Yaponiyanın Azərbaycandakı fövqəladə və səlahiyyətli səfiri Vada Cüniçi xanımı Vada Reiko ilə birlikdə Azərbaycanın cənub qapısı sayılan Astara rayonunda olub.
Səfər çərçivəsində Vada Cüniçi Astara Rayon İcra Hakimiyyətin başçısı Qəzənfər Ağayevlə görüşüb. Görüşdə Yaponiya hökumətinin həyata keçirdiyi “Ot Kökləri və İnsan Təhlükəsizliyi” layihəsi üzrə məsləhətçilər Haşimoto Takuma və Zakir Əliyev, “Sosial Məsələlərin Həllinə Kömək” İctimai Birliyinin sədri Anar Aslanov, “Konstitusiya Araşdırmalar Fondu” nun rəhbəri Əliməmməd Nuriyev iştirak edib.
Qəzənfər Ağayev səfirə Astaranın tarixi, coğrafi mövqeyi, əhalinin məşğulluğu, iqtisadiyyatı və sosial-iqtisadi inkişafı barədə ətraflı məlumat verdikdən sonra Yaponiya hökumətinin rayonda həyata keçirdiyi tədbirlərdən söz açıb. Bildirib ki, yaponların layihələri çərçivəsində 2003-cü ildə Astaranın Ərçivan qəsəbəsində, 2005-ci ildə Artupa kəndində yeni məktəb binaları inşa edilib. Astaradakı müasir çay fabrikində avadanlıqların quraşdırmasında yapon mütəxəssislərin əməyi yüksək olub. Yaponiya hökumətinin vəsaiti hesabına “Sosial Məsələlərin Həllinə Kömək” İctimai Birliyi tərəfindən ötən il ucqar Hamoşam kəndində, bu il isə Ojakəran kəndində tibb məntəqələri tikilərək istifadəyə verilib. İcra başçısı görülən işlərə görə Yaponiya hökumətinə minnətdarlığını bildirib, digər sahələrin, xüsusən balıqçılığın inkişafında qarşılıqlı əməkdaşlığın mümkünlüyünü deyib.
Səfir isə Astara təbiətinin ölkəsinin təbiəti ilə oxşarlığını vurğulayaraq, bundan xüsusi zövq aldığını bildirib. Göstərilən diqqətə görə minnətdarlıq edən səfir onu da qeyd edib ki, Yaponiya dövlətinin həyata keçirdiyi Qrant Yardımı Proqramı çərçivəsində rayonda 2 yeni tibb məntəqəsinin inşasına çox sevinir. Bundan sonra müxtəlif sahələrdə yeni layihələrin icrası üçün atılacaq addımların xalqlar arasında dostluğa və qarşılıqlı əməkdaşlığa stimul olacağını bildirən səfir tərəflər Yaponiya ilə Azərbaycan arasında mövcud iqtisadi və mədəni əlaqələrin daha da genişlənəcəyini, mədəniyyət, turizm, kənd təsərrüfatı və digər sahələrdə əməkdaşlıq üçün münbit şəraitin olduğunu bildirib.
Sonra İcra başçısı Qəzənfər Ağayevlə səfir Vada Cüniçi Ojakəran kəndinə gedib, səfir burada tikilən tibb məntəqəsində yaradılan şəraiti bəyənərək təəssüratlarını bildirib.
Zəfər ORUCOĞLU Azərbaycan Jurnalistlər Birliyinin üzvü
