Göygöl şəhər sakini, əmək vətəranı Yusif Xancanov qəzetimizə rayonda səhiyyənin vəziyyəti ilə bağlı məktub göndərib. Məktubda deyilir:
“Ömür-gününü Vətəninin, yaşadığı şəhərin, bölgənin rifahına, inkişafına sərf edən insanlar cəmiyyətdə daha aktiv və inam mənbəyi olan rəy daşıyıcıları sayılır. Onların diqqətində, müzakirələrində insanlara, daha çox yaşlılara göstərilən səhiyyə xidmətinin nə dərəcədə tələbata cavab verməsi dayanır. Buna görə də, ölkədə səhiyyənin maddi-texniki bazasının möhkəmləndirilməsi, bacarıqlı, işgüzar kadrlarla təmin olunması sahəsində hər bir qərarı, yeniliyi sevinclə qarşılayır, islahatları ömürlərinin uzadılmasına yönələn diqqət və qayğı əlaməti kimi bəyənir, təbliğçilərin ön sıralarında olmaqdan mənəvi zövq alırlar.
İslahatlar, yeniliklər, maddi-texniki baza öz yerində. Əgər hər hansı səhiyyə ocağında sağlam mühit yoxdursa, Hippokrat andına sədaqət unudulubsa, burada ali dərəcəli şərait də narazılıqları sığortalaya bilməyəcək. Etiraf edim ki, əvvəllər biz Göygöl rayonunun nəinki yaşlıları, eləcə də digər kateqoriyadan olan sakinləri məhz həmin səbəbdən giley-güzar və şikayətlər sarıdan bolluq içində olmuşuq. Rayon Mərkəzi xəstəxanasının keçmiş baş həkiminin vəzifə borcuna özünə sərf edən tərzdə yanaşması nazirliyə və müvafiq orqanlara narazılıq dolu müraciətlərin axışmasına gətirib çıxarmışdı.
Nəhayət həmin şəxs vəzifəsindən azad edildi. Lakin əhaliyə pullu xidmətə aludə olan həmin şəxs bundan da nəticə çıxarmadı, kredosuna uyğun çıxış yolunu tapdı. Köhnə xəstəxananın terapiya binasını özəlləşdirib, orada "Ümid Tibb Mərkəzi" yaradıb fəaliyyətini davam etdirməkdədir.
Mənim məqsədim redaksiyaya yazdığım məktubda heç də rayonda uzun illər baş həkim postunu tutmuş şəxsin səciyyələndirilməsi deyil. İstərdim yerində olan kadrların qısa müddətdə köklü dəyişikliklər yaratmaq qabiliyyətinə diqqət çəkim. İndi bölgəmizdə Azərbaycan Respublikası Tibbi Sığorta üzrə Dövlət Agentliyinin Göygöl rayon Mərkəzi Xəstəxanasında apardığı islahatlardan razılıq hissi ilə danışılır. Bir il əvvəl xəstəxanada kadr dəyişikliyi oldu. Direktor vəzifəsi 12 il ümumi cərrah işləmiş gənc mütəxəssis Vasif Əliyevə həvalə edildi.
Həmin müddətdə tibb ocağında ən başlıca dəyişiklik nədir sualına belə cavab verərdim - sağlam mühitin bərqərar olması. Əgər əsas tələb keyfiyyətli, təmənnasız xidmətdə, adamlara səmimiyyətlə yanaşmada mərkəzləşirsə insanlar ora inamla, cürətlə təşrif gətirirlər.
Əvvəllər belə hallar da baş verirdi: Saxta əlillik dərəcələri müvafiq təmənnaların müqabilində başa gəlirdi. Tezliklə bu bazar bağlandı. Poliklinikanın keçmiş baş həkimi şikayətçilərə imtinanın başlıca səbəbinin yeni direktor olduğunu söyləməklə vəziyyətdən çıxmağa çalışırdı. Daha kimsədən işə götürülmə müqavilində maddi təmənna umulmur. Sözlərimi son bir ildə işə qəbul olunan 4 həkim, 4 yüksək dərəcəli tibb bacısı və 10-a yaxın digər kateqoriyadan olanların hər biri təsdiqləyə bilər. Onlardan 4-ü şəhid ailələrinin üzvləridirlər.
Xəstəxanadakı başlıca yeniliklərdən biri poliklinika sistemi ilə bağlıdır. Həkimlərin hamısı günortaya qədər orada müraciət edənlərin pulsuz müayinəsi və müalicəsi ilə məşğuldur. Ağır xəstələr xəstəxanaya yerləşdirilir, yüngülləri ev şəraitində ambulator müalicə alırlar.
Vətən müharibəsi dövründə burada 1000 nəfər yaralıya necə qayğı və həssaslıqla xidmət göstərildiyinin şahidiyik.
Karantin dövrünün də tələblərinin də gözlənilməsi, müvafiq profilaktik tədbirlərin aparılması da həkim və tibb bacılarının insanların həyatının və sağlamlıqlarının qorunmasının başlıca qayğıları olduğunu göstərməkdədir.
Rayonda 8000 nəfərdən çox vətəndaş vaksinləşmə kampaniyasına cəlb edilib”.
