbaycan Jurnalistlər Birliyinin üzvü
