Xəbər verildiyi kimi, DTX tərəfindən həbs edilən Şəmkirin sabiq icra başçısı Alimpaşa Məmmədov əksər cinayətlərini oğlu Adilzadə Adilin adına rəsmiləşdirib.
Bu mənimsəmələrdən biri də Çinarlı bələdiyyəsi tərəfindən təsis edilmiş, mülkiyyətində 2 milyon 844 min manat dəyərində əmlakı olan “Çinarlı Qəsəbə” MMC ilə bağlıdır. Belə ki, rəsmi məlumata görə, A.Məmmədov icra başçısı kimi vəzifəsindən sui-istifadə edərək “Çinarlı Qəsəbə”nin bütün paylarını oğluna və tabeliyində fəaliyyət göstərən digər şəxslərə məxsus “Şəmkir Səbət Ticarət Mərkəzi” MMC-yə cəmi 40 manata satıb.
Kənd təsərrüfatı məhsullarının satışını həyata keçirən “Şəmkir Səbəti” də “Çinarlı qəsəbə” MMC-nin nəzdində təsis edilib. 2017-ci ildə bu müəssisənin açılışı olub. Açılış mərasimində Alimpaşa Məmmədov da iştirak edib. Məlumat üçün bildirək ki, “Şəmkir Səbəti” ticarət mərkəzi Bakı-Qazax avtomobil yolunun 391-ci kilometrliyində yerləşir. Ticarət obyekti beş hektar ərazini əhatə edir. Obyektin ərazisində 147 ədəd ağac konstruksiyalardan ibarət butiklər, sahəsi 7000 kvadrat metrə yaxın topdansatış ticarətin təşkili üçün qapalı sahələr, sahəsi 500 kvadrat metrdən ibarət “Ailəvi istirahət” yeməkxana binası, beş ədəd soyuducu anbar inşa olunub. Eyni zamanda, “Şəmkir Səbəti” ticarət mərkəzinin nəzdində “Şəmkir Səbəti Supermarket” də var ki, Alimpaşa Məmmədov bu obyektin də açılışında qırmızı lenti kəsib. Ötən il iyunun 25-də isə bazar ərazisində güclü yanğın olub. Nəticədə, altı köşk külə dönüb.
Alimpaşa Məmmədovun digər cinayətlərindən biri də “Abad Şəmkir” MMC ilə bağlıdır.
Məsələ burasındadır ki, keçmiş başçı Şəmkir Şəhər Bələdiyyəsi tərəfindən təsis edilmiş, mülkiyyətində 967 min manat dəyərində qida məhsulları istehsal zavodu olan “Abad Şəmkir” MMC-nin bütün paylarının oğluna cəmi 180 manata satılmasını təmin edib. Bildirək ki, respublikada ilk dəfə olaraq Şəmkirdə 42 bələdiyyənin nəzdində 45 məhdud məsuliyyətli cəmiyyət təsis edilib. Bu isə 2014-cü ilin dördüncü rübünə - Alimpaşa Məmmədovun icra başçısı təyin edildiyi ilə təsadüf edir. Rayonun ən böyük bələdiyyəsi olan Şəmkir bələdiyyəsinin nəzdində üç MMC – “Ceyrançöl”, “Abad Şəmkir” və “Morul Tikinti” müəssisələri fəaliyyət göstərir. “Abad Şəmkir” MMC-yə məxsus Şəmkir Ağ dağlar adlanan ərazidə “Natural” su və konserv məhsulları istehsal edən zavod isə 2015-ci ildə tikilib.
Mətbuatda yayılan iddialara görə, həmin vaxt zavodun tikintisi üçün “Atabank”dan 10 il müddətinə 700 min manat kredit götürülüb.
Alimpaşa Məmmədovun digər mənimsəməsinə gəlincə, bu, “Az Forel” MMC ilə bağlıdır. Belə ki, sabiq başçı mənimsəmə və rüşvət alma yolu ilə əldə etdiyi 832 min manatı oğlu Adil Adilzadənin adına təsis etdiyi “Az Forel” MMC-nin xərclərinə yönəltməklə həmin pul vəsaitlərini leqallaşdırıb.
Göründüyü kimi, həbs edilən icra başçısı öz cinayətinə oğlunu da şərik edib. Bu halda qanunvericilik nə deyir və icra başçısının oğlu ilə bağlı hansı hüquqi addımlar atıla bilər?
Hüquqşünas Şəmsəddin Əliyev “Bakı-Xəbər”ə açıqlamasında bildirdi ki, son zamanlar korrupsiya ilə bağlı dövlətin apardığı tədbirlər cəmiyyət tərəfindən təqdir edilir: “DTX-nın apardığı əməliyyatlar çox uğurludur. Vəzifəli şəxslərlə bağlı həyata keçirilən bu əməliyyatlar elə-belə alınmır. Buna kifayət qədər əmək sərf edilir. İlkin məlumatlar tam təsdiqini tapandan sonra belə əməliyyat həyata keçirilir. Yəni DTX-nın bu tip əməliyyatları zərgər incəliyi ilə həyata keçirilir. Hər bir məmurun cinayət törətməsində kimin dəstəyi olubsa, o, cinayətin iştirakçısı kimi məsuliyyətə cəlb olunmalıdır. Həmin adam mütəşəkkil dəstənin üzvü sayılır. Cinayətdə iştirakçılıq cinayətin törədilməsində birgə iştirakçılığa deyilir. Həmin adam öncədən əməlin nəticəsini görür və qəsdən buna rəvac verir. Son həbs edilən icra başçısı ilə bağlı yayılan rəsmi məlumatdan görünür ki, o, oğlunu da öz cinayətlərinə şərik edib. İstintaq onların əməlini mütəşəkkil dəstə kimi tövsif edə bilər. Belə olacağı halda, icra başçısının oğluna qarşı da cinayət işi qaldırılacaq. Onun oğlundan başqa da kim həmin cinayətin törədilməsində iştirak edibsə, onu da mütləq mənada məsuliyyətə cəlb edəcəklər. Burada cəzanın ağırlaşdırılmasından söhbət gedə bilər. Bunların cinayət əməlləri ağırdır, yəqin ki, onların istintaqı yekunlaşdırılandan sonra işə Ağır Cinayətlər Məhkəməsində baxılacaq”.
Məhəmmədəli QƏRİBLİ
